அர்ஜென்டினா கால்பந்து அணியின் சூப்பர் ஸ்டார் லியோனல் மெஸ்சி, இந்தியாவில் மேற்கொண்ட 3 நாள் பயணத்தை நிறைவு செய்த பின்னர், இந்திய ரசிகர்களுக்கு நன்றி தெரிவிக்கும் வகையில் தனது இன்ஸ்டாகிராம் பக்கத்தில் ஒரு சிறப்பு வீடியோவை வெளியிட்டுள்ளார். இந்தியாவில் அவர் இருந்த நாட்களில் ரசிகர்கள் அளித்த அன்பும் வரவேற்பும் அவரை ஆழமாக கவர்ந்ததாக அந்த வீடியோவில் தெரிவித்துள்ளார்.
மெஸ்சி, கொல்கத்தா, ஐதராபாத், மும்பை, டெல்லி ஆகிய நான்கு நகரங்களில் நடைபெற்ற பல்வேறு நிகழ்ச்சிகளில் பங்கேற்றார். ஒவ்வொரு நகரிலும் ஆயிரக்கணக்கான ரசிகர்கள் அவரை வரவேற்று, அவருடன் நேரடியாக சந்திக்கும் வாய்ப்பைப் பெற்றனர். இந்தியாவில் கால்பந்து வளர்ச்சி குறித்து அவர் பல்வேறு நிகழ்ச்சிகளில் கருத்து தெரிவித்ததுடன், இளம் வீரர்களை ஊக்குவிக்கும் நிகழ்ச்சிகளிலும் பங்கேற்றார்.
முதலில் திட்டமிடப்பட்டபடி 3 நாள் பயணத்தை முடித்து நாடு திரும்ப வேண்டியிருந்த நிலையில், அவரது பயணம் மேலும் ஒரு நாள் நீட்டிக்கப்பட்டது. குஜராத் மாநிலம் ஜாம்நகரில் உள்ள ஆனந்த் அம்பானியின் வனதாரா உயிரியல் பூங்காவை அவர் நேரில் சென்று பார்வையிட்டார். அங்கு அரிய விலங்குகள், பாதுகாப்பு நடவடிக்கைகள் மற்றும் சுற்றுச்சூழல் பராமரிப்பு குறித்து அவர் ஆர்வமாக அறிந்துகொண்டதாக தகவல்கள் தெரிவிக்கின்றன. அதன் பின்னர் அவர் அமெரிக்காவுக்கு புறப்பட்டார்.
இந்திய பயணத்தை முடித்த பின் வெளியிட்ட வீடியோவில் மெஸ்சி கூறியதாவது: “நமஸ்தே இந்தியா. டெல்லி, மும்பை, ஐதராபாத், கொல்கத்தா என அற்புதமான பயணம். இந்த சுற்றுப் பயணம் முழுவதும் நீங்கள் அளித்த அன்பான வரவேற்புக்கும், சிறப்பான விருந்தோம்பலுக்கும், அன்பின் வெளிப்பாட்டுக்கும் மனமார்ந்த நன்றி. இந்தியாவில் கால்பந்துக்கு பிரகாசமான எதிர்காலம் இருக்கிறது.”
இந்த வீடியோ சில நிமிடங்களில் சமூக வலைதளங்களில் வைரலாக பரவியது. இந்திய ரசிகர்கள், மெஸ்சியின் இந்த அன்பான நன்றியை பெருமையாக பகிர்ந்து வருகின்றனர். குறிப்பாக, இந்தியாவில் கால்பந்தின் வளர்ச்சியைப் பற்றி அவர் கூறிய பாராட்டு, இளம் வீரர்களுக்கும் ரசிகர்களுக்கும் பெரும் உற்சாகத்தை ஏற்படுத்தியுள்ளது.
மெஸ்சியின் இந்த பயணம், இந்தியாவில் கால்பந்தின் பிரபலத்தையும், உலக தரத்திலான வீரர்கள் இந்தியாவை எப்படி பார்க்கிறார்கள் என்பதையும் வெளிப்படுத்தும் வகையில் முக்கியத்துவம் பெற்றதாக விளையாட்டு வட்டாரங்கள் மதிப்பிடுகின்றன.
