உலகளவில் கோடிக்கணக்கான பயனர்களால் பயன்படுத்தப்படும் இன்ஸ்டாகிராம், தனது பயனர்களின் அனுபவத்தை மேலும் மேம்படுத்தும் வகையில் புதிய அப்டேட்டை அறிமுகப்படுத்தியுள்ளது. இதன் மூலம், இனி பயனர்கள் வெறும் டெக்ஸ்ட் மெசேஜ்கள் மட்டுமல்லாமல், புகைப்படங்களை பயன்படுத்தியும் ரிப்ளை செய்ய முடியும்.
சமூக வலைத்தள பயன்பாடு தொடர்ந்து அதிகரித்து வரும் நிலையில், பயனர்களை தக்கவைத்துக் கொள்ளவும், புதிய அனுபவங்களை வழங்கவும் மெட்டா நிறுவனத்துக்குச் சொந்தமான இன்ஸ்டாகிராம் அடிக்கடி புதிய அம்சங்களை அறிமுகப்படுத்தி வருகிறது. குறிப்பாக ரீல்ஸ், நோட்ஸ், பிராட்காஸ்ட் சேனல்கள், AI அம்சங்கள் உள்ளிட்ட பல புதுமைகள் கடந்த சில ஆண்டுகளில் பெரும் வரவேற்பைப் பெற்றுள்ளன.
இந்த நிலையில், இன்ஸ்டாகிராம் டைரக்ட் மெசேஜ் (DM) வசதியில் புதிய மாற்றம் கொண்டுவரப்பட்டுள்ளது. இதுவரை பயனர்கள் ஒரு செய்திக்கு டெக்ஸ்ட், எமோஜி, GIF அல்லது ஸ்டிக்கர்கள் மூலம் மட்டுமே பதிலளிக்க முடிந்தது. தற்போது அதனுடன் புகைப்பட ரிப்ளை வசதியும் சேர்க்கப்பட்டுள்ளது.
புதிய அப்டேட்டின் மூலம், நண்பர் அல்லது பின்தொடர்பவரிடமிருந்து வரும் மெசேஜ்களுக்கு உடனடியாக புகைப்படம் எடுத்து பதிலளிக்கலாம். கேமரா ஐகானை தேர்வு செய்து புகைப்படத்தை எடுத்தவுடன், அதனை நேரடியாக குறிப்பிட்ட மெசேஜிற்கு பதிலாக அனுப்ப முடியும். இது உரையாடல்களை மேலும் சுவாரஸ்யமாகவும், தனிப்பட்டதாகவும் மாற்றும் என நிறுவனம் தெரிவித்துள்ளது.
இந்த வசதி குறிப்பாக இளைஞர்கள் மற்றும் அதிகமாக டைரக்ட் மெசேஜ் பயன்படுத்தும் பயனர்களுக்கு பயனுள்ளதாக இருக்கும் என கருதப்படுகிறது. நண்பர்களுடன் நடைபெறும் தினசரி உரையாடல்களில், டெக்ஸ்டை விட புகைப்படங்கள் மூலம் உணர்வுகளை வெளிப்படுத்துவது எளிதாக இருக்கும் என்பதால் இந்த அம்சம் அதிக வரவேற்பைப் பெறும் என்று எதிர்பார்க்கப்படுகிறது.
இந்தியாவில் மட்டும் சுமார் 45 கோடி பயனர்களைக் கொண்டுள்ள இன்ஸ்டாகிராம், டிக்-டாக் தடை செய்யப்பட்ட பிறகு தனது ரீல்ஸ் அம்சத்தின் மூலம் மிகப்பெரிய வளர்ச்சியை கண்டது. அதன் பின்னர் பயனர்களை தளத்தில் அதிக நேரம் ஈடுபடுத்த பல்வேறு அப்டேட்களை தொடர்ந்து வெளியிட்டு வருகிறது.
தற்போது வெளியிடப்பட்டுள்ள இந்த புகைப்பட ரிப்ளை வசதி, கட்டம் கட்டமாக உலகளாவிய பயனர்களுக்கு வழங்கப்பட்டு வருகிறது. சில பயனர்களுக்கு ஏற்கனவே இந்த வசதி கிடைத்துள்ள நிலையில், மற்ற பயனர்களுக்கும் விரைவில் கிடைக்கும் என எதிர்பார்க்கப்படுகிறது.
இன்ஸ்டாகிராம் தனது போட்டியாளர்களான ஸ்னாப்சாட் மற்றும் டிக்டாக் தளங்களுடன் போட்டியிடும் வகையில் தொடர்ந்து புதிய அம்சங்களை அறிமுகப்படுத்தி வரும் நிலையில், இந்த புதிய அப்டேட்டும் பயனர்களிடையே அதிக வரவேற்பைப் பெறும் என தொழில்நுட்ப வல்லுநர்கள் கருத்து தெரிவித்து வருகின்றனர்.
