அம்பத்தூரில் பெண் எஸ்.ஐ மரணம் – விசாரணை தீவிரம்; உதவி ஆய்வாளர் இடைநீக்கம்
அம்பத்தூர்: சென்னை அம்பத்தூர் போலீஸ் நிலையத்தில் சட்டம்-ஒழுங்கு பிரிவில் பணியாற்றி வந்த சப்-இன்ஸ்பெக்டர் அந்தோணி மாதா (31) மரணமடைந்த சம்பவம் போலீஸ் துறையில் பெரும் அதிர்ச்சியை ஏற்படுத்தியுள்ளது. விருதுநகர் மாவட்டத்தைச் சேர்ந்த அவர், 2015ஆம் ஆண்டு யோவான் என்பவரை திருமணம் செய்துகொண்டார். தம்பதிக்கு 10 மற்றும் 8 வயதுடைய இரண்டு மகன்கள் உள்ளனர். கருத்து வேறுபாடுகள் காரணமாக கடந்த மூன்று ஆண்டுகளாக அந்தோணி மாதா, கணவரை பிரிந்து அம்பத்தூர் கிருஷ்ணாபுரத்தில் தனியாக வசித்து வந்தார்.
2021ஆம் ஆண்டு சப்-இன்ஸ்பெக்டராக பணியில் சேர்ந்த அவர், அதே காலகட்டத்தில் பணியில் இணைந்த மற்றொரு அதிகாரியுடன் நெருக்கமாக பழகியிருந்ததாக தகவல்கள் தெரிவிக்கின்றன. கடந்த சில மாதங்களாக அவர்களுக்குள் ஏற்பட்ட கருத்து வேறுபாடுகள் காரணமாக அந்த உறவு தளர்ந்ததாகவும், இதனால் அந்தோணி மாதா மன அழுத்தத்தில் இருந்திருக்கலாம் என்றும் விசாரணை வட்டாரங்கள் கூறுகின்றன.
சம்பவம் நடந்த இரவு, அந்தோணி மாதா தனது சக அதிகாரியுடன் தொலைபேசியில் பேசியதாகவும், பின்னர் அவரை தொடர்பு கொள்ள முடியாத சூழ்நிலை ஏற்பட்டதாகவும் கூறப்படுகிறது. இதனால் ஏற்பட்ட சந்தேகத்தின் பேரில் போலீசார் அவரது வீட்டுக்கு சென்றனர். அங்கு அவர் உயிரிழந்த நிலையில் கண்டுபிடிக்கப்பட்டார். உடல் பிரேத பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பப்பட்டது.
இந்த சம்பவம் குறித்து அம்பத்தூர் போலீசார் வழக்குப்பதிவு செய்து விசாரணை மேற்கொண்டு வருகின்றனர். இரண்டு சிறுவர்கள் தாயை இழந்த நிலையில், குடும்பத்தினர் மற்றும் சக போலீசார் பெரும் துயரத்தில் உள்ளனர்.
இதற்கிடையில், இந்த மரணம் தொடர்பான விசாரணையின் ஒரு பகுதியாக மீஞ்சூர் காவல் நிலையத்தில் உதவி ஆய்வாளராக பணியாற்றி வந்த ரஞ்சித் என்பவர் இடைநீக்கம் செய்யப்பட்டுள்ளார். அந்தோணி மாதா குடும்பத்தினர் வழங்கிய தகவல்களின் அடிப்படையில் இந்த நடவடிக்கை எடுக்கப்பட்டதாக கூறப்படுகிறது. சம்பவத்தின் முழு பின்னணியும், காரணங்களும் வெளிச்சத்துக்கு வர போலீசார் தீவிரமாக விசாரணை நடத்தி வருகின்றனர்.
