சென்னை:
தமிழகத்தில் வரவிருக்கும் சட்டசபைத் தேர்தலை முன்னிட்டு அ.தி.மு.க. கூட்டணியில் தொகுதி பங்கீடு பேச்சுவார்த்தை தீவிரமாக நடைபெற்று வருகிறது. கடந்த 2021ஆம் ஆண்டிலும் அ.தி.மு.க. தலைமையிலான கூட்டணியில் பா.ஜ.க., பா.ம.க., த.மா.கா. உள்ளிட்ட கட்சிகள் இணைந்திருந்தன. அப்போது அ.தி.மு.க. 179 தொகுதிகளில் போட்டியிட்டது. பா.ம.க. 23, பா.ஜ.க. 20, த.மா.கா. 6 தொகுதிகள், மேலும் ஆறு சிறு கட்சிகள் தலா ஒரு தொகுதியில் போட்டியிட்டன.
அந்தத் தேர்தலில் பா.ஜ.க. மற்றும் பா.ம.க. தங்களது சின்னங்களில் போட்டியிட்டாலும், த.மா.கா. உள்ளிட்ட பிற கட்சிகள் அ.தி.மு.க.வின் இரட்டை இலை சின்னத்தில் களம் கண்டன. இதனால் மொத்தம் 191 தொகுதிகளில் இரட்டை இலை சின்னம் தோன்றியது. இம்முறை அந்த கூட்டணியில் டி.டி.வி. தினகரனின் அ.ம.மு.க. புதிதாக இணைந்துள்ளது.
தற்போதைய பேச்சுவார்த்தை நிலவரப்படி, அ.தி.மு.க. 167 தொகுதிகள், பா.ஜ.க. 30, பா.ம.க. 18, அ.ம.மு.க. 8, த.மா.கா. 5, மற்ற கட்சிகள் தலா ஒரு தொகுதி என தொகுதி ஒதுக்கீடு உருவாகும் வாய்ப்பு உள்ளது. இதன் அடிப்படையில், கடந்த முறை விட அ.தி.மு.க.வுக்கு சுமார் 12 தொகுதிகள் குறையலாம் என தகவல்கள் தெரிவிக்கின்றன.
இந்நிலையில், பா.ஜ.க. அதிக தொகுதிகளைப் பெற வேண்டும் என வலியுறுத்தி வருகிறது. கடந்த நாடாளுமன்றத் தேர்தலில் மாநிலத்தின் 39 நாடாளுமன்ற தொகுதிகளுக்குள் உள்ள சுமார் 80 சட்டசபைத் தொகுதிகளில் பா.ஜ.க. இரண்டாம் இடம் பிடித்தது. இதனை அடிப்படையாகக் கொண்டு அந்த 80 இடங்களில் இருந்து 72 தொகுதிகளைத் தேர்ந்தெடுத்து, அவற்றில் 35 தொகுதிகளை தமக்கே ஒதுக்க வேண்டும் என பா.ஜ.க. பட்டியலை அ.தி.மு.க.விடம் சமர்ப்பித்துள்ளது.
அந்தப் பட்டியலில் ஆயிரம் விளக்கு, மயிலாப்பூர், தியாகராயநகர், காஞ்சீபுரம், கோவை சிங்காநல்லூர், நாகர்கோவில், பழனி, வேலூர், தென்காசி, ஆலங்குளம் உள்ளிட்ட முக்கிய தொகுதிகள் இடம்பெற்றுள்ளன. இவை பெரும்பாலும் அ.தி.மு.க.வின் வலுவான தொகுதிகளாகக் கருதப்படுவதால் பேச்சுவார்த்தை சிக்கலான நிலைக்கு சென்றுள்ளது.
மேலும், அ.ம.மு.க.வுக்கான தொகுதிகளையும் பா.ஜ.க. சார்பில் ஒதுக்க வேண்டும் என்ற கோரிக்கை வைக்கப்பட்டுள்ளது. அ.ம.மு.க. கோரியுள்ள 6 தொகுதிகளையும் கூடுதலாக வழங்க வேண்டும் என பா.ஜ.க. வலியுறுத்துகிறது. இதன்படி பா.ஜ.க.க்கு 35 தொகுதிகள், அ.ம.மு.க.க்கு 6 தொகுதிகள் என பேச்சுவார்த்தை வடிவம் பெறும் வாய்ப்பு உள்ளது.
இந்த விவகாரத்தை இறுதியாகத் தீர்மானிக்க, பா.ஜ.க. தேசிய பொறுப்பாளர் மற்றும் மத்திய மந்திரி பியூஷ் கோயல் நாளை சென்னை வரவுள்ளார். அவர் அ.தி.மு.க. பொதுச்செயலாளர் எடப்பாடி பழனிசாமியுடன் நேரில்பேச்சுவார்த்தை நடத்தி, தொகுதி பங்கீடு விவகாரத்தை இறுதிசெய்ய உள்ளார் என கூட்டணி வட்டாரங்கள் உறுதிப்படுத்தியுள்ளன.
