தமிழ்நாடு அரசின் நிதி மேலாண்மை தொடர்பான வெள்ளை அறிக்கை குறித்து மார்க்சிஸ்ட் கம்யூனிஸ்ட் கட்சியின் மாநில செயலாளர் பெ. சண்முகம் கருத்து தெரிவித்துள்ளார். அரசின் நிதிநிலை குறித்து விரிவாக விவரிக்கப்பட்டுள்ள நிலையில், அதற்கான தீர்வுகள் குறித்த விளக்கங்கள் குறைவாக இருப்பதாக அவர் சுட்டிக்காட்டியுள்ளார்.
211 பக்கங்களைக் கொண்ட வெள்ளை அறிக்கையில் மாநிலத்தின் கடன் சுமை, வட்டி செலவின உயர்வு, வருவாய் பற்றாக்குறை, வரி வருவாய் சரிவு உள்ளிட்ட பல்வேறு சவால்கள் இடம்பெற்றுள்ளன. ஆனால், இந்த பிரச்சினைகளை எதிர்காலத்தில் எவ்வாறு சமாளிக்கப் போகிறது என்பது குறித்த தெளிவான செயல்திட்டங்கள் போதுமான அளவில் இடம்பெறவில்லை என அவர் கூறியுள்ளார்.
மாநில அரசின் கடன் அளவு உயர்ந்திருப்பது குறித்து கவலை தெரிவிக்கப்பட்டாலும், அந்தக் கடன்கள் எதற்காக பயன்படுத்தப்படுகின்றன, அதன் சமூகப் பயன்கள் என்ன என்பதையும் கணக்கில் எடுத்துக்கொள்ள வேண்டும் என அவர் வலியுறுத்தியுள்ளார்.
மேலும், ஜி.எஸ்.டி இழப்பீடு, மத்திய அரசின் வரிப்பகிர்வு, நிதிக் கூட்டாட்சி உரிமைகள் மற்றும் மாநிலங்களின் நிதி சுயாட்சியை பாதிக்கும் மத்திய அரசின் கொள்கைகள் குறித்தும் வெள்ளை அறிக்கையில் விரிவாக பேசப்பட வேண்டியிருந்தது என குறிப்பிட்டுள்ளார்.
புதிய அரசு தேர்தலின்போது அளித்த வாக்குறுதிகளை நிறைவேற்றுவதோடு, மாநில வருவாயை அதிகரிக்கும் மாற்று பொருளாதார திட்டங்களையும் செயல்படுத்த வேண்டும் என்று மார்க்சிஸ்ட் கம்யூனிஸ்ட் கட்சி வலியுறுத்தியுள்ளது.
