சர்வதேச தொழிலாளர் தினம் இன்று உலகம் முழுவதும் கொண்டாடப்பட்டு வரும் நிலையில், தமிழக வெற்றிக் கழக தலைவர் விஜய் தொழிலாளர்களுக்கு மனமார்ந்த வாழ்த்து தெரிவித்துள்ளார். உழைப்பாளர்களின் உழைப்பையும், சமூக முன்னேற்றத்தில் அவர்களின் பங்களிப்பையும் போற்றும் விதமாக அவர் வெளியிட்டுள்ள செய்தி கவனம் ஈர்த்துள்ளது.
ஒவ்வொரு ஆண்டும் மே 1-ஆம் தேதி தொழிலாளர்களின் உரிமைகள், நலன் மற்றும் வேலை வாய்ப்புகளை முன்னிறுத்தும் நாளாக உலக தொழிலாளர் தினம் அனுசரிக்கப்படுகிறது. தொழிலாளர் வர்க்கத்தின் போராட்ட வரலாறையும், சாதனைகளையும் நினைவுகூரும் நாளாகவும் இது பார்க்கப்படுகிறது.
இந்த நிலையில் விஜய் வெளியிட்டுள்ள வாழ்த்து செய்தியில், “உழைப்பால் உயர்வோம் என்று இரவு பகலாக உழைத்து வரும் உழைப்பாளர்களுக்கான உரிமைகள் முழுமையாக அவர்களுக்குக் கிடைக்க, உழைப்பாளர்களின் வாழ்வாதாரம் மேலும் உயர உறுதியேற்போம். உழைக்கும் கரங்களைப் போற்றுவோம்! உழைப்பாளர் தின வாழ்த்துகள்” என்று குறிப்பிட்டுள்ளார்.
விஜயின் இந்த செய்தி சமூக வலைதளங்களில் வேகமாக பகிரப்பட்டு வருகிறது. தொழிலாளர்களின் வாழ்க்கைத் தரம் உயர வேண்டும், அவர்களின் உரிமைகள் பாதுகாக்கப்பட வேண்டும் என்ற கருத்தை அவர் வலியுறுத்தியுள்ளதாக ரசிகர்கள் பாராட்டி வருகின்றனர்.
