சேலம்:
தமிழக வெற்றிக் கழகத்தின் (த.வெ.க.) நிர்வாகிகள் கூட்டம் நாளை (பிப்ரவரி 13) சேலத்தில் நடைபெற உள்ளது. இந்த முக்கிய கூட்டத்தில் த.வெ.க. தலைவர் விஜய் நேரில் பங்கேற்கவுள்ளதாக கட்சித் தரப்பில் அறிவிக்கப்பட்டுள்ளது.
இந்த கூட்டம் சேலம் சீலநாயக்கன்பட்டி KVP கார்டன் வளாகத்தில் நாளை மதியம் 12 மணி முதல் 3 மணி வரை நடைபெறும் எனத் தெரிவிக்கப்பட்டுள்ளது. இதில் த.வெ.க. நிர்வாகிகள் மற்றும் மாவட்டத் தலைவர்கள் பங்கேற்கவுள்ளனர்.
இந்நிலையில், கூட்டத்தில் பங்கேற்பதற்கான அனுமதி கடுமையாக கட்டுப்படுத்தப்பட்டுள்ளது. த.வெ.க. பொதுச்செயலாளர் என். ஆனந்த் வெளியிட்டுள்ள அறிக்கையில், “மக்கள் விரும்பும் முதல்-அமைச்சர் வேட்பாளர் மற்றும் தமிழக வெற்றிக் கழகத் தலைவர் விஜய் கலந்துகொள்ளும் இந்த நிர்வாகிகள் கூட்டம், காவல் துறை வழிகாட்டு நெறிமுறைகளின்படி அனுமதி பெற்றவர்களுக்கான நிகழ்ச்சியாக மட்டுமே நடைபெறும்,” எனத் தெரிவித்துள்ளார்.
அவர் மேலும் கூறியதாவது, “இந்த கூட்டத்தில் பங்கேற்க QR குறியீட்டுடன் கூடிய நுழைவுச்சீட்டு அளிக்கப்பட்டுள்ள 4,998 பேருக்கு மட்டுமே அனுமதி வழங்கப்படும். இதற்குப் பிறகு எந்தப் பொதுமக்களுக்கும், அல்லது அனுமதிச் சீட்டு பெறாத கழகத் தோழர்களுக்கும் நுழைவு அனுமதி கிடையாது,” எனக் கூறியுள்ளார்.
அறிக்கையில் மேலும் குறிப்பிடப்பட்டதாவது, “அனுமதிச் சீட்டு இல்லாதவர்கள் நேரில் வருவதை தவிர்க்க வேண்டுகிறோம். பாதுகாப்பு மற்றும் ஒழுங்கு காரணங்களுக்காக, நிகழ்ச்சி அனுமதி பெற்றவர்களுக்காக மட்டுமே நடத்தப்படுகிறது. பொதுமக்கள் மற்றும் கழகத் தோழர்கள், இந்த நிகழ்ச்சியை தொலைக்காட்சி நேரலைகளின் மூலம் காணலாம்,” எனத் தெரிவித்தார்.
நிர்வாகிகள் கூட்டம் நடைபெறும் சேலம் சீலநாயக்கன்பட்டி பகுதியில் கடுமையான பாதுகாப்பு ஏற்பாடுகள் செய்யப்பட்டுள்ளன. காவல் துறை மற்றும் கட்சி நிர்வாகிகள் இணைந்து ஒழுங்கு நடவடிக்கைகளை மேற்கொண்டு வருகின்றனர்.
விஜயின் தலைமையில் நடைபெறும் இந்த கூட்டம், வரவிருக்கும் தேர்தல் பிரச்சாரத்தின் தொடக்கமாகக் கருதப்படுகிறது. இதில் முக்கிய அரசியல் தீர்மானங்கள் மற்றும் கட்சி அமைப்புக்கான ஆலோசனைகள் எடுக்கப்படும் என எதிர்பார்க்கப்படுகிறது.
த.வெ.க.வின் முதல் மிகப்பெரிய நிர்வாகிகள் கூட்டமாக நடைபெறும் இந்நிகழ்ச்சி, சேலம் மாவட்டத்திலும் கட்சி ஆதரவாளர்களிடமும் பெரும் ஆர்வத்தை ஏற்படுத்தியுள்ளது.
