புதுடெல்லி: நீட் (NEET-UG) மறுதேர்வுக்கான வினாத்தாள் தேர்வுக்கு முன்பே கசிந்துவிட்டதாக சமூக வலைதளங்களில் பரவிய வீடியோ மாணவர்கள் மற்றும் பெற்றோர்களிடையே பரபரப்பை ஏற்படுத்தியது. இதற்கு தேசிய தேர்வு முகமை (NTA) மறுப்பு தெரிவித்துள்ளது.
கடந்த மே 3-ஆம் தேதி நடைபெற்ற நீட் தேர்வின் வினாத்தாள் கசிவு விவகாரத்தைத் தொடர்ந்து, தேர்வு ரத்து செய்யப்பட்டு ஜூன் 21-ஆம் தேதி மறுதேர்வு நடத்தப்பட்டது. நாடு முழுவதும் 551 நகரங்கள் மற்றும் வெளிநாடுகளில் 14 நகரங்களில் சுமார் 22.7 லட்சம் மாணவர்கள் இந்த தேர்வை எழுதினர்.
இந்நிலையில், டெலிகிராம் மூலம் மறுதேர்வு வினாத்தாள் முன்கூட்டியே வெளியானதாக கூறும் வீடியோ ஒன்று சமூக வலைதளங்களில் வேகமாக பரவியது. இதனால் மாணவர்களிடையே மீண்டும் அதிர்ச்சி மற்றும் குழப்பம் ஏற்பட்டது.
இதுகுறித்து விளக்கம் அளித்த தேசிய தேர்வு முகமை, “நீட் மறுதேர்வு பல அடுக்கு பாதுகாப்பு மற்றும் கண்காணிப்புடன் வெற்றிகரமாக நடத்தப்பட்டது. சமூக வலைதளங்களில் பரவி வரும் வினாத்தாள் கசிவு தொடர்பான வீடியோ முற்றிலும் போலியானது. அதில் இடம்பெற்றுள்ள தகவல்களும் உண்மையல்ல” என்று தெரிவித்துள்ளது.
மேலும், “பொய்யான தகவல்களை பரப்புவது, மாணவர்களை ஏமாற்றுவது மற்றும் தவறான வழியில் வழிநடத்துவது கடுமையான குற்றமாகும். மாணவர்கள், பெற்றோர் மற்றும் பொதுமக்கள் அதிகாரப்பூர்வ இணையதளம் மற்றும் சரிபார்க்கப்பட்ட சமூக வலைதள கணக்குகளின் தகவல்களை மட்டுமே நம்ப வேண்டும்” என NTA அறிவுறுத்தியுள்ளது.
முக்கிய அம்சங்கள்:
- நீட் மறுதேர்வு வினாத்தாள் கசிந்ததாக வைரல் வீடியோ பரவல்.
- தகவல் முற்றிலும் பொய்யானது என NTA மறுப்பு.
- மறுதேர்வு பலத்த பாதுகாப்புடன் நடத்தப்பட்டதாக விளக்கம்.
- அதிகாரப்பூர்வ தகவல்களை மட்டுமே நம்புமாறு மாணவர்கள், பெற்றோருக்கு அறிவுரை.
