பெங்களூரு: கர்நாடக மாநிலம் பெங்களூரு அருகே உள்ள தனியார் கல் குவாரியில் இன்று காலை ஏற்பட்ட பயங்கரப் பாறைச் சரிவு விபத்தில், பீகார் உள்ளிட்ட வடமாநிலங்களைச் சேர்ந்த 8 தொழிலாளர்கள் சம்பவ இடத்திலேயே உடல் நசுங்கி பரிதாபமாக உயிரிழந்தனர். மேலும் பலர் படுகாயமடைந்து மருத்துவமனையில் அனுமதிக்கப்பட்டுள்ளனர்.

அதிகாலையில் நேர்ந்த பயங்கரம்: பெங்களூரு தெற்கு தாலுகாவிற்கு உட்பட்ட மதபட்டணா (Madapatna) கிராமப் பகுதியில் தனியாருக்குச் சொந்தமான கல் குவாரி மற்றும் ஜல்லி கிரஷர் (Stone Crusher) நிறுவனம் ஒன்று இயங்கி வருகிறது. இந்த குவாரியில் வழக்கம் போல இன்று அதிகாலை 6:30 மணி அளவில், 20-க்கும் மேற்பட்ட வடமாநிலத் தொழிலாளர்கள் தங்களது அன்றாடப் பணிகளில் தீவிரமாக ஈடுபட்டிருந்தனர். தொழிலாளர்கள் குவாரியின் மிக ஆழமான அடிவாரப் பகுதியில் நின்றுகொண்டு, கிரஷ் செய்யப்பட்ட கற்களை டிராக்டர் மற்றும் கனரக வாகனங்களில் ஏற்றிக் கொண்டிருந்தனர்.

அப்போது, சுமார் 40 அடி உயரத்தில் இருந்த ஒரு பிரம்மாண்டப் பாறை மற்றும் மண் திட்டு, குவாரியில் ஏற்பட்ட அதிரடி அதிர்வுகள் காரணமாக திடீரெனச் சரிந்து கீழே வேலை செய்துகொண்டிருந்த தொழிலாளர்கள் மீது பயங்கர சத்தத்துடன் விழுந்தது.

8 பேர் சம்பவ இடத்திலேயே பலி: பாறை சரிந்து விழுந்த வேகம் மிக அதிகமாக இருந்ததால், அங்கு வேலை பார்த்துக் கொண்டிருந்த தொழிலாளர்களால் தப்பி ஓட இயலவில்லை. இந்த கோர விபத்தில் டன் கணக்கிலான பாறாங்கற்களுக்கு அடியில் சிக்கி 8 தொழிலாளர்கள் சம்பவ இடத்திலேயே ரத்த வெள்ளத்தில் உடல் நசுங்கி பரிதாபமாக உயிரிழந்தனர். விபத்தின் வீரியத்தால் அங்கிருந்த டிராக்டர்கள் மற்றும் கனரக வாகனங்கள் முற்றிலும் நசுங்கி இடிபாடுகளாக மாறின.

தகவலறிந்து சம்பவ இடத்திற்கு மகாடி மற்றும் சுங்கடகட்டே தீயணைப்பு நிலைய மீட்புப் படையினரும், தாவரேகெரே காவல்துறையினரும் விரைந்து வந்தனர். இடிபாடுகளுக்குள் சிக்கியிருந்த 5-க்கும் மேற்பட்ட தொழிலாளர்களை மீட்ட போலீசார், அவர்களை உடனடியாகப் பெங்களூரு மைசூர் சாலையில் உள்ள ராஜராஜேஸ்வரி தனியார் மருத்துவமனைக்குச் சிகிச்சைக்காக அனுமதித்தனர். அவர்களில் இருவரது நிலைமை மிகவும் கவலைக்கிடமாக உள்ளதாகக் கூறப்படுகிறது. உயிரிழந்த 8 தொழிலாளர்களும் பீகார் மற்றும் மேற்கு வங்கம் உள்ளிட்ட வடமாநிலங்களைச் சேர்ந்த கூலித் தொழிலாளர்கள் ஆவர்.

முதல்-மந்திரி டி.கே.சிவக்குமார் ஆழ்ந்த இரங்கல்: இந்த கோர விபத்து குறித்துத் தகவல் அறிந்த கர்நாடக மாநில முதலமைச்சர் டி.கே.சிவக்குமார் தனது ஆழந்த இரங்கலைத் தெரிவித்துள்ளார். இது குறித்து அவர் தனது எக்ஸ் (X) சமூக வலைதளப் பக்கத்தில் வெளியிட்டுள்ள பதிவில் கூறியிருப்பதாவது:

“பெங்களூரு தெற்கு தாலுகாவில் உள்ள மதபட்டணாவில் கல் குவாரி விபத்தில் தொழிலாளர்கள் உயிரிழந்த செய்தி எனக்குத் தாளாத வேதனையைத் தருகிறது. உயிரிழந்தவர்களின் ஆன்மாக்கள் சாந்தி அடையவும், இந்தத் துயரத்தைத் தாங்கிக்கொள்ள அவர்களது குடும்பத்தினருக்குத் தகுந்த மனவலிமை கிடைக்க வேண்டும் என்றும் நான் பிரார்த்திக்கிறேன்.

குவாரிகளில் பணிபுரியும் தொழிலாளர்களின் பாதுகாப்பை உறுதி செய்ய வேண்டியது அதன் உரிமையாளர்களின் மிக முக்கிய கடமையாகும். இந்த விவகாரத்தில் விதிகளை மீறிச் செயல்படும் கல் குவாரிகள் மீது அரசு தகுந்த கடுமையான சட்டப் பூர்வ நடவடிக்கைகளை எடுக்கும்.”

என்று அவர் எச்சரித்துள்ளார்.

உரிமையாளர் கைது – தீவிர விசாரணை: விபத்து நடந்த குவாரிக்கு நேரில் சென்று ஆய்வு நடத்திய மத்திய மண்டல ஐஜிபி கிரிஷ், அங்கு நிலவிய பாதுகாப்பு குறைபாடுகள் குறித்து விசாரணை நடத்த உத்தரவிட்டுள்ளார். குவாரி மற்றும் கிரஷரின் உரிமையாளரான ஆனந்தசுவாமி என்பவரைக் காவல்துறையினர் தற்போது தங்களது காவலில் எடுத்துத் தீவிர விசாரணை மேற்கொண்டு வருகின்றனர். குவாரியில் முறையான பாதுகாப்பு விதிமுறைகள் பின்பற்றப்பட்டதா, வெடிபொருட்கள் சட்டவிரோதமாகப் பயன்படுத்தப்பட்டதா என்பது குறித்துத் தாவரேகெரே போலீசார் வழக்குப் பதிவு செய்து விசாரித்து வருகின்றனர். இச்சம்பவம் பெங்களூரு சுற்றுவட்டாரப் பகுதியில் பெரும் சோகத்தை ஏற்படுத்தியுள்ளது.