அரசு ஊழியர் போராட்டத்திற்கு பா.ம.க. தார்மீக ஆதரவு – அன்புமணி ராமதாஸ் கண்டனம்

சென்னை: பாட்டாளி மக்கள் கட்சி தலைவர் அன்புமணி ராமதாஸ் வெளியிட்டுள்ள அறிக்கையில், தமிழக அரசு ஊழியர்களின் கோரிக்கைகள் தொடர்பாக தி.மு.க. அரசின் அணுகுமுறையை கடுமையாக விமர்சித்துள்ளார்.

பழைய ஓய்வூதியத் திட்டம் உள்ளிட்ட 10 முக்கிய கோரிக்கைகளை வலியுறுத்தி, அரசு ஊழியர் அமைப்புகள் கடந்த அக்டோபர் மாதம் முதலே தொடர் போராட்டங்களை அறிவித்திருந்தன. ஆனால், தி.மு.க. அரசு அவற்றை கவனிக்காமல் காலம் தாழ்த்தியதாக அவர் குற்றம்சாட்டினார். நவம்பர் 18 அன்று ஒருநாள் அடையாள வேலைநிறுத்தம், டிசம்பர் 13 அன்று மாவட்ட தலைநகரங்களில் உண்ணாவிரத போராட்டம், மேலும் டிசம்பர் 27 அன்று வேலைநிறுத்த மாநாடு நடத்தப்படவுள்ளது. இத்தகைய போராட்டங்களை ஒடுக்க முயன்ற தி.மு.க. அரசு, அது முடியாத நிலையில்தான் பேச்சுவார்த்தைக்கு அழைத்ததாக அன்புமணி கூறினார்.

சென்னையில் நடைபெற்ற பேச்சுவார்த்தையில் எந்த உறுதியும் அளிக்கப்படவில்லை. அமைச்சர்கள் தரப்பில், பேச்சின் விவரங்களை முதல்-அமைச்சரிடம் தெரிவித்து, பொங்கலுக்குள் முடிவை அறிவிப்பதாக கூறியுள்ளனர். இது அரசு ஊழியர்களை ஏமாற்றும் செயலாகும் என்றும், ஜனவரி 6 முதல் காலவரையற்ற வேலைநிறுத்தம் திட்டமிட்டபடி நடைபெறும் என்றும் அவர் வலியுறுத்தினார்.

2021 சட்டப்பேரவைத் தேர்தலுக்கான தி.மு.க. தேர்தல் அறிக்கையில் அரசு ஊழியர்கள் மற்றும் ஆசிரியர்களுக்கான 10 வாக்குறுதிகள் அளிக்கப்பட்டிருந்தன. அதில் ஒன்றை மட்டும் நிறைவேற்றிய நிலையில், மீதமுள்ள 9 வாக்குறுதிகள் இன்னும் நிறைவேற்றப்படவில்லை. பழைய ஓய்வூதியத் திட்டத்தை மீண்டும் செயல்படுத்துவதாக வாக்குறுதி அளித்திருந்தும், அதற்கான குழுவின் இறுதி அறிக்கையைப் பெறாமல் அரசு ஊழியர்களை ஏமாற்றி வருவதாக அவர் குற்றம்சாட்டினார்.

மேலும், கடந்த பிப்ரவரி மாதம் நடைபெற்ற போராட்டத்திற்குப் பிறகு, 2025 பிப்ரவரி 24 அன்று நான்கு அமைச்சர்கள் கொண்ட குழு பேச்சுவார்த்தை நடத்தியது. அப்போது கூட கோரிக்கைகளை முதல்-அமைச்சரிடம் தெரிவிப்பதாக கூறியிருந்தும், 10 மாதங்களாக எந்த நடவடிக்கையும் எடுக்கப்படவில்லை. தற்போது மீண்டும் போராட்டம் அறிவிக்கப்பட்டதால், அரசு ஊழியர்களை ஏமாற்றும் வகையில் பேச்சு நடத்தப்பட்டதாக அவர் தெரிவித்தார்.

அரசு வாங்கிய கடனுக்கு ஆண்டுக்கு ரூ.70,503 கோடி வட்டி செலுத்த வேண்டியிருப்பதால், ஊழியர் கோரிக்கைகளை நிறைவேற்ற முடியவில்லை என்று அமைச்சர் வேலு கூறியதை அன்புமணி கடுமையாக விமர்சித்தார். கடன் மற்றும் வட்டி அதிகரித்ததற்கு காரணம் தி.மு.க. ஆட்சியாளர்களின் நிர்வாகச் சீர்கேடும், ஊழலும்தான் என்றும், அதன் தண்டனையை அரசு ஊழியர்களுக்கு சுமத்தக் கூடாது என்றும் அவர் வலியுறுத்தினார்.

அரசு ஊழியர்களின் போராட்டம் மக்களின் சேவைகளை பாதிக்கும் என்றாலும், வேறு வழியில்லாமல் கடைசி ஆயுதமாகவே வேலைநிறுத்தம் அறிவிக்கப்பட்டுள்ளது. அதற்கும் பா.ம.க. தார்மீக ஆதரவளிக்கிறது என அன்புமணி ராமதாஸ் தெரிவித்துள்ளார். தி.மு.க. அரசு செய்த துரோகங்களுக்கு வரும் தேர்தலில் படுதோல்விதான் பரிசாக இருக்கும் என்றும், புதிய அரசு அமைந்த பின் அரசு ஊழியர்களின் நியாயமான கோரிக்கைகள் அனைத்தும் நிறைவேற்றப்படும் என்றும் அவர் உறுதி அளித்துள்ளார்.