டோக்கியோ:
வெனிசுலாவில் சக்திவாய்ந்த நிலநடுக்கங்கள் ஏற்பட்டதைத் தொடர்ந்து, ஜப்பானிலும் இன்று அதிகாலை நிலநடுக்கம் பதிவாகியுள்ளது. ரிக்டர் அளவுகோலில் 6.9 ஆக பதிவான இந்த நிலநடுக்கம் அந்நாட்டு மக்களிடையே தற்காலிக அச்சத்தை ஏற்படுத்திய நிலையில், சுனாமி அபாயம் எதுவும் இல்லை என்று ஜப்பான் வானிலை ஆய்வு மையம் அறிவித்துள்ளது.
ஜப்பானின் வடகிழக்கு பகுதியில் அமைந்துள்ள இவாத்தே மாகாணத்தின் வடக்குப் பகுதிக்கு அருகே இந்த நிலநடுக்கம் ஏற்பட்டதாக அதிகாரப்பூர்வ தகவல்கள் தெரிவிக்கின்றன. நிலநடுக்கத்தின் மையப்பகுதி பூமியின் மேற்பரப்பில் இருந்து சுமார் 50 கிலோமீட்டர் ஆழத்தில் இருந்ததாகவும் கூறப்பட்டுள்ளது.
நிலநடுக்கம் ஏற்பட்டவுடன் பல பகுதிகளில் கட்டிடங்கள் லேசாக அதிர்ந்ததாக பொதுமக்கள் தெரிவித்தனர். இருப்பினும், உயிரிழப்பு அல்லது பெரிய அளவிலான சேதம் ஏற்பட்டதாக உடனடி தகவல்கள் எதுவும் வெளியாகவில்லை. அந்நாட்டு பேரிடர் மேலாண்மை அமைப்புகள் மற்றும் உள்ளூர் நிர்வாகங்கள் தொடர்ந்து நிலைமையை கண்காணித்து வருகின்றன.
ஜப்பான் வானிலை ஆய்வு மையம் வெளியிட்ட அறிக்கையில், இந்த நிலநடுக்கத்தால் சுனாமி ஏற்படும் வாய்ப்பு இல்லை எனத் தெளிவுபடுத்தப்பட்டுள்ளது. இதனால் கடலோரப் பகுதிகளில் வசிக்கும் மக்களுக்கு பெரும் நிம்மதி ஏற்பட்டுள்ளது.
நிலநடுக்கத்தின் தாக்கத்தைத் தொடர்ந்து பாதுகாப்பு நடவடிக்கையாக சில ரயில் சேவைகள் தற்காலிகமாக நிறுத்தப்பட்டன. குறிப்பாக ஜப்பானின் முக்கிய அதிவேக ரயில் சேவையான தோஹோகு ஷின்கான்சென் சேவையின் சில பகுதிகள் ஆய்வுக்காக நிறுத்தப்பட்டதாக கிழக்கு ஜப்பான் ரயில்வே நிறுவனம் தெரிவித்துள்ளது.
பொது ஒளிபரப்பு நிறுவனமான NHK வெளியிட்ட காட்சிகளில், ஹச்சினோஹே உள்ளிட்ட நகரங்களில் போக்குவரத்து வழக்கம்போல இயங்கியது. சாலைகளில் எந்தவித பரபரப்பும் காணப்படவில்லை. பொதுமக்கள் அமைதியாக தங்களது அன்றாட பணிகளில் ஈடுபட்டிருந்தனர்.
உலகின் மிகவும் நில அதிர்வு ஏற்படும் நாடுகளில் ஜப்பான் முக்கிய இடம் வகிக்கிறது. பசிபிக் ‘ரிங் ஆஃப் ஃபயர்’ பகுதியில் அமைந்துள்ளதால், அந்நாட்டில் அடிக்கடி நிலநடுக்கங்கள் பதிவாகுகின்றன. உலகளவில் ரிக்டர் அளவுகோலில் 6 அல்லது அதற்கு மேல் பதிவாகும் நிலநடுக்கங்களில் சுமார் 20 சதவீதம் ஜப்பானில் ஏற்படுகின்றன என்பது குறிப்பிடத்தக்கது.
2011-ம் ஆண்டு ஜப்பானில் ஏற்பட்ட 9.0 ரிக்டர் அளவிலான பேரழிவு நிலநடுக்கமும் அதனைத் தொடர்ந்து ஏற்பட்ட சுனாமியும் ஆயிரக்கணக்கான உயிரிழப்புகளுக்கு காரணமானது. அதன்பிறகு பேரிடர் மேலாண்மை மற்றும் முன்னெச்சரிக்கை அமைப்புகளை ஜப்பான் அரசு மேலும் வலுப்படுத்தியுள்ளது.
தற்போதைய 6.9 ரிக்டர் அளவிலான நிலநடுக்கம் பெரிய பாதிப்புகளை ஏற்படுத்தாத நிலையில், மக்கள் எச்சரிக்கையுடன் இருக்குமாறு அதிகாரிகள் அறிவுறுத்தியுள்ளனர். தொடர்ந்து சிறிய அளவிலான பின்அதிர்வுகள் ஏற்படக்கூடும் என்பதால், நிலைமையை நெருக்கமாக கண்காணித்து வருவதாக ஜப்பான் வானிலை ஆய்வு மையம் தெரிவித்துள்ளது.
இந்நிலையில், சமீப நாட்களில் உலகின் பல பகுதிகளில் நிலநடுக்கங்கள் அதிகரித்து வருவது கவலைக்குரியதாக பார்க்கப்படுகிறது. வெனிசுலா, ஜப்பான் உள்ளிட்ட நாடுகளில் ஏற்பட்டுள்ள இந்த இயற்கை நிகழ்வுகள் உலகளவில் கவனத்தை ஈர்த்துள்ளன.
