சென்னை:
செமஸ்டர் தேர்வு முடிவுகள் வெளியான 180 நாட்களுக்குள் பட்டப்படிப்பு சான்றிதழ்களை வழங்காத உயர்கல்வி நிறுவனங்களின் மீது கடுமையான நடவடிக்கை எடுக்கப்படும் என்று பல்கலைக்கழக மானியக்குழு (UGC) சுட்டிக்காட்டியுள்ளது.
நாடு முழுவதும் பல உயர்கல்வி நிறுவனங்களில் செமஸ்டர் தேர்வுகள் நேரத்திற்கு நடத்தப்படாமல், தேர்வு முடிந்ததிலிருந்து நீண்ட காலத்திற்குப் பின்னரும் பட்டப்படிப்பு சான்றிதழ்கள் வழங்கப்படாமல் இருப்பதாக பல புகார்கள் கிடைத்துள்ளதாக யு.ஜி.சி. கூறியுள்ளது.
இந்த தாமதம் மாணவர்கள் வேலைவாய்ப்பு பெறுவதிலும், உயர்கல்வி தொடருவதிலும் பெரிய தடையாக மாறிவருவதாகவும் குறிப்பிடப்பட்டுள்ளது.
இந்நிலையில், யு.ஜி.சி செயலர் மணீஷ் ஆர். ஜோஷி அனைத்து பல்கலைக்கழகங்களுக்கும், உயர்கல்வி நிறுவனங்களுக்கும் அனுப்பிய அறிவிப்பில், பின்வருவன வலியுறுத்தப்பட்டுள்ளன:
மாணவர்கள் அனைத்து கல்வி தகுதிகளையும் பூர்த்தி செய்த 180 நாட்களுக்குள் அவர்களுக்கு பட்டப்படிப்பு சான்றிதழ்களை வழங்குவது கட்டாயம்.
செமஸ்டர் தேர்வுகள் நிர்ணயிக்கப்பட்ட கால அட்டவணைக்குள் நடத்தப்பட்டு, முடிவுகளும் தாமதமின்றி வெளியிடப்பட வேண்டும்.
இந்த விதிகளை மீறி செயல்படும் நிறுவனங்களுக்கு யு.ஜி.சி. நேரடி நடவடிக்கை எடுக்கப்படும்.
மாணவர்களின் கல்வி மற்றும் தொழில் வாய்ப்புகளை பாதிக்கும் வகையில் சான்றிதழ் விநியோகத்தில் தாமதம் ஏற்படக் கூடாது.
அனைத்துப் பல்கலைகளும் மற்றும் உயர்கல்வி நிறுவனங்களும் இந்த வழிகாட்டுதல்களை கடைப்பிடிக்க வேண்டும் என்று யு.ஜி.சி. தெரிவித்துள்ளது.
