சென்னை:
அ.தி.மு.க. பொதுச் செயலாளர் எடப்பாடி கே. பழனிசாமி, தி.மு.க. கூட்டணியில் விரிசல் ஏற்பட்டுள்ளதாக கூறியுள்ளார். சென்னை மதுரவாயலில் உள்ள ஸ்ரீவாரு வெங்கடாஜலபதி பேலஸ் திருமண மண்டப வளாகத்தில் நடைபெற்ற “மக்களைக் காப்போம்; தமிழகத்தை மீட்போம்” என்ற பிரசார கூட்டத்தில் அவர் கலந்து கொண்டு உரையாற்றினார்.
உரையில் அவர் கூறியதாவது: “முன்னாள் முதல்வர் ஜெயலலிதா பிறந்த நாளில் ஒவ்வொரு குடும்பத்திற்கும் ரூ.10,000 வழங்கப்படும் என அ.தி.மு.க. அறிவித்துள்ளது. இதற்கு பதிலளித்த முதல்வர் எம்.கே. ஸ்டாலின் ‘பூஜ்யம் + பூஜ்யம் = பூஜ்யம் தான்’ என கூறியுள்ளார். ஆனால், வரவிருக்கும் தேர்தலில் பூஜ்யம் கிடைப்பது தி.மு.க.வுக்கே; ராஜ்யம் கிடைப்பது அ.தி.மு.க.வுக்கே,” என்றார்.
அவர் மேலும் தெரிவித்ததாவது: “தேர்தல் நெருங்கிவிட்டதால் மகளிர் உரிமைத் தொகை மற்றும் கோடைக்கால உதவித் தொகை என இரண்டு நிதியுதவிகளையும் முதல்வர் ஸ்டாலின் அறிவித்துள்ளார். மகளிர் உரிமைத் தொகையை முன்கூட்டியே வழங்கவில்லை என்றாலும், மாதந்தோறும் ரூ.1,000 வழங்கப்படும் என்கிறார். இதை மக்களை ஏமாற்றும் தந்திரம் என்று கூறலாம்; ஆனால், உண்மையான ‘சூப்பர் ஹிட்’ அ.தி.மு.க.வின் அறிவிப்பே,” என பழனிசாமி கடுமையாக விமர்சித்தார்.
மேலும், “புதிய திட்டங்களுக்கு பெயர் வைப்பதில் ஸ்டாலின் நிபுணர். அதற்கே நோபல் பரிசு வழங்கலாம்,” என கிண்டலாக குறிப்பிட்டார்.
அதே நேரத்தில், “தி.மு.க. கூட்டணியில் உள்ள இந்திய தேசிய காங்கிரஸ் தற்போது ஆட்சியில் பங்கு கேட்டு வருகிறது. இதனால் கூட்டணியில் விரிசல் ஏற்பட்டுள்ளது. கூட்டணி நிலைக்குமா என்ற கேள்வியும் எழுந்துள்ளது. அமைச்சர் நேரு மீது வழக்கு பதிவு செய்ய சென்னை உயர் நீதிமன்றம் உத்தரவிட்டும் நடவடிக்கை எடுக்கப்படவில்லை. தி.மு.க. கூட்டணியில் உள்ள கட்சிகள் கடந்த பத்து ஆண்டுகளாக தி.மு.க.வுக்கு அடிமையாக உள்ளன. இதனால் மார்க்சிஸ்ட் கட்சி வளர்ச்சி அடையவில்லை,” என்றும் அவர் கூறினார்.
அதிமுக கூட்டணியில் உள்ள கட்சிகள் தங்களது கொள்கை அடிப்படையில் செயல்படுகின்றன என்றும் பழனிசாமி வலியுறுத்தினார்.
