தமிழகத்தை உலுக்கிய கோர சம்பவங்கள்: ஒரே நாளில் ஐந்து சிறுமிகளுக்கு நேர்ந்த கொடூரம் – மக்கள் கொந்தளிப்பு
தமிழகம் முழுவதும் ஒரே நாளில் ஐந்து இடங்களில் சிறுமிகளுக்கு எதிராக அரங்கேறியுள்ள பாலியல் வன்கொடுமை சம்பவங்கள், மாநிலத்தின் சட்டம் ஒழுங்கு மற்றும் பெண் குழந்தைகளின் பாதுகாப்பு குறித்த அச்சத்தையும், ஆத்திரத்தையும் பொதுமக்களிடையே உருவாக்கியுள்ளன. கும்மிடிப்பூண்டி, திருவள்ளூர், தாம்பரம், பூந்தமல்லி மற்றும் சென்னை ஆகிய பகுதிகளில் நிகழ்ந்த இந்தக் கொடூரங்கள், குழந்தைகள் பாதுகாப்பு அமைப்புகளின் செயல்பாட்டை மிகக்கடுமையாகக் கேள்விக்குறியாக்கியுள்ளன.
இந்தத் தொடர் சம்பவங்களில் மிக மோசமானதும், இதயத்தை உலுக்கக்கூடியதுமான சம்பவம் கும்மிடிப்பூண்டியில் நிகழ்ந்துள்ளது. அங்கு மூன்று வயது பெண் குழந்தை ஒன்று காணாமல் போனதாகப் பெற்றோர் புகார் அளித்திருந்த நிலையில், தீவிர தேடுதலுக்குப் பிறகு அக்குழந்தையின் சடலம் கண்டெடுக்கப்பட்டது. முதற்கட்ட விசாரணையில், குழந்தை பாலியல் வன்கொடுமைக்கு உள்ளாக்கப்பட்டு, பின்னர் கொடூரமாகக் கொலை செய்யப்பட்டது உறுதியானது. மூன்று வயதுக் குழந்தைக்கு இழைக்கப்பட்ட இந்த அநீதி சமூக வலைதளங்களிலும், பொதுவெளியிலும் பெரும் கொந்தளிப்பை ஏற்படுத்தியுள்ளது. குற்றவாளிக்கு மரண தண்டனை வழங்க வேண்டும் என்று பொதுமக்கள் ஆவேசத்துடன் வலியுறுத்தி வருகின்றனர்.
இந்த சோகம் மறைவதற்குள், புறநகர் மற்றும் மாநகரப் பகுதிகளில் அடுத்தடுத்த அதிர்ச்சித் தகவல்கள் வெளியாகின. திருவள்ளூரில் ஏழு வயது சிறுமி, தாம்பரத்தில் பத்து வயது சிறுமி, பூந்தமல்லியில் ஏழு வயது சிறுமி மற்றும் தலைநகர் சென்னையில் பன்னிரண்டு வயது பள்ளிச் சிறுமி என அடுத்தடுத்து ஐந்து சிறுமிகள் பாலியல் அத்துமீறல்களுக்கு உள்ளானது தமிழகத்தையே அதிர்ச்சியில் ஆழ்த்தியுள்ளது. இச்சம்பவங்களில் பாதிக்கப்பட்ட சிறுமிகள் மருத்துவமனைகளில் சிகிச்சை பெற்று வருகின்றனர். அவர்களுக்குத் தேவையான மனநல ஆலோசனைகளை வழங்கக் குழந்தைகள் நலக் குழுவினர் களமிறக்கப்பட்டுள்ளனர்.
தமிழகக் காவல்துறை அனைத்து வழக்குகளிலும் உடனடி நடவடிக்கையாகக் குற்றவாளிகளைக் கைது செய்துள்ளதாகத் தெரிவித்துள்ளன. இச்சம்பவங்கள் அனைத்தும் குழந்தைகள் மீதான பாலியல் வன்கொடுமை தடுப்புச் சட்டத்தின் கீழ் வழக்குப் பதிவு செய்யப்பட்டுள்ளன. இருப்பினும், கைது நடவடிக்கைகள் மட்டும் போதாது என்ற கருத்து பரவலாக எழுந்துள்ளது. குறிப்பாக, ‘சிங்கப்பெண்’ காவல் படை குறித்து பொதுமக்கள் கடுமையாக விமர்சித்து வருகின்றனர். காவல்துறையினர் சமூக வலைதளங்களில் குறுகிய கால வீடியோக்களைப் (ரீல்ஸ்) பதிவு செய்வதிலும், காட்சிப்படுத்துவதிலும் காட்டும் கவனத்தை, களத்தில் பெண்களின் பாதுகாப்பை உறுதி செய்வதில் காட்டவில்லை என்ற குற்றச்சாட்டு வலுத்துள்ளது.
இந்த ஐந்து வழக்குகளும் பதிவான விதம், குழந்தைகள் பாதுகாப்பு குறித்துப் பெற்றோர்கள் மத்தியில் பெரும் அச்சத்தை விதைத்துள்ளது. சமூக ஆர்வலர்கள் கூறுகையில், “குற்றவாளிகளைக் கைது செய்வது மட்டும் தீர்வல்ல; இத்தகைய சம்பவங்கள் மீண்டும் நடக்காமல் தடுப்பதற்கான பாதுகாப்புக் கட்டமைப்பை அரசு வலுப்படுத்த வேண்டும்” என்று வலியுறுத்துகின்றனர். குற்றவாளிகளுக்கு விரைவு நீதிமன்றங்கள் மூலம் கடுமையான தண்டனை வழங்கி, நீதியை நிலைநாட்ட வேண்டும் என்பதுதான் ஒட்டுமொத்த தமிழக மக்களின் ஒற்றைக் கோரிக்கையாக உள்ளது. சிறுமிகளின் பாதுகாப்பை உறுதி செய்யத் தேவையான முன்னெச்சரிக்கை நடவடிக்கைகளை அரசு போர்க்கால அடிப்படையில் மேற்கொள்ள வேண்டும் என்பதே சமூகத்தின் எதிர்பார்ப்பாகும்.
