வடகொரியா:
வடகொரியாவின் ஆளும் தொழிலாளர் கட்சியின் பொதுச் செயலாளராக, தற்போதைய தேசிய தலைவர் கிம் ஜாங் அன் மீண்டும் ஒருமனதாகத் தேர்ந்தெடுக்கப்பட்டுள்ளார். தலைநகர் பியாங்யாங்கில் நடைபெற்ற தொழிலாளர் கட்சியின் 9வது தேசிய மாநாட்டில் இந்த தீர்மானம் எடுக்கப்பட்டது.
2011ஆம் ஆண்டு முன்னாள் தலைவர் கிம் ஜாங் இல் மறைந்ததைத் தொடர்ந்து, அவரது மகனான கிம் ஜாங் அன் நாட்டின் தலைமை பொறுப்பை ஏற்றார். அதன் பிறகு அவர் நாட்டின் முக்கிய நிர்வாக, இராணுவ மற்றும் அரசியல் அமைப்புகளின் தலைவராகப் பொறுப்பேற்று, நாட்டின் உச்ச அதிகாரத்தை ஒருங்கிணைத்து வருகிறார்.
2019ஆம் ஆண்டில் வடகொரிய அரசியல் சாசனத்தில் செய்யப்பட்ட திருத்தத்தின் மூலம், நாட்டின் உச்ச தலைவரே அனைத்து அரசியல், பொருளாதார, இராணுவ துறைகளுக்கும் ஒரே தலைவராக அறிவிக்கப்பட்டார். இதன் மூலம் கிம் ஜாங் அன்னின் அதிகாரம் மேலும் உறுதிப்படுத்தப்பட்டது. தற்போது நடைபெற்ற கட்சித் தீர்மானம், அவரது தலைமையின் நிலைப்பாட்டை மறுபடியும் வலுப்படுத்துவதாகக் கருதப்படுகிறது.
மாநாட்டில் உரையாற்றிய கட்சி பிரதிநிதிகள், நாட்டின் அணு ஆயுத திறன், ஏவுகணை பாதுகாப்புத் திறன் மற்றும் தற்காப்புத் திறனை மேம்படுத்தியதற்காக கிம் ஜாங் அன்னுக்கு பாராட்டுகள் தெரிவித்தனர். மேலும், வடகொரியாவின் பொருளாதார தன்னிறைவு மற்றும் தொழில்நுட்ப முன்னேற்றத்திற்கான அவரது முயற்சிகளும் சிறப்பாகக் குறிப்பிடப்பட்டன.
இந்த முடிவுக்கு உலக தலைவர்களும் வாழ்த்துகளைத் தெரிவித்துள்ளனர். சீன அதிபர் ஸி ஜின்பிங் மற்றும் ரஷ்ய அதிபர் விளாடிமிர் புதின் ஆகியோர் தனித்தனியாக அனுப்பிய வாழ்த்து செய்திகளில், கிம் ஜாங் அன்னின் தலைமையில் வடகொரியா–சீனா மற்றும் வடகொரியா–ரஷ்யா உறவுகள் மேலும் வலுப்பெறும் என நம்பிக்கை தெரிவித்துள்ளனர்.
வடகொரியாவில் கிம் ஜாங் அன்னின் தலைமையும், அவரின் ஆட்சிக் கட்டுப்பாடும் தொடர்ந்து வலுவடைந்து வருவதாக அரசியல் வட்டாரங்கள் மதிப்பிடுகின்றன.
