சென்னை:
தமிழக சட்டமன்றத் தேர்தல் முடிவுகள் மாநில அரசியலில் புதிய திருப்பத்தை உருவாக்கியுள்ளன. நடிகர் விஜய்யின் தமிழக வெற்றிக் கழகம் 110-க்கும் மேற்பட்ட தொகுதிகளில் முன்னிலை பெற்று, தனிப்பெரும்பான்மையுடன் ஆட்சி அமைக்கும் நிலையை எட்டியிருப்பதாக தகவல்கள் வெளியாகியுள்ளன. பெரும்பான்மைக்கு தேவையான 118 இடங்களை எட்ட சில இடங்களே தேவைப்படும் நிலையில், தமிழகத்தின் அடுத்த முதலமைச்சராக விஜய் பதவியேற்பது கிட்டத்தட்ட உறுதியாகியுள்ளது.
இந்த வரலாற்றுச் சிறப்புமிக்க வெற்றிக்கு பின்னர், விஜய் தேர்தல் பிரச்சாரத்தின் போது கூறிய முக்கிய வாக்குறுதிகள் எப்போது நிறைவேற்றப்படும் என்ற எதிர்பார்ப்பு மக்கள் மத்தியில் அதிகரித்துள்ளது. குறிப்பாக, மகளிருக்கு மாதம் ரூ.2500 வழங்கும் திட்டம் குறித்து இல்லத்தரசிகள், பெண்கள் அமைப்புகள் மற்றும் பொதுமக்கள் மிகுந்த கவனத்துடன் காத்திருக்கின்றனர். தற்போது நடைமுறையில் உள்ள உதவித்தொகையைவிட பல மடங்கு அதிகமாக, தகுதியுள்ள அனைத்து பெண்களுக்கும் மாதம் ரூ.2500 வழங்கப்படும் என்று விஜய் அறிவித்திருந்தார்.
தவெக முன்னிலை நிலவரம் இந்த வாக்குறுதிக்கு மேலும் வலு சேர்த்துள்ளது. 110-க்கும் மேற்பட்ட இடங்களில் முன்னிலை இருப்பதால், இந்த திட்டத்தை ஆட்சி அமைந்ததும் முதன்மையான நலத்திட்டமாக செயல்படுத்த வேண்டும் என்ற கோரிக்கை வலுத்துள்ளது. அதேபோல, வருடத்திற்கு ஆறு இலவச சிலிண்டர்கள் வழங்கப்படும் என்பதும் தேர்தல் அறிக்கையின் முக்கிய அம்சமாக மக்களிடம் கவனம் பெற்றுள்ளது. பெண்களின் வீட்டு செலவைக் குறைக்கும் வகையிலும், குடும்ப பொருளாதாரத்திற்கு துணைநிற்கும் வகையிலும் இந்த அறிவிப்பு பெரிதும் வரவேற்பைப் பெற்றிருந்தது.
இதுதவிர கல்வி, வேலைவாய்ப்பு, விவசாயம், மதுவிலக்கு, ஊழலற்ற நிர்வாகம் என பல துறைகளிலும் தவெக பல அதிரடி வாக்குறுதிகளை வழங்கியுள்ளது. நீட் தேர்வை ரத்து செய்ய தேவையான சட்டப் போராட்டங்களை முன்னெடுத்து, முதல் சட்டமன்ற கூட்டத் தொடரிலேயே தீர்மானம் நிறைவேற்றப்படும் என விஜய் உறுதியளித்திருந்தார். அரசுப் பள்ளிகளின் தரத்தை சர்வதேச தரத்திற்கு உயர்த்தி, ஏழை மாணவர்களுக்கு உயர் கல்வியை முழுமையாக இலவசமாக வழங்குவதாகவும் அவர் கூறியுள்ளார்.
விவசாயிகளுக்காக குறைந்தபட்ச ஆதார விலையை உறுதி செய்தல், பயிர்க்கடன்களை தள்ளுபடி செய்தல் போன்ற திட்டங்களும் தவெக அறிக்கையில் இடம்பெற்றுள்ளன. அதேபோல், தமிழகத்தில் படிப்படியாக மதுக்கடைகளை குறைத்து, முழுமையான மதுவிலக்கு நோக்கி நகரும் திட்டமும் அறிவிக்கப்பட்டுள்ளது. அரசு அலுவலகங்களில் லஞ்சம் மற்றும் ஊழலை ஒழிக்க டிஜிட்டல் முறையை முழுமையாகப் பயன்படுத்துவதாகவும் அக்கட்சி கூறியுள்ளது.
இந்நிலையில், ஆட்சி அமைப்பதற்கு தேவையான பெரும்பான்மையை விஜய் நெருங்கியுள்ளதால், இந்தத் திட்டங்களை செயல்படுத்த நிதி ஆதாரங்களை அவர் எவ்வாறு உருவாக்கப்போகிறார் என்ற கேள்வியும் எழுந்துள்ளது. எனினும், “சொன்னதைச் செய்வோம்” என்ற விஜய்யின் பிம்பம் மக்கள் மனதில் பெரும் நம்பிக்கையை ஏற்படுத்தியுள்ளது. குறிப்பாக இளைஞர்களும் பெண்களும் தவெக பக்கம் திரண்டிருப்பது, தமிழக அரசியலில் பெரிய மாற்றத்தின் தொடக்கமாக பார்க்கப்படுகிறது.
