சென்னை: தேசிய ஜனநாயக கூட்டணியின் தேர்தல் பிரசார பொதுக்கூட்டம் செங்கல்பட்டு மாவட்டம் மதுராந்தகத்தில் வரும் ஜனவரி 23 ஆம் தேதி நடைபெற உள்ளது. இந்த பொதுக்கூட்டத்தில் பிரதமர் நரேந்திர மோடி பங்கேற்க உள்ளார். இதனை முன்னிட்டு, தமிழகத்தில் பாதுகாப்பு பணிகள் தீவிரப்படுத்தப்பட்டுள்ளன.
பிரதமர் மோடியின் பயண திட்டம் தற்போது அதிகாரப்பூர்வமாக வெளியிடப்பட்டுள்ளது. அதன்படி, அவர் திருவனந்தபுரத்திலிருந்து ஜனவரி 21 ஆம் தேதி மதியம் 2.15 மணிக்கு சென்னை வருகிறார். அங்கிருந்து ஹெலிகாப்டர் மூலம் புறப்பட்டு மதியம் 2.50 மணிக்கு செங்கல்பட்டு மாவட்டம் மதுராந்தகம் வந்தடைகிறார்.
மதியம் 3 மணி முதல் 4.15 மணி வரை நடைபெறும் பொதுக்கூட்டத்தில் பிரதமர் மோடி பங்கேற்று, தேசிய ஜனநாயக கூட்டணியின் சார்பில் தேர்தல் பிரசார உரையாற்ற உள்ளார். கூட்டத்தில் கூட்டணிக் கட்சிகளின் முக்கிய தலைவர்கள், மாநில நிர்வாகிகள், ஆயிரக்கணக்கான மக்கள் பங்கேற்பார்கள் என எதிர்பார்க்கப்படுகிறது.
பிரதமர் மோடியின் வருகையை முன்னிட்டு, செங்கல்பட்டு மாவட்டம் முழுவதும் பாதுகாப்பு ஏற்பாடுகள் பலப்படுத்தப்பட்டுள்ளன. போலீசார், மத்திய பாதுகாப்பு படையினர், சிறப்பு பிரிவுகள் ஆகியோர் இணைந்து பாதுகாப்பு பணிகளை மேற்கொண்டு வருகின்றனர். பொதுக்கூட்டம் நடைபெறும் இடம் மற்றும் சுற்றுப்புறங்களில் 5 அடுக்கு பாதுகாப்பு ஏற்பாடுகள் செய்யப்பட்டுள்ளன. கூட்டத்தில் பங்கேற்கும் மக்களுக்கு சோதனைச் சாவடிகள் அமைக்கப்பட்டுள்ளன.
பிரதமர் மோடி தனது உரையில், தேசிய ஜனநாயக கூட்டணியின் தேர்தல் வாக்குறுதிகள், வளர்ச்சி திட்டங்கள், தமிழகத்தில் மேற்கொள்ளப்பட்ட மத்திய அரசின் திட்டங்கள் குறித்து பேசுவார் என எதிர்பார்க்கப்படுகிறது. மேலும், தமிழக அரசியல் சூழ்நிலையை முன்னிட்டு, கூட்டணியின் வலிமையை வலியுறுத்தும் வகையில் உரையாற்றுவார் என கூட்டணித் தரப்பினர் தெரிவித்துள்ளனர்.
பொதுக்கூட்டம் முடிந்ததும், பிரதமர் மோடி மாலை 5 மணிக்கு சென்னையில் இருந்து தனி விமானம் மூலம் டெல்லி புறப்படுகிறார். அவரது பயணத்திற்கான அனைத்து ஏற்பாடுகளும் தீவிரமாக நடைபெற்று வருகின்றன.
இந்த பொதுக்கூட்டம், தமிழகத்தில் நடைபெறவுள்ள தேர்தலுக்கான முக்கியமான நிகழ்வாகக் கருதப்படுகிறது. பிரதமர் மோடியின் வருகை, கூட்டணியின் பிரசாரத்திற்கு ஊக்கமளிக்கும் வகையில் இருக்கும் என கூட்டணித் தரப்பினர் நம்பிக்கை தெரிவித்துள்ளனர்.
