மதுரையில் திட்டத்தை தொடங்கிய முதல்வர் விஜய்
அரசு மருத்துவமனைகளில் பிறக்கும் தகுதியான குழந்தைகளுக்கு 1 கிராம் தங்க மோதிரம் வழங்கும் ‘தாய்மாமன் தங்க மோதிரம்’ திட்டத்தை முதலமைச்சர் விஜய் மதுரை அரசு ராஜாஜி மருத்துவமனையில் தொடங்கி வைத்தார்.
குழந்தைகளுக்கு நேரடியாக மோதிரம்
திட்டத்தின் தொடக்க நிகழ்ச்சியில் புதிதாக பிறந்த குழந்தைகளுக்கு முதல்வர் விஜய் தங்க மோதிரங்களை நேரடியாக அணிவித்து திட்டத்தை தொடங்கினார். தொடக்க நிகழ்ச்சியில் 25 முதல் 30 குழந்தைகளுக்கு மோதிரம் வழங்க திட்டமிடப்பட்டிருந்ததாக தகவல் வெளியாகியுள்ளது.
யாரெல்லாம் பயன் பெறுவர்?
2026 ஜூன் 22ஆம் தேதி முதல் அரசு மருத்துவமனைகளில் பிறந்த தகுதியான குழந்தைகள் இந்த திட்டத்தின் கீழ் பயன் பெறுவார்கள். குழந்தையின் தாய் தமிழ்நாட்டின் நிரந்தர குடியிருப்பாளராக இருக்க வேண்டும் என்ற தகுதியும் குறிப்பிடப்பட்டுள்ளது.
1.28 லட்சம் மோதிரங்கள் தயார்
திட்டத்தின் முதல் கட்டத்திற்காக 1.28 லட்சம் தங்க மோதிரங்கள் தயாராக உள்ளதாக தெரிவிக்கப்பட்டுள்ளது. ஒவ்வொரு மோதிரத்திற்கும் தனித்த serial number வழங்கப்பட்டு tamper-proof packing-ல் வழங்க ஏற்பாடு செய்யப்பட்டுள்ளது.
அரசு மருத்துவமனைகளில் பிறக்கும் குழந்தைகளுக்கு பயன்
தமிழகத்தில் ஆண்டுதோறும் லட்சக்கணக்கான குழந்தைகள் பிறக்கும் நிலையில், அரசு மருத்துவமனைகளில் நடைபெறும் பிரசவங்களை ஊக்குவிப்பதும், தாய்–குழந்தை நல சேவைகளை அரசு மருத்துவ அமைப்புடன் இணைத்துப் பயன்படுத்தச் செய்வதும் இந்த திட்டத்தின் முக்கிய நோக்கங்களில் ஒன்றாக குறிப்பிடப்பட்டுள்ளது.
‘தாய்மாமன்’ என்ற பெயரின் பின்னணி
தமிழர் குடும்ப மரபில் குழந்தைக்கு தாய்மாமன் சீர் வழங்குவது முக்கியமான வழக்கமாக இருந்து வருகிறது. அதனை பிரதிபலிக்கும் வகையில் திட்டத்திற்கு ‘தாய்மாமன் தங்க மோதிரம்’ என்று பெயரிடப்பட்டுள்ளது.
மாநிலம் முழுவதும் செயல்பாடு
மதுரையில் திட்டம் தொடங்கிய பின்னர் தமிழகத்தின் பல அரசு மருத்துவமனைகளில் இந்த திட்டம் செயல்படுத்தப்படுகிறது. இடைத்தேர்தல் நடத்தை விதிகள் அமலில் உள்ள பகுதிகள் மட்டும் ஆரம்ப கட்ட செயல்பாட்டிலிருந்து விலக்கப்பட்டுள்ளன.
— அரசு பார்வை செய்திப் பிரிவு
