திருவண்ணாமலை:
திருவண்ணாமலை மாவட்டத்தில் விமான நிலையம் அமைக்க வேண்டும் என்ற கோரிக்கை, சட்டப்பேரவையில் முக்கிய விவாதமாக மாறியுள்ளது. இந்த கோரிக்கையை சட்டப்பேரவை துணைத்தலைவர் கு. பிச்சாண்டி முன்வைத்துள்ளார்.
தமிழக சட்டப்பேரவையின் நான்காவது நாள் கூட்டத் தொடர் இன்று நடைபெற்றது. கேள்வி நேரத்தில் உறுப்பினர்கள் எழுப்பிய பல கேள்விகளுக்கு சம்பந்தப்பட்ட துறை அமைச்சர்கள் பதிலளித்தனர். அந்த நேரத்தில், கு. பிச்சாண்டி “திருவண்ணாமலைக்கு தினமும் ஆயிரக்கணக்கான பக்தர்கள் வருகை தருகின்றனர். எனவே, மத்திய அரசின் உதான் (UDAN) திட்டத்தின் கீழ் ஒரு விமான நிலையம் அமைக்கப்பட வேண்டும். மேலும் கீழ்பெண்ணாத்தூர் தொகுதியில் புதிய போக்குவரத்து பணிமனை உருவாக்க வேண்டும்” எனக் கோரிக்கை விடுத்தார்.
இதற்கு பதிலளித்த போக்குவரத்து துறை அமைச்சர் சிவசங்கர், “தேவையான நிதி ஆதாரம் ஏற்பாடு செய்யப்பட்டால் கீழ்பெண்ணாத்தூர் பகுதியில் பணிமனை அமைப்போம். திருவண்ணாமலை விமான நிலையம் அமைப்பது தற்போது சிக்கலான விடயம் போல இருக்கிறது. இதுகுறித்து முதல்வருடன் ஆலோசித்து உரிய முடிவு எடுக்கப்படும்” எனத் தெரிவித்தார்.
கு. பிச்சாண்டி முன்வைத்த கோரிக்கை, தமிழக மக்களிடையே பெரும் கவனத்தை ஈர்த்துள்ளது. காரணம், திருவண்ணாமலை விமான நிலையம் வந்தால், அந்த மாவட்டம் வர்த்தகம், முதலீடு, சுற்றுலா, வேலைவாய்ப்பு போன்ற பல துறைகளில் முன்னேற்றம் காணும் என்பதில் சந்தேகமில்லை.
திருவண்ணாமலை உலகப்புகழ் பெற்ற ஆன்மிகத் தலம். தினமும் ஆயிரக்கணக்கான பக்தர்கள், சுற்றுலாப் பயணிகள் இங்கு வருகை தருகின்றனர். விமான நிலையம் அமைந்தால், சென்னை, பெங்களூரு உள்ளிட்ட பெரிய நகரங்களிலிருந்து நேரடி விமான சேவை கிடைக்கும். இதனால் சாலைப் பயண சிரமம் குறையும். கோயில்கள், சுற்றுலா தலங்கள் வழியாக வருமானமும், சுற்றுப்புற மக்கள் வாழ்வாதாரமும் உயர்வதற்கும் வாய்ப்பு உருவாகும்.
ஆனால், இத்திட்டம் நடைமுறைக்கு வர மத்திய அரசின் சிவில் விமான போக்குவரத்து துறை மற்றும் பாதுகாப்பு அமைச்சகம் ஆகியவற்றின் அனுமதி அவசியம். ஓசூரில் விமான நிலையம் அமைக்கும் திட்டம் இதே காரணத்தால் தாமதமடைந்ததை கருத்தில் கொண்டால், திருவண்ணாமலை ஏர்போர்ட் திட்டமும் எளிதில் நிறைவேறும் என சொல்ல முடியாது.
இருப்பினும், திருவண்ணாமலை ஆன்மிக முக்கியத்துவம் வாய்ந்த நகரம் என்பதாலும், மத்திய அரசு இதனை சுற்றுலா மற்றும் மதப் பயணத்திற்கான முக்கிய மையமாக கருதி அனுமதி வழங்கும் வாய்ப்பும் உண்டு.
ஏற்கனவே 2021ஆம் ஆண்டில், அப்போதைய எம்.பி. அண்ணாதுரை திருவண்ணாமலை விமான நிலையம் குறித்து மத்திய அமைச்சருக்கு கடிதம் எழுதியிருந்தார். அதற்கு பதிலளித்த சிவில் விமான போக்குவரத்து துறை அமைச்சர் ஹர்தீப் சிங் புரி, “சிறிய நகரங்களிலும் விமான நிலையம் அமைப்பது குறித்து மத்திய அரசு பரிசீலிக்கிறது; அதில் திருவண்ணாமலைக்கும் வாய்ப்பு உள்ளது” எனக் குறிப்பிட்டிருந்தார்.
வனப்பகுதி, நிலப்பரப்பு, சுற்றுச்சூழல் பாதிப்பு போன்ற அம்சங்களும் திட்டத்தை வடிவமைக்கும் போது கவனிக்கப்பட வேண்டும். அதேசமயம், மக்களின் எதிர்பார்ப்பை கருத்தில் கொண்டு அரசு தீவிரமாக ஆலோசனை மேற்கொண்டு வருகிறது.
திருவண்ணாமலைக்கு விமான நிலையம் அமைப்பது சாத்தியமா என்ற கேள்விக்கு இறுதி பதில் இன்னும் வரவில்லை. எனினும், சட்டப்பேரவையில் கு. பிச்சாண்டி முன்வைத்த கோரிக்கை, மக்களிடையே நம்பிக்கையும் எதிர்பார்ப்பும் தூண்டியுள்ளது.
இப்போது கேள்வி ஒன்றே — முதல்வருடன் ஆலோசித்த பிறகு அரசு இதுகுறித்து அதிகாரப்பூர்வ அறிவிப்பு வெளியிடுமா?
பொறுத்திருந்து பார்க்க வேண்டியிருக்கிறது!
