தமிழக சட்டப்பேரவையில் திமுக மற்றும் தவெக எம்.எல்.ஏ.க்கள் இடையே ஏற்பட்ட கடும் வாக்குவாதத்தால் பரபரப்பு ஏற்பட்டது. கனிமவள விவகாரம் தொடர்பான விவாதத்தின்போது இரு தரப்பு உறுப்பினர்களும் ஒருவருக்கொருவர் கடுமையான குற்றச்சாட்டுகளை முன்வைத்தனர்.
விவாதத்தின்போது பொதுப்பணித்துறை அமைச்சர் ஆதவ் அர்ஜுனா, மதுரையைச் சேர்ந்த முன்னாள் அமைச்சர் ஒருவர் கனிமவளங்களை தனது கட்டுப்பாட்டில் வைத்திருப்பதாக குற்றம்சாட்டியதாக தகவல்கள் தெரிவிக்கின்றன. இதற்கு பதிலளித்த திமுக முன்னாள் அமைச்சர் எ.வ. வேலு, ஆதாரமின்றி குற்றச்சாட்டுகளை முன்வைக்கக் கூடாது என எதிர்ப்பு தெரிவித்தார். இதனால் இரு தரப்புக்கும் இடையே கடும் வார்த்தை மோதல் ஏற்பட்டது.
தொடர்ந்து இரு தரப்பு உறுப்பினர்களும் எழுந்து நின்று கடுமையாக வாக்குவாதத்தில் ஈடுபட்டதால் அவையில் சலசலப்பு ஏற்பட்டது. சூழ்நிலை கட்டுக்கடங்காமல் சென்ற நிலையில், சபாநாயகர் ஜே.சி.டி. பிரபாகர் குறுக்கிட்டு உறுப்பினர்களை அமைதியாக இருக்குமாறு அறிவுறுத்தினார்.
அவையில் இரு தரப்பிலும் உள்ள இளம் உறுப்பினர்கள் எல்லை மீறக்கூடாது என்றும், சட்டப்பேரவையின் கண்ணியத்தை அனைவரும் காப்பாற்ற வேண்டும் என்றும் சபாநாயகர் எச்சரித்தார். உறுப்பினர்களின் நடவடிக்கைகள் மக்களால் கவனிக்கப்படுகின்றன என்பதையும் அவர் சுட்டிக்காட்டினார்.
இதனிடையே, முந்தைய நாள் பரந்தூர் விமான நிலைய விவகாரம் தொடர்பான விவாதத்திலும் திமுக–தவெக உறுப்பினர்களுக்கு இடையே கடும் வார்த்தைப் போர் நடைபெற்றிருந்தது. இதனால் தமிழக சட்டப்பேரவை கூட்டத்தொடரில் ஆளும் தவெக மற்றும் எதிர்க்கட்சியான திமுக இடையேயான அரசியல் மோதல் தொடர்ந்து கவனம் பெற்றுள்ளது.
