சென்னை:
தமிழக அரசியலில் தொடர்ந்து பரபரப்பை ஏற்படுத்தி வரும் அதிமுகவில் மீண்டும் உள்கட்சி மோதல் வெடித்துள்ளது. கட்சித் தலைமையால் வழங்கப்பட்ட பதவிகளை ஏற்க முடியாது என்று முன்னாள் அமைச்சர்கள் எஸ்.பி.வேலுமணி, நத்தம் விஸ்வநாதன் உள்ளிட்ட முக்கிய நிர்வாகிகள் அறிவித்திருப்பது அரசியல் வட்டாரங்களில் பெரும் அதிர்வலைகளை ஏற்படுத்தியுள்ளது.
சட்டமன்ற தேர்தலுக்குப் பிறகு தமிழக அரசியலில் பல்வேறு மாற்றங்கள் நிகழ்ந்து வருகின்றன. நீண்டகாலமாக தமிழக அரசியலில் ஆதிக்கம் செலுத்திய திமுக மற்றும் அதிமுக கட்சிகளுக்கு மாற்றாக தமிழக வெற்றிக் கழகம் ஆட்சியை அமைத்துள்ள நிலையில், எதிர்க்கட்சிகளுக்குள்ளும் புதிய அரசியல் சமன்பாடுகள் உருவாகி வருகின்றன.
அதிமுகவைப் பொறுத்தவரை தேர்தல் தோல்விக்குப் பின்னர் கட்சியின் மூத்த தலைவர்களிடையே கருத்து வேறுபாடுகள் வெளிப்படையாகத் தெரியத் தொடங்கின. முன்னாள் அமைச்சர்களான எஸ்.பி.வேலுமணி மற்றும் சி.வி.சண்முகம் தலைமையில் செயல்பட்ட ஒரு அணியினர் கட்சித் தலைமையுடன் முரண்பட்டனர். சட்டப்பேரவையில் நடைபெற்ற நம்பிக்கை வாக்கெடுப்பின்போது கட்சியின் அதிகாரப்பூர்வ நிலைப்பாட்டுக்கு மாறாக அவர்கள் செயல்பட்டதாக கூறப்பட்டதைத் தொடர்ந்து, கட்சித் தலைமையால் ஒழுங்கு நடவடிக்கைகளும் எடுக்கப்பட்டன.
இதற்கிடையே, கட்சியின் பல முக்கிய நிர்வாகிகள் மற்றும் சட்டமன்ற உறுப்பினர்கள் தொடர்ந்து விலகிய சம்பவங்களும் அதிமுகவுக்கு பின்னடைவை ஏற்படுத்தின. சிலர் தங்களது சட்டமன்ற உறுப்பினர் பதவிகளை ராஜினாமா செய்து வேறு அரசியல் பாதையைத் தேர்ந்தெடுத்தனர். சமீபத்தில் கரூர் தொகுதி முன்னாள் எம்.எல்.ஏ. எம்.ஆர்.விஜயபாஸ்கரும் தனது பதவியை ராஜினாமா செய்தது பரபரப்பை ஏற்படுத்தியது.
இந்த சூழலில், கட்சிக்குள் ஏற்பட்டிருந்த அதிருப்தியை சமாளிக்கும் நோக்கில் எடப்பாடி பழனிசாமி பல்வேறு நிர்வாக மாற்றங்களை மேற்கொண்டார். அதன் ஒரு பகுதியாக எஸ்.பி.வேலுமணிக்கு துணைப் பொதுச்செயலாளர் பதவி வழங்கப்பட்டதாக அறிவிக்கப்பட்டது. ஆனால், அவர் எதிர்பார்த்திருந்த மாவட்டச் செயலாளர் பொறுப்பு வழங்கப்படவில்லை என கூறப்படுகிறது.
இதனால் அதிருப்தி அடைந்த எஸ்.பி.வேலுமணி தனது ஆதரவாளர்களுடன் ஆலோசனை நடத்தி வந்த நிலையில், தற்போது முக்கியமான அரசியல் அறிக்கை ஒன்றை வெளியிட்டுள்ளார். அந்த அறிக்கையில், “எங்களுக்கு வழங்கப்பட்ட பதவிகள் தேவையில்லை. நாங்கள் சாதாரண கழக உறுப்பினர்களாகவே தொடர்ந்து பணியாற்றுவோம். வழங்கப்பட்ட பதவிகளை ஏற்று செயல்பட முடியாத சூழ்நிலையை கட்சித் தலைமையே உருவாக்கியுள்ளது” என்று தெரிவித்துள்ளார்.
இந்த அறிக்கையில் எஸ்.பி.வேலுமணியுடன் நத்தம் விஸ்வநாதன், கே.பி.அன்பழகன், பி.தங்கமணி உள்ளிட்ட மூத்த தலைவர்களும் கையெழுத்திட்டுள்ளனர். இது தனிநபர் அதிருப்தி மட்டுமல்லாமல், ஒரு முக்கிய அணியின் எதிர்ப்பாக பார்க்கப்படுகிறது.
அரசியல் நோக்கர்கள் கருத்துப்படி, இந்த நடவடிக்கை அதிமுகவில் நிலவி வரும் உள்கட்சி முரண்பாடுகளை மேலும் தீவிரப்படுத்தக்கூடும். கட்சித் தலைமையும் அதிருப்தி அணியினரும் இடையே சமரசம் ஏற்படுமா அல்லது இந்த மோதல் புதிய அரசியல் திருப்பத்தை ஏற்படுத்துமா என்பது எதிர்பார்ப்பை ஏற்படுத்தியுள்ளது.
