ஹூஸ்டன்:

உலக கால்பந்தின் ஜாம்பவான்களில் ஒருவரான கிறிஸ்டியானோ ரொனால்டோ, மேலும் ஒரு வரலாற்று சாதனையை தனது பெயரில் பதிவு செய்துள்ளார். 2026 உலகக்கோப்பை கால்பந்து தொடரில் உஸ்பெகிஸ்தானுக்கு எதிராக இரண்டு கோல்கள் அடித்ததன் மூலம், ஆறு உலகக்கோப்பை தொடர்களிலும் கோல் அடித்த முதல் வீரர் என்ற புதிய உலக சாதனையை அவர் படைத்துள்ளார்.

அமெரிக்கா, கனடா மற்றும் மெக்சிகோ இணைந்து நடத்தும் 2026 உலகக்கோப்பை கால்பந்து தொடர் ரசிகர்களின் பெரும் வரவேற்புடன் நடைபெற்று வருகிறது. ஹூஸ்டன் மைதானத்தில் நடைபெற்ற லீக் போட்டியில் போர்ச்சுகல் அணி உஸ்பெகிஸ்தானை எதிர்கொண்டது. இந்த போட்டியில் அனைவரின் கவனமும் போர்ச்சுகல் அணியின் நட்சத்திர வீரர் கிறிஸ்டியானோ ரொனால்டோ மீது இருந்தது.

ரசிகர்களின் எதிர்பார்ப்பை பூர்த்தி செய்த ரொனால்டோ, போட்டியின் 6-வது மற்றும் 39-வது நிமிடங்களில் தலா ஒரு கோல் அடித்து அசத்தினார். அவரது அபாரமான ஆட்டத்தால் போர்ச்சுகல் அணி முக்கிய வெற்றியை பதிவு செய்ததோடு, ரொனால்டோ ஆட்டநாயகன் விருதையும் கைப்பற்றினார்.

இந்த இரண்டு கோல்களின் மூலம் கால்பந்து உலகில் புதிய சாதனையை அவர் படைத்துள்ளார். 2006, 2010, 2014, 2018, 2022 மற்றும் 2026 ஆகிய ஆறு உலகக்கோப்பை தொடர்களிலும் கோல் அடித்த ஒரே வீரர் என்ற பெருமையை தற்போது ரொனால்டோ பெற்றுள்ளார்.

அர்ஜென்டினா அணியின் நட்சத்திர வீரர் லியோனல் மெஸ்சியும் ஆறு உலகக்கோப்பை தொடர்களில் விளையாடியுள்ளார். ஆனால் 2010 உலகக்கோப்பை தொடரில் அவர் கோல் அடிக்கவில்லை. இதனால் அனைத்து உலகக்கோப்பை பங்கேற்புகளிலும் கோல் அடித்த வீரர் என்ற சாதனை மெஸ்சிக்கு கிடைக்கவில்லை. தற்போது அந்த வரலாற்று சாதனையை ரொனால்டோ தனக்கே உரியதாக்கியுள்ளார்.

இதுமட்டுமின்றி உலகக்கோப்பை போட்டிகளில் அதிக கோல்கள் அடித்த போர்ச்சுகல் வீரர் என்ற சாதனையையும் ரொனால்டோ கைப்பற்றியுள்ளார். உலகக்கோப்பை அரங்கில் அவரது மொத்த கோல் எண்ணிக்கை தற்போது 10 ஆக உயர்ந்துள்ளது. இதன் மூலம் போர்ச்சுகலின் முன்னாள் ஜாம்பவான் யூசிபியோவின் 9 கோல் சாதனையை அவர் முறியடித்துள்ளார்.

கடந்த இரண்டு தசாப்தங்களாக உலக கால்பந்தில் ஆதிக்கம் செலுத்தி வரும் ரொனால்டோ, வயது அதிகரித்த பின்னரும் தனது திறமையை நிரூபித்து வருகிறார். உடல்தகுதி, கடின உழைப்பு மற்றும் அர்ப்பணிப்பு ஆகியவற்றின் மூலம் இளம் வீரர்களுக்கே சவால் விடுக்கும் வகையில் தொடர்ந்து சாதனைகளை குவித்து வருகிறார்.

மெஸ்சி மற்றும் ரொனால்டோ இடையேயான போட்டி கால்பந்து உலகில் எப்போதும் பேசுபொருளாக இருந்து வருகிறது. தற்போது உலகக்கோப்பை வரலாற்றிலும் மெஸ்சியை முந்தி ரொனால்டோ புதிய சாதனை படைத்திருப்பது ரசிகர்களிடையே பெரும் விவாதத்தை ஏற்படுத்தியுள்ளது.

கால்பந்து வரலாற்றின் மிகச் சிறந்த வீரர்களில் ஒருவராக ஏற்கனவே தன்னை நிலைநிறுத்தியுள்ள ரொனால்டோ, இந்த புதிய சாதனையின் மூலம் தனது பெயரை மேலும் பொன்னெழுத்துக்களில் பதிவு செய்துள்ளார்.