சென்னை: உலகப் புகழ்பெற்ற வேளாங்கண்ணி புனித ஆரோக்கிய அன்னை பேராலய திருவிழாவை முன்னிட்டு, கேரள மாநிலம் எர்ணாகுளத்தில் இருந்து தென்காசி மற்றும் காரைக்குடி வழியாக வேளாங்கண்ணிக்குச் சிறப்பு ரெயில்கள் இயக்கப்படும் என்று தெற்கு ரெயில்வே அதிகாரப்பூர்வமாக அறிவித்துள்ளது. இது குறித்த முழுமையான விவரங்கள் வெளியாகியுள்ளன.
சிறப்பு ரெயில் இயங்கும் நாட்கள் மற்றும் நேரம்: கேரள மாநிலம் எர்ணாகுளம் ஜங்ஷனில் இருந்து வேளாங்கண்ணிக்கு ஆகஸ்ட் 27, செப்டம்பர் 3 மற்றும் செப்டம்பர் 10 ஆகிய தேதிகளில் (வியாழக்கிழமைகளில்) இந்தச் சிறப்பு ரெயில் இயக்கப்பட உள்ளது. அதன்படி, எர்ணாகுளத்தில் மதியம் 1 மணிக்குப் புறப்படும் இந்தச் சிறப்பு ரெயில் (வண்டி எண் 06061), மறுநாள் காலை 5.50 மணிக்கு வேளாங்கண்ணி சென்றடையும்.
மறுமார்க்கத்தில், வேளாங்கண்ணியில் இருந்து எர்ணாகுளம் ஜங்ஷனுக்கு ஆகஸ்ட் 28, செப்டம்பர் 4 மற்றும் செப்டம்பர் 11 ஆகிய தேதிகளில் (வெள்ளிக்கிழமைகளில்) சிறப்பு ரெயில் இயக்கப்படுகிறது. வேளாங்கண்ணியில் மாலை 6.40 மணிக்குப் புறப்படும் இந்த ரெயில் (வண்டி எண் 06062), மறுநாள் காலை 11.50 மணிக்கு எர்ணாகுளத்தைச் சென்றடையும்.
நின்று செல்லும் ரெயில் நிலையங்கள்: மொத்தம் 15 பெட்டிகளைக் கொண்ட இந்தச் சிறப்பு ரெயில், பயணிகளின் வசதிக்காகப் பல முக்கிய ரயில் நிலையங்களில் நின்று செல்லத் திட்டமிடப்பட்டுள்ளது. குறிப்பாக தமிழ்நாட்டில் செங்கோட்டை, தென்காசி, கடையநல்லூர், சங்கரன்கோவில், ராஜபாளையம், சிவகாசி, விருதுநகர், அருப்புக்கோட்டை, மானாமதுரை, சிவகங்கை, காரைக்குடி, அறந்தாங்கி, பேராவூரணி, பட்டுக்கோட்டை, அதிராம்பட்டினம், திருத்துறைப்பூண்டி, திருவாரூர் மற்றும் நாகப்பட்டினம் ஆகிய ரெயில் நிலையங்களில் இந்த ரெயில் நின்று செல்லும்.
நாளை முதல் முன்பதிவு தொடக்கம்: வேளாங்கண்ணி திருவிழாவையொட்டி இயக்கப்படும் இந்தச் சிறப்பு ரெயில்களுக்கான பயண முன்பதிவு நாளை (ஜூலை 24-ந்தேதி) காலை 8 மணிக்குத் தொடங்குகிறது. பயணிகள் அனைவரும் இந்தச் சிறப்பு ரெயில் சேவையைப் பயன்படுத்தி முன்பதிவு செய்து கொள்ளலாம் எனத் தெற்கு ரெயில்வே கேட்டுக் கொண்டுள்ளது.
