சென்னை:
சோகோ (Zoho) நிறுவனத்தின் நிறுவனர் ஸ்ரீதர் வேம்பு, திமுக ஆட்சிக் காலத்தில் பள்ளி கட்டிட அனுமதி பெற லஞ்சம் கேட்கப்பட்டதாக குற்றஞ்சாட்டி வெளியிட்டுள்ள பதிவு அரசியல் வட்டாரங்களில் பரபரப்பை ஏற்படுத்தியுள்ளது. தனது எக்ஸ் சமூக வலைதளப் பதிவின் மூலம் அவர் இந்த குற்றச்சாட்டுகளை முன்வைத்துள்ளார்.
ஸ்ரீதர் வேம்பு தனது பதிவில், கலைவாணி கல்வி என்ற அமைப்பின் மூலம் தென்காசி மற்றும் தேனி மாவட்டங்களுக்கு அருகிலுள்ள கிராமப்புறங்களில் இரண்டு பள்ளிகளை நடத்தி வருவதாக குறிப்பிட்டுள்ளார். அந்த பள்ளிகளின் வளர்ச்சிக்காக புதிய கட்டிடங்களை அமைக்க திட்டமிட்டு, அதற்கான டிடிசிபி (DTCP) ஒப்புதலுக்கு விண்ணப்பித்ததாகவும் தெரிவித்துள்ளார்.
தென்காசியில் புதிய பள்ளிக் கட்டிடங்கள் கட்டுவதற்காக தேவையான அனைத்து நடைமுறைகளையும் பின்பற்றி விண்ணப்பித்த போதிலும், திமுக ஆட்சிக் காலம் முழுவதும் அனுமதி கிடைக்கவில்லை என்று அவர் கூறியுள்ளார். பலமுறை காத்திருந்தும் எந்த முன்னேற்றமும் ஏற்படவில்லை எனவும் தனது பதிவில் குறிப்பிட்டுள்ளார்.
மேலும் தேனி பகுதியில் செயல்பட்டு வந்த பள்ளி குறித்து அவர் கூறியுள்ள தகவலும் கவனம் பெற்றுள்ளது. அந்த பள்ளியை ஓய்வு பெற்ற ஐபிஎஸ் அதிகாரி ஒருவர் நிர்வகித்து வந்ததாகவும், அந்த கல்வி நிறுவனத்திற்கும் பல்வேறு நிர்வாக சிக்கல்கள் ஏற்பட்டதாகவும் தெரிவித்துள்ளார். குறிப்பாக தடையில்லா சான்றிதழ் (NOC) பெற அதிகாரிகள் பணம் கேட்டதாக அந்த அதிகாரி தெரிவித்ததாக ஸ்ரீதர் வேம்பு கூறியுள்ளார்.
அந்த கோரிக்கைகளை ஏற்க முடியாத சூழ்நிலை ஏற்பட்டதால், பள்ளியை நடத்துவது கடினமாகி இறுதியில் அந்த கல்வி நிறுவனம் மூடப்பட்டதாகவும் அவர் தனது பதிவில் தெரிவித்துள்ளார். கல்வி நிறுவனங்களுக்கு தேவையான அடிப்படை அனுமதிகளுக்குக் கூட அதிகளவில் பணம் கேட்கப்பட்டதாக அவர் குற்றம்சாட்டியுள்ளார்.
அதேநேரத்தில், தற்போதைய ஆட்சி பொறுப்பேற்ற பிறகு நிலைமை மாறியுள்ளதாகவும் ஸ்ரீதர் வேம்பு கூறியுள்ளார். அரசு மாறிய பின்னர் தாங்கள் விண்ணப்பித்திருந்த அனுமதிகள் தானாகவே கிடைத்ததாகவும், எந்தவொரு ஒப்புதலுக்காகவும் யாருக்கும் பணம் கொடுக்க வேண்டிய அவசியம் இல்லை என்று அதிகாரிகள் தெரிவித்ததாகவும் அவர் பதிவிட்டுள்ளார்.
இதற்கு முன்பு அனுமதி கிடைத்ததற்காக தற்போதைய நிர்வாகத்தை பொதுவெளியில் பாராட்டியதாகவும், அதன்பின்னர் திமுக ஆதரவாளர்கள் தன்னை கடுமையாக விமர்சித்து வருவதாகவும் அவர் தெரிவித்துள்ளார். சமூக வலைதளங்களில் தனிப்பட்ட தாக்குதல்களும் நடத்தப்படுவதாக அவர் குற்றஞ்சாட்டியுள்ளார்.
இதுகுறித்து தனது பதிவில் மேலும் கருத்து தெரிவித்துள்ள ஸ்ரீதர் வேம்பு, “நான் எந்த அரசியல் குடும்பத்திலிருந்தும் வந்தவன் அல்ல. சாதாரண குடும்பத்தில் பிறந்து, தமிழ்வழிப் பள்ளியில் படித்து வளர்ந்தவன். வாழ்க்கையில் கஷ்டங்களை எதிர்கொண்டு முன்னேறியவன். எனவே இத்தகைய விமர்சனங்களாலும், தனிப்பட்ட தாக்குதல்களாலும் நான் அச்சப்பட மாட்டேன்” என்று தெரிவித்துள்ளார்.
மேலும், “என்னுடைய கருத்துக்களுக்கு பதிலளிப்பதற்குப் பதிலாக தனிப்பட்ட தாக்குதல்களை நடத்துபவர்கள், தங்களது மனசாட்சியை பரிசோதிக்க வேண்டும். அவர்கள் மீது கூறப்படும் ஊழல் குற்றச்சாட்டுகள் உண்மையல்ல என்றால் அதற்கு விளக்கம் அளிக்க வேண்டும்” என்றும் அவர் குறிப்பிட்டுள்ளார்.
ஸ்ரீதர் வேம்புவின் இந்த குற்றச்சாட்டு தற்போது சமூக வலைதளங்களில் பரவலாக பேசப்பட்டு வருகிறது. அரசியல் கட்சிகள் மற்றும் பல்வேறு தரப்பினரும் இந்த விவகாரம் குறித்து கருத்து தெரிவித்து வருகின்றனர். அதேசமயம், இந்த குற்றச்சாட்டுகளுக்கு திமுக தரப்பில் இருந்து என்ன பதில் வெளியாகும் என்பது அரசியல் வட்டாரங்களில் எதிர்பார்ப்பை ஏற்படுத்தியுள்ளது.
