அயோத்தி ராமர் கோவிலில் பக்தர்கள் வழங்கிய நன்கொடைகள் மற்றும் நகைகள் தொடர்பாக எழுந்துள்ள மோசடி குற்றச்சாட்டு உத்தரப் பிரதேச அரசியல் மற்றும் மத வட்டாரங்களில் பரபரப்பை ஏற்படுத்தியுள்ளது. இந்த விவகாரத்தில் குற்றவாளிகள் யாராக இருந்தாலும் சட்டத்தின் பிடியில் இருந்து தப்ப முடியாது என்று உத்தரப் பிரதேச முதலமைச்சர் யோகி ஆதித்யநாத் கடுமையாக எச்சரித்துள்ளார்.
அயோத்தியில் அமைந்துள்ள ராமர் கோவில் நாட்டின் கோடிக்கணக்கான இந்து மக்களின் நம்பிக்கையின் சின்னமாக கருதப்படுகிறது. இந்த நிலையில் கோவிலில் பக்தர்கள் காணிக்கையாக வழங்கிய பணம் மற்றும் நகைகளில் முறைகேடு நடைபெற்றதாக அண்மையில் புகார்கள் எழுந்தன. இதையடுத்து இந்த விவகாரத்தை முழுமையாக விசாரிக்க சிறப்பு விசாரணைக் குழு (SIT) அமைக்க மாநில அரசு உத்தரவிட்டது.
சிறப்பு விசாரணைக் குழு பல்வேறு கோணங்களில் தீவிரமாக விசாரணை நடத்தி வருகிறது. இதன் ஒரு பகுதியாக ஸ்ரீ ராம ஜென்ம பூமி அறக்கட்டளை மற்றும் அதனுடன் தொடர்புடைய நிர்வாகிகள், வங்கி அதிகாரிகள் மற்றும் சந்தேக நபர்கள் உள்ளிட்ட சுமார் 150 பேரிடம் விசாரணை நடத்தப்பட்டுள்ளதாக தகவல் வெளியாகியுள்ளது.
விசாரணைக்குப் பிறகு எஸ்ஐடி தனது 20 பக்க இடைக்கால அறிக்கையை மாநில அரசிடம் சமர்ப்பித்துள்ளது. அதில் பல முக்கிய தகவல்கள் இடம்பெற்றுள்ளதாக கூறப்படுகிறது. மேலும் ஸ்ரீ ராம ஜென்ம பூமி அறக்கட்டளையின் நிர்வாக அமைப்பில் மாற்றங்கள் கொண்டு வர வேண்டும் என்ற பரிந்துரைகளும் அரசிடம் வழங்கப்பட்டுள்ளதாக தகவல் வெளியாகியுள்ளது.
இந்த அறிக்கையின் அடிப்படையில் உத்தரப் பிரதேச காவல்துறை ஏற்கனவே 8 பேர் மீது வழக்குப் பதிவு செய்து விசாரணையை முன்னெடுத்து வருகிறது. மேலும் சிலர் மீது நடவடிக்கை எடுக்கப்படும் வாய்ப்பும் இருப்பதாக அதிகாரிகள் தெரிவித்துள்ளனர்.
இந்த விவகாரம் குறித்து கருத்து தெரிவித்த முதலமைச்சர் யோகி ஆதித்யநாத், “அயோத்தி என்பது ஒரு நகரம் மட்டுமல்ல. அது சனாதன தர்மத்தின் அடையாளம். கோடிக்கணக்கான மக்களின் நம்பிக்கை மற்றும் பக்தியின் மையமாக அது விளங்குகிறது. அந்த நம்பிக்கையை யாரும் தவறாக பயன்படுத்த அனுமதிக்க முடியாது” என்று கூறினார்.
மேலும் அவர், “உண்மைக்கும் பொய்க்கும் இடையிலான வேறுபாட்டை வெளிக்கொண்டு வருவதற்கு அரசு உறுதிபூண்டுள்ளது. பொதுமக்களின் நம்பிக்கையுடன் விளையாடுபவர்களுக்கு எந்தவித சலுகையும் வழங்கப்படாது. குற்றம் நிரூபிக்கப்பட்டவர்கள் மீது கடுமையான சட்ட நடவடிக்கை எடுக்கப்படும்” என்று தெரிவித்தார்.
“சனாதன தர்மத்தின் மீது மக்கள் வைத்துள்ள நம்பிக்கையை குலைக்கும் எந்த முயற்சியையும் அரசு சகித்துக்கொள்ளாது. யார் இதில் தொடர்புடையவர்களாக இருந்தாலும் அவர்கள் சட்டத்தின் முன் பதில் சொல்ல வேண்டியிருக்கும்” என்றும் யோகி ஆதித்யநாத் எச்சரித்தார்.
அயோத்தி ராமர் கோவில் தொடர்பான இந்த விவகாரம் நாடு முழுவதும் கவனத்தை ஈர்த்துள்ள நிலையில், எஸ்ஐடி விசாரணையின் இறுதி அறிக்கை வெளியாகும் வரை மேலும் பல முக்கிய தகவல்கள் வெளிச்சத்துக்கு வரலாம் என எதிர்பார்க்கப்படுகிறது.
