சென்னையில் இருந்து தென் மாவட்டங்களுக்குச் செல்லும் ஆம்னி பேருந்துகளை கிளாம்பாக்கம் பேருந்து முனையத்தில் இருந்துதான் இயக்க வேண்டும் என்ற மாநிலப் போக்குவரத்துத் துறையின் கட்டாய உத்தரவை ரத்து செய்து சென்னை உயர் நீதிமன்றம் இன்று அதிரடித் தீர்ப்பு வழங்கியுள்ளது.
சென்னையிலிருந்து தென் மாவட்டங்களுக்குச் செல்லும் அனைத்து தனியார் ஆம்னி பேருந்துகளும் கிளாம்பாக்கம் பேருந்து முனையத்திலிருந்து தான் இயக்கப்பட வேண்டும் என்றும், அவை சென்னை நகருக்குள் நுழைந்து பயணிகளை ஏற்றி, இறக்கக் கூடாது என்றும், இந்த விதிமுறைகளை மீறும் பேருந்துகள் மீது கடுமையான சட்ட நடவடிக்கை எடுக்கப்படும் என்றும் கடந்த இரண்டாயிரத்து இருபத்தி நான்காம் ஆண்டு ஜனவரி மாதம் இருபத்தி இரண்டாம் தேதி மாநில போக்குவரத்துத் துறை ஆணையம் ஒரு முக்கிய உத்தரவைப் பிறப்பித்திருந்தது.
அரசின் இந்த அதிரடி உத்தரவினால் தங்களுக்குப் பெரும் நஷ்டம் ஏற்படுவதாகவும், பொதுமக்கள் கடுமையாகப் பாதிக்கப்படுவதாகவும் கூறி தனியார் பேருந்து நிறுவனங்கள் சார்பிலும், ஆம்னி பேருந்து உரிமையாளர்கள் சங்கம் சார்பிலும் சென்னை உயர் நீதிமன்றத்தில் தொடர் வழக்குகள் தாக்கல் செய்யப்பட்டன. இந்த வழக்குகளை ஆரம்பக் கட்டத்தில் விசாரித்த சென்னை உயர் நீதிமன்றம், இடைக்கால ஏற்பாடாக போரூர் மற்றும் சூரப்பட்டு ஆகிய இடங்களில் பயணிகளை ஏற்றி, இறக்க ஆம்னி பேருந்துகளுக்குத் தற்காலிக அனுமதியளித்தது. அதே நேரத்தில் தென் மாவட்டங்களுக்குச் செல்லும் அனைத்துப் பேருந்துகளும் கிளாம்பாக்கம் பேருந்து முனையத்துக்குள் கட்டாயம் சென்று வர வேண்டும் என்றும் இடைக்கால உத்தரவைப் பிறப்பித்திருந்தது.
இந்த நிலையில், இந்த வழக்கின் இறுதி விசாரணை சென்னை உயர் நீதிமன்றத்தில் நீதிபதி வி.லட்சுமி நாராயணன் முன்னிலையில் நடைபெற்றது. வழக்கை முழுமையாக விசாரித்த நீதிபதி, தமிழ்நாடு மோட்டார் வாகன சட்ட விதிகளின்படி, ஒரு புதிய பேருந்து முனையம் அமைப்பதற்கு மாநில போக்குவரத்து ஆணையத்தின் ஒப்புதலைக் கோரி சென்னை பெருநகர வளர்ச்சி குழுமம் நேரடியாக விண்ணப்பிக்க சட்டத்தில் இடமில்லை என்று சுட்டிக்காட்டினார். சம்பந்தப்பட்ட உள்ளாட்சி அமைப்பு மட்டும்தான் இதற்கு விண்ணப்பிக்க முடியும் என்பதால், கிளாம்பாக்கம் பேருந்து முனையத்துக்கான முறையான ஒப்புதலைக் கோரி காட்டாங்குளத்தூர் ஊராட்சி ஒன்றியம், மாநில போக்குவரத்து ஆணையத்துக்கு விண்ணப்பிக்கலாம் என்று தனது தீர்ப்பில் உத்தரவிட்டார்.
மேலும், ஒரு குறிப்பிட்ட வழித்தடத்தில் பேருந்துகளை இயக்குவதற்காக அரசு ஏற்கனவே உரிய உரிமம் வழங்கிய நிலையில், நிர்வாகக் காரணங்களைச் சொல்லி அதனைத் தடுக்க முடியாது என்று நீதிபதி திட்டவட்டமாகக் கூறினார். எனவே, தனியார் ஆம்னி பேருந்துகள் அனைத்தும் கிளாம்பாக்கத்தில் இருந்து தான் இயக்கப்பட வேண்டும் என மாநில போக்குவரத்து ஆணையம் பிறப்பித்த கட்டாய உத்தரவை முழுமையாக ரத்து செய்வதாக நீதிபதி தனது இறுதித் தீர்ப்பில் அறிவித்தார்.
அத்துடன், கடந்த ஜனவரி மாதம் போக்குவரத்துத் துறை அதிகாரிகளுக்கும், ஆம்னி பேருந்து உரிமையாளர்களுக்கும் இடையே நடைபெற்ற பேச்சுவார்த்தை முடிவுகளையும் நீதிபதி நினைவு கூர்ந்தார். அதன்படி, போரூர் சுங்கச்சாவடி அல்லது சூரப்பேடு ஆகிய இடங்களில் பயணிகளை ஏற்றி இறக்குவதைப் போல, வட சென்னை மக்களின் வசதிக்காக மாதவரம் வட்டச்சாலை அருகில் உள்ள இடத்தையும் தனியார் பேருந்துகள் தங்களின் பயணிகளை ஏற்றி, இறக்கப் பயன்படுத்திக் கொள்ளலாம் என்று இருதரப்பும் எடுத்த முடிவை இனிவரும் நாட்களிலும் கண்டிப்புடன் பின்பற்ற வேண்டும் என்றும் உயர் நீதிமன்ற நீதிபதி தனது உத்தரவில் தெளிவாகக் குறிப்பிட்டுள்ளார். உயர் நீதிமன்றத்தின் இந்த அதிரடித் தீர்ப்பு ஆம்னி பேருந்து உரிமையாளர்களுக்கும், சென்னை வாழ் பொதுமக்களுக்கும் பெரும் நிம்மதியை அளித்துள்ளது.
