புதுடெல்லி:
சமூக வலைத்தளப் பயனர்கள் மத்தியில் இன்றைக்கு மிக முக்கியமான மற்றும் தவிர்க்க முடியாத தகவல் தொடர்புச் செயலியாக வாட்ஸ்அப் (WhatsApp) உருவெடுத்துள்ளது. நண்பர்கள் மற்றும் உறவினர்களுடன் அரட்டை அடிப்பது முதல், அலுவலக ரீதியான கோப்புகள் மற்றும் புகைப்படங்களைப் பகிர்வது வரை அனைத்துக்கும் வாட்ஸ்அப் பயன்படுத்தப்பட்டு வருகிறது. இந்தியாவில் மட்டும் வாட்ஸ்அப் பயன்படுத்துபவர்களின் எண்ணிக்கை 50 கோடியைக் கடந்துள்ளது.
தொடரும் புதிய அப்டேட்டுகள்:
பயனர்களைத் தொடர்ந்து ஈர்க்கவும், சந்தையில் நிலவும் போட்டியைச் சமாளிக்கவும் மெட்டா நிறுவனத்திற்குச் சொந்தமான வாட்ஸ்அப் அவ்வப்போது புதிய மற்றும் பயனுள்ள அம்சங்களை அறிமுகம் செய்து வருகிறது. அந்த வகையில், வாட்ஸ்அப்பில் ஸ்டேட்டஸ் வைப்பவர்களைக் மகிழ்ச்சிப்படுத்தும் வகையில் மற்றொரு புதிய வசதி விரைவில் அறிமுகமாக உள்ளது.
ஸ்டேட்டஸ் கேப்ஷனை எடிட் செய்யும் வசதி:
வாட்ஸ்அப்பில் போட்டோக்கள் அல்லது வீடியோக்களை ஸ்டேட்டஸாக (Status) வைக்கும்போது, அதனுடன் சேர்த்து எழுத்துக்களைக் குறிக்கும் தலைப்பு அல்லது கேப்ஷனை (Caption) பயனர்கள் பதிவிடுவது வழக்கம். பல நேரங்களில் ஸ்டேட்டஸ் வைத்த பிறகுதான், அதில் எழுத்துப்பிழைகள் இருப்பதையோ அல்லது வேறு தகவல்களைச் சேர்க்க விரும்புவதையோ பயனர்கள் கவனிக்க நேரிடும்.
இதுவரை அப்படிப்பட்ட நேரங்களில் ஸ்டேட்டஸை முழுவதும் நீக்கிவிட்டு, மீண்டும் புதிதாகப் பதிவேற்ற வேண்டிய கட்டாயம் இருந்தது. இந்தச் சிரமத்தைப் போக்கும் விதமாக, வாட்ஸ்அப் நிறுவனம் புதிய அப்டேட் ஒன்றை உருவாக்கி வருகிறது.
இதன்படி, ஸ்டேட்டஸ் பதிவிட்ட பிறகு, அதன் கேப்ஷனை 15 நிமிடங்களுக்குள் திருத்திக் கொள்ளும் (Edit) புதிய வசதி தற்போது ஆண்ட்ராய்டு பீட்டா (Android Beta) பயனர்களுக்காகச் சோதனை செய்யப்பட்டு வருகிறது. இந்தச் சோதனை வெற்றிகரமாக முடிந்தவுடன், விரைவில் உலகளவில் உள்ள அனைத்து வாட்ஸ்அப் பயனர்களுக்கும் இந்த அம்சம் அதிகாரப்பூர்வமாக அறிமுகப்படுத்தப்படும் என எதிர்பார்க்கப்படுகிறது. இந்த புதிய வசதி வாடிக்கையாளர்கள் மத்தியில் மிகுந்த வரவேற்பைப் பெற்றுள்ளது.
