சென்னையில் வாக்குப்பதிவு சதவீதம் உயர்வு... ஆனால் வாக்களித்தோர் எண்ணிக்கை குறைவு!

தமிழக சட்டமன்ற தேர்தலில் சென்னை மாவட்டம் இந்த முறை அதிக கவனம் பெற்றுள்ளது. காரணம், கடந்த தேர்தல்களை விட வாக்குப்பதிவு சதவீதம் கணிசமாக உயர்ந்திருந்தாலும், உண்மையில் வாக்களித்த மக்களின் எண்ணிக்கை குறைந்துள்ளது என்பது ஆச்சரியத்தை ஏற்படுத்தியுள்ளது.

2016ஆம் ஆண்டு சென்னை மாவட்டத்தில் மொத்தம் 39.75 லட்சம் வாக்காளர்கள் இருந்தனர். அதில் 24.33 லட்சம் பேர் வாக்களித்தனர். இதனால் வாக்குப்பதிவு சதவீதம் 61.2% ஆக இருந்தது.

2021ஆம் ஆண்டு மொத்த வாக்காளர்கள் 40.04 லட்சமாக உயர்ந்த நிலையில், 24.16 லட்சம் பேர் வாக்களித்தனர். இதன் மூலம் 60% வாக்குப்பதிவு பதிவானது.

ஆனால் 2026ஆம் ஆண்டு சிறப்பு தீவிர திருத்தம் (SIR) செய்யப்பட்ட பின், சென்னை மாவட்டத்தில் மொத்த வாக்காளர்கள் எண்ணிக்கை 28.30 லட்சமாக குறைந்தது. இதில் 23.69 லட்சம் பேர் வாக்களித்துள்ளனர். இதனால் வாக்குப்பதிவு சதவீதம் 83.7% என உயர்ந்துள்ளது.

சதவீத கணக்கில் இது சாதனை போல தோன்றினாலும், எண்ணிக்கை அடிப்படையில் பார்த்தால் 2016 மற்றும் 2021 தேர்தல்களை விட குறைவான மக்கள் தான் இந்த முறை வாக்களித்துள்ளனர்.

இதனால், வாக்காளர் பட்டியல் திருத்தம், பெயர் நீக்கம், நகர்ப்புற இடமாற்றம், இளைஞர்கள் பெயர் சேர்க்கை குறைவு போன்ற காரணங்கள் குறித்து அரசியல் வட்டாரங்களில் விவாதம் அதிகரித்துள்ளது.

சென்னையில் அதிக சதவீத வாக்குப்பதிவு என்றாலும், உண்மையான மக்கள் பங்கேற்பு குறைந்ததா என்ற கேள்வி தற்போது எழுந்துள்ளது.