தமிழகத்தில் நடந்து முடிந்த சட்டமன்றத் தேர்தலுக்குப் பிறகு, பிரதான எதிர்க்கட்சியான அதிமுகவில் உள்கட்சி மோதலும் குழப்பங்களும் தொடர்கதையாகி வருகின்றன. தேர்தலில் 47 இடங்களை வென்ற அதிமுக, பொதுச்செயலாளர் எடப்பாடி பழனிசாமி தலைமையில் ஒரு அணியாகவும், முன்னாள் அமைச்சர்கள் எஸ்.பி.வேலுமணி மற்றும் சி.வி.சண்முகம் தலைமையில் மற்றொரு அணியாகவும் இரண்டாகப் பிளவுபட்டது. சட்டமன்றத்தில் நடைபெற்ற நம்பிக்கை வாக்கெடுப்பின்போது, எஸ்.பி.வேலுமணி தரப்பு 25 எம்.எல்.ஏ.க்களின் ஆதரவோடும், எடப்பாடி பழனிசாமி தரப்பு 22 எம்.எல்.ஏ.க்களுடனும் தனித்தனியாகச் செயல்பட்டன. இதனால் இரு தரப்பினரும் ஒருவருக்கொருவர் மீது சபாநாயகரிடம் கொறடா உத்தரவு மீறல் புகார்களை அளித்தனர்.
இதற்கிடையில், கடந்த ஜூன் 25-ம் தேதி இரு தரப்புக்கும் இடையே சமாதான உடன்பாடு எட்டப்பட்டதாகக் கூறப்பட்டது. அதன் ஒரு பகுதியாக, எடப்பாடி பழனிசாமி, எஸ்.பி.வேலுமணிக்குக் கட்சியின் ‘துணைப் பொதுச் செயலாளர்’ பதவியை வழங்கி உத்தரவிட்டிருந்தார். நிலைமை சுமூகமாகிவிட்டதாக எதிர்பார்க்கப்பட்ட நிலையில், கோவை மாவட்டம் தொண்டாமுத்தூரில் நடைபெற்ற தனது ஆதரவாளர்கள் ஆலோசனைக் கூட்டத்தில் எஸ்.பி.வேலுமணி கலந்துகொண்டது அரசியல் வட்டாரத்தில் மீண்டும் சலசலப்பை ஏற்படுத்தியுள்ளது. இந்தக் கூட்டத்தில், அதிமுக கொடிகளோ அல்லது முன்னாள் தலைவர்களின் படங்களோ வைக்கப்படவில்லை என்பது குறிப்பிடத்தக்கது.
கூட்டத்தில் தனது ஆதரவாளர்களிடம் பேசிய எஸ்.பி.வேலுமணி, “தேர்தல் முடிந்த பிறகு என்னை நம்பி வந்த 30 மாவட்டச் செயலாளர்களுக்கு எந்தவிதப் பொறுப்புகளும் வழங்கப்படவில்லை. அவர்களுக்குப் பதவிகள் தராமல், என்னை மட்டும் தேடிவந்து பதவி கொடுப்பதை ஒருபோதும் ஏற்றுக்கொள்ள முடியாது. சி.வி.சண்முகம், சி.விஜயபாஸ்கர், பி. தங்கமணி மற்றும் கே.பி. முனுசாமி உள்ளிட்ட கட்சியின் வளர்ச்சிக்குப் பாடுபட்ட மூத்த தலைவர்களைப் புறக்கணித்துவிட்டு எனக்கு மட்டும் பதவி வழங்குவது அநீதியாகும். எனவே, எடப்பாடி பழனிசாமி வழங்கிய துணைப் பொதுச்செயலாளர் பதவியை நான் ஏற்கப் போவதில்லை” என்று திட்டவட்டமாகத் தெரிவித்தார். மேலும், அதிமுகவை திமுகவுடன் இணைப்பது அல்லது கூட்டணி வைப்பது போன்ற பேச்சுக்களே உள்கட்சிப் பூசலுக்கு மூலக் காரணம் என்று கூறிய அவர், எம்.ஜி.ஆர் ஆரம்பித்த கட்சியை திமுகவுடன் சமரசம் செய்ய அனுமதிக்க முடியாது என்றும், தான் அதிமுகவிலேயே தொடர்ந்து பயணித்து திமுகவை எதிர்க்கப் போவதாகவும் தெளிவுபடுத்தினார்.
இதன் தொடர்ச்சியாக, பழனியில் நடைபெற்ற எம்.எல்.ஏ அலுவலகத் திறப்பு விழாவில் கலந்துகொண்ட முன்னாள் அமைச்சர்கள் எஸ்.பி.வேலுமணி, நத்தம் விஸ்வநாதன் மற்றும் சி.வி.சண்முகம் ஆகியோர் கூட்டாகச் செய்தியாளர்களைச் சந்தித்தனர். அப்போது, தங்களுக்கு வழங்கப்பட்ட துணைப் பொதுச்செயலாளர் உள்ளிட்ட அனைத்துப் புதிய பொறுப்புகளையும் தாங்கள் அதிகாரப்பூர்வமாகப் புறக்கணிப்பதாக அறிவித்தனர். மேலும், கட்சியைப் பலப்படுத்த வேண்டுமானால், கட்சியை விட்டு நீக்கப்பட்ட சசிகலா மற்றும் டி.டி.வி. தினகரன் ஆகியோரை மீண்டும் கட்சியில் இணைக்க வேண்டும் என்றும் அவர்கள் பகிரங்கமாகத் கோரிக்கை விடுத்துள்ளனர். இந்த அதிரடி அறிவிப்புகள் அதிமுகவில் மீண்டும் பெரும் புயலைக் கிளப்பியுள்ளது.
