சென்னை: தமிழக விவசாயிகளின் கடன் சுமையை முழுமையாக குறைக்கும் வகையில் அனைத்து பயிர்க் கடன்களையும் முழுமையாக தள்ளுபடி செய்ய வேண்டும் என்று பாமக சட்டப்பேரவைக் குழுத் தலைவர் சவுமியா அன்புமணி சட்டப்பேரவையில் வலியுறுத்தியுள்ளார். விவசாயிகளின் தற்போதைய பொருளாதார நிலை, தற்கொலை சம்பவங்கள் மற்றும் எதிர்கால வறட்சி அச்சுறுத்தல்களை சுட்டிக்காட்டி அவர் இந்த கோரிக்கையை முன்வைத்தார்.
சட்டப்பேரவையில் நடைபெற்ற விவாதத்தில் பேசிய சவுமியா அன்புமணி, சமூக நீதி சர்வே தொடர்பான அறிவிப்பை வரவேற்றதோடு, அது தமிழக மக்களின் வாழ்வில் முக்கிய மாற்றத்தை ஏற்படுத்தும் வரலாற்றுச் சிறப்பு மிக்க நடவடிக்கை என்றும் குறிப்பிட்டார்.
அவர் பேசுகையில், “ஒரு அறையை எந்த பொருளாலும் நிரப்பலாம். ஆனால் ஒரு விளக்கை ஏற்றினால் அதன் ஒளி முழு அறையையும் நிரப்பிவிடும். அதுபோல சமூக நீதி சர்வே நடத்தப்படும் என்ற அரசின் அறிவிப்பு தமிழக மக்களின் வாழ்க்கையில் புதிய ஒளியை ஏற்படுத்தியுள்ளது” என்றார்.
தொடர்ந்து விவசாயிகள் எதிர்கொள்ளும் பிரச்சினைகள் குறித்து பேசிய அவர், விவசாயம் என்பது தமிழகத்தின் அடிப்படை வாழ்வாதார துறையாக இருப்பதை சுட்டிக்காட்டினார். தமிழகத்தில் மூன்றில் இரண்டு பங்கு மக்கள் நேரடியாகவோ மறைமுகமாகவோ விவசாயம் மற்றும் விவசாயம் சார்ந்த தொழில்களில் ஈடுபட்டு வருவதாக கூறினார்.
பயிர் சாகுபடிக்காக விவசாயிகள் தேசியமயமாக்கப்பட்ட வங்கிகள், கூட்டுறவு வங்கிகள் மற்றும் தனியார் நிதி நிறுவனங்களில் கடன் பெற்று விவசாயம் செய்து வருவதாக அவர் தெரிவித்தார். ஆனால் இயற்கை சீற்றங்கள், வறட்சி, வெள்ளம், சந்தை விலை சரிவு போன்ற காரணங்களால் பலர் கடன் சுமையில் சிக்கி தவிப்பதாக கூறினார்.
“மகாராஷ்டிரா மாநிலத்தில் விவசாயிகளின் அனைத்து கடன்களும் தள்ளுபடி செய்யப்பட்டுள்ளன. அதேபோன்று தமிழகத்திலும் கூட்டுறவு வங்கிகள் மூலம் பெற்ற அனைத்து பயிர்க் கடன்களையும் முழுமையாக தள்ளுபடி செய்ய வேண்டும். தற்போது ஒரு குறிப்பிட்ட காலத்தில் பெறப்பட்ட கடன்களுக்கு மட்டுமே சலுகை வழங்கப்பட்டுள்ளது. முந்தைய ஆண்டுகளில் பெற்ற கடன்களும் தள்ளுபடியில் சேர்க்கப்பட வேண்டும்” என்று அவர் வலியுறுத்தினார்.
விவசாயிகளின் தற்கொலை சம்பவங்கள் குறித்து கவலை தெரிவித்த சவுமியா அன்புமணி, “ஆயிரக்கணக்கான கோடி ரூபாய் கடன் வாங்கியவர்கள் வெளிநாடுகளில் வசதியாக வாழ்கிறார்கள். ஆனால் வெறும் பத்தாயிரம் ரூபாய் கடனை திருப்பிச் செலுத்த முடியாமல் விவசாயிகள் உயிரை மாய்த்துக் கொள்கிறார்கள். இது மிகவும் வேதனையான நிலை” என்றார்.
2021 முதல் 2023 வரை தமிழகத்தில் 1,968 விவசாயிகள் தற்கொலை செய்து கொண்டதாக புள்ளிவிவரங்கள் தெரிவிப்பதாகவும், இதன் அடிப்படையில் சராசரியாக தினமும் இரண்டு விவசாயிகள் உயிரிழக்கும் சூழல் இருப்பதாகவும் அவர் குறிப்பிட்டார்.
மேலும், வரவிருக்கும் சூப்பர் எல் நினோ காலநிலை மாற்றம் தமிழக விவசாயத்திற்கு பெரிய பாதிப்பை ஏற்படுத்தும் அபாயம் இருப்பதாகவும் அவர் எச்சரித்தார். எதிர்கால வறட்சியை எதிர்கொள்ள அரசு முன்கூட்டியே திட்டமிட்டு நடவடிக்கை எடுக்க வேண்டும் என்றும் கூறினார்.
“விவசாயிகள் தற்போது நூறு அடி ஆழ பள்ளத்தில் சிக்கியிருக்கிறார்கள். அவர்களை மீட்க ஐம்பது அடி கயிறு மட்டும் கொடுத்தால் போதாது. முழுமையான தீர்வு தேவை. நிதிச்சுமை, நிர்வாக சிக்கல் போன்ற காரணங்களை ஒதுக்கிவைத்து விவசாயிகளின் வாழ்வாதாரத்தை காப்பாற்றும் வகையில் அனைத்து பயிர்க் கடன்களையும் முழுமையாக தள்ளுபடி செய்ய வேண்டும்” என்று அவர் வலியுறுத்தினார்.
அத்துடன் பெண்கள் மற்றும் குழந்தைகளுக்கு எதிரான குற்றங்களில் ஈடுபடுவோருக்கு கடுமையான தண்டனைகள் வழங்கப்பட வேண்டும் என்றும் அவர் கோரிக்கை விடுத்தார். பெண்கள் மற்றும் குழந்தைகள் மீதான பாலியல் குற்றங்களைத் தடுக்க கடுமையான சட்ட அமலாக்கம் அவசியம் என தெரிவித்தார்.
தருமபுரி மாவட்ட மக்களின் குடிநீர் பிரச்சினையையும் அவர் பேரவையில் எழுப்பினார். தருமபுரி காவிரி உபரி நீர் திட்டத்தை உடனடியாக செயல்படுத்த வேண்டும் என்றும், மாவட்டத்தில் புதிய SIPCOT தொழிற்பேட்டை அமைத்து வேலைவாய்ப்புகளை உருவாக்க வேண்டும் என்றும் அரசை கேட்டுக் கொண்டார்.
விவசாயிகளின் கடன் சுமை, தற்கொலைகள் மற்றும் எதிர்கால காலநிலை சவால்களை கருத்தில் கொண்டு, முழுமையான பயிர்க் கடன் தள்ளுபடி திட்டத்தை அரசு பரிசீலிக்க வேண்டும் என்ற கோரிக்கை தற்போது அரசியல் மற்றும் விவசாய வட்டாரங்களில் கவனத்தை ஈர்த்துள்ளது.
