தேர்தல் பிரச்சாரம் ஓய்ந்தது... தொகுதிகளில் இருந்து வெளி ஆட்கள் வெளியேற உத்தரவு
சென்னை:
தமிழக சட்டப்பேரவை தேர்தலை முன்னிட்டு நடைபெற்ற தேர்தல் பிரச்சாரம் இன்று மாலை 6 மணியுடன் நிறைவடைந்தது. இதையடுத்து, தொகுதிக்கு தொடர்பில்லாத வெளி ஆட்கள் அனைவரும் உடனடியாக வெளியேற வேண்டும் என தேர்தல் ஆணையம் உத்தரவிட்டுள்ளது.
தமிழகத்தில் 234 தொகுதிகளுக்கும் ஒரே கட்டமாக ஏப்ரல் 23 அன்று வாக்குப்பதிவு நடைபெற உள்ளது. இதற்காக கடந்த மார்ச் 15ஆம் தேதி தேர்தல் அறிவிப்பு வெளியிடப்பட்டதுடன், நடத்தை விதிமுறைகளும் அமலுக்கு வந்தன.
மாநிலம் முழுவதும் பறக்கும் படை, நிலைக் கண்காணிப்பு குழுக்கள் தீவிர சோதனையில் ஈடுபட்டு வருகின்றன. இதுவரை ரூ.1,213 கோடி மதிப்பிலான ரொக்கம் மற்றும் பொருட்கள் பறிமுதல் செய்யப்பட்டுள்ளதாக தெரிவிக்கப்பட்டுள்ளது.
மொத்தம் 4,023 வேட்பாளர்கள் களத்தில் உள்ளனர். 5.73 கோடி வாக்காளர்கள் வாக்களிக்க தகுதி பெற்றுள்ளனர். 75,064 வாக்குச்சாவடிகள் தயார் நிலையில் உள்ளன. குடிநீர், கழிவறை, மாற்றுத்திறனாளிகளுக்கான வசதிகள் உள்ளிட்ட அடிப்படை வசதிகளும் செய்யப்பட்டுள்ளன.
48 மணி நேர அமைதி காலம் அமல்
இன்று மாலை 6 மணி முதல், வாக்குப்பதிவு நாளான ஏப்ரல் 23 மாலை 6 மணி வரை 48 மணி நேர அமைதி காலம் அமலுக்கு வந்துள்ளது.
இந்த காலத்தில்:
- பொதுக்கூட்டம், ஊர்வலம் நடத்தக்கூடாது
- தேர்தல் பிரசாரம் செய்யக்கூடாது
- டிவி, ரேடியோ, இணையம், வாட்ஸ்அப், முகநூல் உள்ளிட்ட எந்த தளத்திலும் வாக்கு கேட்கக்கூடாது
- மீறினால் 2 ஆண்டு சிறை / அபராதம் / இரண்டும் விதிக்கப்படும்
வெளி ஆட்கள் வெளியேற வேண்டும்
தொகுதிக்கு வெளியே இருந்து அழைத்து வரப்பட்ட அரசியல் கட்சி நிர்வாகிகள், பணியாளர்கள் மற்றும் வாக்காளர் அல்லாத அனைவரும் இன்று மாலை 6 மணிக்குள் தொகுதியை விட்டு வெளியேற வேண்டும் என உத்தரவு பிறப்பிக்கப்பட்டுள்ளது.
டாஸ்மாக் கடைகள் மூடல்
இன்று காலை 10 மணி முதல் ஏப்ரல் 23 நள்ளிரவு 12 மணி வரை டாஸ்மாக் கடைகள் மற்றும் பார்கள் மூடப்பட்டுள்ளன.
