நடிகர் அஜித் குமாரின் அடுத்த திரைப்படமான ‘ஏகே 64’ குறித்த புதிய தகவல்கள் ரசிகர்களிடையே பெரும் எதிர்பார்ப்பை ஏற்படுத்தியுள்ளன. இந்தப் படத்தின் அதிகாரப்பூர்வ அறிவிப்பு இன்னும் சில நாட்களில் வெளியாகும் எனத் தகவல்கள் வெளியாகியுள்ளன.
ஆதிக் ரவிச்சந்திரன் இயக்கத்தில் வெளியான ‘குட் பேட் அக்லி’ திரைப்படம் ரசிகர்களிடையே நல்ல வரவேற்பைப் பெற்றது. ஆக்ஷன், காமெடி மற்றும் மாஸ் காட்சிகள் நிறைந்த இப்படம் அஜித் ரசிகர்களுக்கு விருந்தாக அமைந்தது. குறிப்பாக நடிகர் அர்ஜுன் தாஸின் நடிப்பு பாராட்டுகளை பெற்றதுடன், திரிஷா, பிரபு, பிரசன்னா உள்ளிட்டோர் நடித்திருந்தனர்.
‘குட் பேட் அக்லி’ வெற்றியைத் தொடர்ந்து, மீண்டும் அஜித் குமார் மற்றும் இயக்குநர் ஆதிக் ரவிச்சந்திரன் கூட்டணி இணையவுள்ளது. அஜித்தின் 64-வது திரைப்படமாக உருவாகும் இந்தப் படத்திற்கு தற்காலிகமாக ‘ஏகே 64’ என பெயரிடப்பட்டுள்ளது.
சமீபத்தில் அளித்த பேட்டியில் அஜித் குமார், தனது அடுத்த படம் குறித்த அறிவிப்பு விரைவில் வெளியாகும் என்று குறிப்பிட்டிருந்தார். இதனைத் தொடர்ந்து படத்திற்கான முன்தயாரிப்பு பணிகள் முழுவீச்சில் நடைபெற்று வருவதாக கூறப்படுகிறது.
இந்தப் படத்தில் நடிகை ரெஜினா முக்கிய கதாபாத்திரத்தில் நடிக்க உள்ளதாக தகவல்கள் தெரிவிக்கின்றன. முன்னதாக ‘விடாமுயற்சி’ திரைப்படத்தில் அஜித்துக்கு எதிரான வில்லன் கதாபாத்திரத்தில் அவர் நடித்திருந்தார். மேலும், அஜித்துக்கு ஜோடியாக பிரபல நடிகை ஸ்ரீலீலா நடிக்க ஒப்பந்தம் செய்யப்பட்டுள்ளதாகவும் தகவல்கள் வெளியாகியுள்ளன.
படத்தை பிரபல தெலுங்கு தயாரிப்பாளர் அனில் சுங்கரா தனது ஏகே எண்டர்டெயின்மெண்ட்ஸ் நிறுவனத்தின் மூலம் தயாரிக்க உள்ளதாக கூறப்படுகிறது. அதேசமயம், நடிகர் அஜித் குமாரும் இந்தத் திரைப்படத்தின் இணை தயாரிப்பாளராக இருக்கலாம் என சினிமா வட்டாரங்களில் தகவல் பரவி வருகிறது.
ஆக்ஷன் மற்றும் மாஸ் அம்சங்கள் நிறைந்த படமாக ‘ஏகே 64’ உருவாகும் என எதிர்பார்க்கப்படுகிறது. படப்பிடிப்பு பணிகள் ஆகஸ்ட் மாதத்தில் தொடங்கும் என்றும், 2027 ஆம் ஆண்டு வெளியாகும் வகையில் திட்டமிடப்பட்டுள்ளதாக கூறப்படுகிறது.
அதிகாரப்பூர்வ அறிவிப்பு வெளியாகும் வரை ரசிகர்கள் ஆவலுடன் காத்திருக்கின்றனர். ‘குட் பேட் அக்லி’ வெற்றிக்குப் பிறகு மீண்டும் ஆதிக் ரவிச்சந்திரன் – அஜித் கூட்டணி இணைவது ரசிகர்களின் எதிர்பார்ப்பை மேலும் அதிகரித்துள்ளது.
