கடலோர வாழ்வியலின் நுணுக்கங்களைச் சொல்லும் ‘கொண்டல்’ கலைக்கண்காட்சி: லலித்கலா அகாடமியில் ஒரு பயணம்
சென்னை: கடலும், கடல் சார்ந்த நிலப்பகுதியுமான நெய்தல் திணையின் தனித்துவமான பண்பாட்டையும், அங்கு வாழும் மக்களின் தினசரி வாழ்வியலையும் நேரில் கண்டது போன்ற உணர்வைத் தருகிறது சென்னை நுங்கம்பாக்கத்தில் உள்ள லலித்கலா அகாடமியில் நடைபெற்று வரும் ‘கொண்டல்’ எனும் ஓவியம் மற்றும் ஒளிப்படக் கண்காட்சி. கடலோர மக்களின் வாழ்வை வெறும் மேலோட்டமான பார்வையாகப் பார்க்காமல், அதன் ஒவ்வொரு அங்குலத்தையும் நுணுக்கமாகப் பதிவு செய்யும் முயற்சியாக இந்தக் கண்காட்சி அமைந்துள்ளது.
வழக்கமாகக் கடலோர வாழ்வு என்று சொன்னாலே, படகு துடுப்பை வலிக்கும் மீனவர்களின் கடின உழைப்பு மட்டுமே பலரின் நினைவுக்கு வரும். ஆனால், இந்தக் கண்காட்சி அந்தப் பொதுவான பிம்பத்தைத் தாண்டி, மீனவப் பெண்களின் தினசரிச் செயல்பாடுகள், அவர்களின் ஆழ்மன எண்ணவோட்டங்கள், கனவுகள் மற்றும் லட்சியங்களை மிக ஆழமாகப் பதிவு செய்துள்ளது. பார்வையாளர்களுடன் நேரடியாக உரையாடுவது போன்ற உணர்வை ஏற்படுத்தும் வகையில் இந்தப் படைப்புகள் வடிவமைக்கப்பட்டுள்ளன.
நெய்தல் திணையின் கலைநயத்தைப் பறைசாற்றும் வகையில், ஒளிப்படங்கள் மற்றும் ஓவியங்களுடன், கடலோர மக்களின் வாழ்வியலைச் சித்தரிக்கும் முப்பரிமாணக் கலைப்படைப்புகளும் இங்கு இடம்பெற்றுள்ளன. அந்தோணி குரூஸ், பழனிக்குமார், நிரஞ்சனா.ர மற்றும் அ.பகத்சிங் ஆகியோர் மிகுந்த அர்ப்பணிப்புடன் இந்தக் கண்காட்சியை ஒருங்கிணைத்துள்ளனர்.
இந்தக் கண்காட்சியின் சிறப்பம்சம் என்னவென்றால், பழவேற்காடு முதல் புதுச்சேரி வரையிலான கடலோரப் பகுதிகளை உள்ளடக்கி, மக்களின் உணவுப் பழக்கவழக்கங்கள், கலாச்சார வேறுபாடுகள் மற்றும் அவர்களின் வாழ்வின் எளிமையை ஒளிப்படங்கள் வாயிலாகப் பார்வையாளர்களுக்குக் கண்முன்னே நிறுத்துகிறார்கள். ஒளிப்படங்கள் யதார்த்தத்தை விவரிக்க, ஓவியங்களும் பிற கலைப்படைப்புகளும் நெய்தல் நில மக்களின் கற்பனை உலகத்தையும், அவர்கள் தங்கள் வாழ்வை எப்படிப் பார்க்கிறார்கள் என்பதையும் மிகத் தெளிவாகவும் கலைத்துவமாகவும் வெளிப்படுத்துகின்றன.
கடற்கரை மணலில் கால்தடங்களைச் பதிப்பது போன்ற ஓர் உணர்வை இந்தத் தொகுப்புகள் பார்வையாளர்களுக்குக் கடத்துகின்றன. இயற்கைக்கும் மனிதனுக்கும் இடையிலான பிணைப்பு, காலநிலை மாற்றங்களால் அவர்கள் சந்திக்கும் சவால்கள், கடலோர வாழ்வின் நவீன மாற்றம் எனப் பல பரிமாணங்கள் இங்கு காட்சிப்படுத்தப்பட்டுள்ளன.
லலித்கலா அகாடமியில் கடந்த ஜூன் 9-ஆம் தேதி கோலாகலமாகத் தொடங்கிய இந்த ‘கொண்டல்’ கலைக்கண்காட்சி, வரும் 16-ஆம் தேதி வரை நடைபெறுகிறது. கலை ஆர்வலர்களும், கடலோர மக்களின் வாழ்வியலை அறிந்துகொள்ள விரும்பும் பொதுமக்களும் இந்தப் படைப்புகளைக் கண்டு ரசிக்கத் தவறாதீர்கள். நகரத்தின் பரபரப்பான சூழலுக்கு மத்தியில், அமைதியான கடலோர வாழ்வை அனுபவிக்க இது ஒரு சிறந்த வாய்ப்பாகும்.
