தமிழ் சினிமாவின் முன்னணி நடிகராக மட்டுமின்றி, ஒரு தீவிர கார்பந்தய வீரராகவும் தனித்துவமான இடத்தைப் பிடித்துள்ளார் நடிகர் அஜித்குமார். திரைப்பட உலகில் தனது தனித்துவமான நடிப்பால் ரசிகர்களை கவர்ந்து வரும் அவர், கடந்த சில ஆண்டுகளாக மோட்டார் ஸ்போர்ட்ஸ் துறையிலும் அதே உற்சாகத்துடன் ஈடுபட்டு வருகிறார். கடந்த ஆண்டு முதல் கார் ரேஸிங்கில் அதிக கவனம் செலுத்தி வரும் அஜித், ‘அஜித்குமார் ரேஸிங்’ என்ற தனது சொந்த பந்தய அணியை உருவாக்கி, சர்வதேச அளவிலான பல போட்டிகளில் பங்கேற்று வருகிறார். துபாய், பெல்ஜியம் உள்ளிட்ட நாடுகளில் நடைபெற்ற கார் பந்தயங்களில் அவரது அணி கலந்து கொண்டு பல்வேறு சாதனைகளையும் பரிசுகளையும் பெற்றுள்ளது.
திரைப்படத் துறையில், ‘குட் பேட் அக்லி’ படத்திற்குப் பிறகு, இயக்குநர் ஆதிக் ரவிச்சந்திரன் இயக்கும் தனது 64வது படத்திற்கான பணிகளில் அஜித் ஈடுபட்டு வருகிறார். இதனிடையே, கார் பந்தயத்திற்கான அவரது ஆர்வமும் தொடர்ந்து அதிகரித்து வருகிறது. ஸ்பெயினில் நடைபெற்ற 24 மணி நேர கார் பந்தயத்தில் அஜித் 3வது இடத்தைப் பிடித்து சர்வதேச ரேஸிங் வட்டாரத்தில் கவனம் ஈர்த்தார். இதனைத் தொடர்ந்து, 2026ஆம் ஆண்டு அபுதாபியில் நடைபெறவுள்ள கார் பந்தயத்திலும் அவரது அணி பங்கேற்கத் தயாராகி வருகிறது.
மலேசியாவில் நடைபெற்ற ஏசியன் லீ மென்ஸ் சீரிஸ் தொடரிலும் அஜித் பங்கேற்றார். நரேன் கார்த்திகேயனுடன் இணைந்து இந்த தொடரில் போட்டியிட்ட அஜித், எல்.எம்.பி–3 வகை ரேஸ் காரை பயன்படுத்தினார். ஆனால், போட்டி தொடங்கிய மூன்றாவது நிமிடத்திலேயே அவரது காரில் ரேடியேட்டர் கோளாறு ஏற்பட்டது. இதனால் கார் திடீரென செயலிழந்து நின்றதால், அஜித்தால் போட்டியைத் தொடர முடியாத சூழல் உருவானது. சர்வதேச ரேஸிங் தரத்தில் இத்தகைய தொழில்நுட்ப கோளாறுகள் சாதாரணமானவை என்றாலும், ரசிகர்கள் மற்றும் அணியினருக்கு இது ஏமாற்றத்தை ஏற்படுத்தியது.
கார் பழுதடைந்த சம்பவம் குறித்து அஜித்திடம் கேட்கப்பட்டபோது, அவர் அமைதியாக பதிலளித்தார். “கவலைப்பட ஒன்றுமில்லை. கார் பந்தயத்தில் இதெல்லாம் ஒரு அங்கம் தான். சில நேரங்களில் இது மனதை தளரச் செய்யலாம். ஆனால் எப்போதும் இன்னொரு போட்டி இருக்கும்,” என்று அவர் கூறினார். அவரது இந்த பதில், ரேஸிங் உலகில் உள்ள அனுபவத்தையும், மன உறுதியையும் வெளிப்படுத்துகிறது.
