புதுச்சேரியில் ஆன்லைன் வர்த்தகத்தில் அதிக லாபம் கிடைக்கும் என்ற ஆசையில் முதலீடு செய்த வங்கி அதிகாரி ஒருவர் ரூ.1.23 கோடியை இழந்த சம்பவம் அதிர்ச்சியை ஏற்படுத்தியுள்ளது. இந்த மோசடி குறித்து சைபர் கிரைம் போலீசார் தீவிர விசாரணை நடத்தி வருகின்றனர்.

புதுச்சேரி மாநிலம் பாகூர் பகுதியை சேர்ந்த வங்கி அதிகாரி ஒருவரின் வாட்ஸ் அப் எண்ணுக்கு சில நாட்களுக்கு முன்பு ஒரு குறுந்தகவல் வந்துள்ளது. அதில் ஆன்லைன் வர்த்தகத்தில் முதலீடு செய்தால் குறுகிய காலத்தில் பல மடங்கு லாபம் பெறலாம் என கூறப்பட்டிருந்தது. மேலும், முதலீட்டாளர்களுக்கு பாதுகாப்பான மற்றும் அதிக வருமானம் தரும் திட்டம் என்றும் விளம்பரப்படுத்தப்பட்டிருந்தது.

இந்த தகவலை நம்பிய வங்கி அதிகாரி ஆரம்பத்தில் சிறிய தொகையை முதலீடு செய்துள்ளார். அந்த முதலீட்டிற்கு சில நாட்களில் கணிசமான லாபம் கிடைத்ததாக ஆன்லைன் தளத்தில் காட்டப்பட்டது. இதனால் அந்த முதலீட்டு திட்டத்தின் மீது அவருக்கு முழு நம்பிக்கை ஏற்பட்டது.

இதையடுத்து அவர் தொடர்ந்து பல கட்டங்களாக பணத்தை முதலீடு செய்ய தொடங்கினார். மொத்தமாக 20 தவணைகளில் ரூ.1 கோடியே 23 லட்சத்து 50 ஆயிரம் வரை முதலீடு செய்ததாக கூறப்படுகிறது. ஒவ்வொரு முதலீட்டிற்கும் அதிக லாபம் கிடைத்ததாக கணக்கில் காட்டப்பட்டதால் அவர் மேலும் முதலீடு செய்ய ஊக்குவிக்கப்பட்டார்.

ஒரு கட்டத்தில் அவரது கணக்கில் பல கோடி ரூபாய் லாபம் சேர்ந்திருப்பதாக அந்த இணையதளம் காட்டியது. இதனால் மகிழ்ச்சியடைந்த அவர் அந்த தொகையை தனது வங்கி கணக்கிற்கு மாற்ற முயன்றார். ஆனால் பணத்தை திரும்பப் பெற முடியவில்லை. பலமுறை முயற்சித்தும் பணம் வராததால் சந்தேகமடைந்த அவர் சம்பந்தப்பட்டவர்களை தொடர்பு கொள்ள முயன்றார்.

ஆனால் அவர்களிடம் இருந்து எந்த பதிலும் கிடைக்காத நிலையில், தான் மோசடிக்குள்ளாகியிருப்பதை உணர்ந்தார். இதையடுத்து அவர் உடனடியாக புதுச்சேரி சைபர் கிரைம் போலீசில் புகார் அளித்தார். புகாரின் அடிப்படையில் போலீசார் வழக்குப்பதிவு செய்து விசாரணையை தொடங்கியுள்ளனர்.

இந்த மோசடியில் பயன்படுத்தப்பட்ட வங்கி கணக்குகள், மொபைல் எண்கள் மற்றும் இணையதள முகவரிகள் குறித்து தொழில்நுட்ப நிபுணர்கள் உதவியுடன் போலீசார் ஆய்வு செய்து வருகின்றனர். பணம் எந்த கணக்குகளுக்கு மாற்றப்பட்டது மற்றும் இதன் பின்னணியில் உள்ள கும்பல் யார் என்பது குறித்து விசாரணை நடைபெற்று வருகிறது.

இதற்கிடையில் புதுச்சேரியின் பல்வேறு பகுதிகளில் இதேபோன்ற இணைய மோசடிகள் அதிகரித்து வருவதாகவும் தகவல்கள் வெளியாகியுள்ளன. லாஸ்பேட்டை, முதலியார்பேட்டை, முத்தியால்பேட்டை உள்ளிட்ட பகுதிகளில் குறைந்த வட்டிக்கு கடன் தருவதாகவும், போலியான இணையதள இணைப்புகளை அனுப்பியும் பலரிடம் பணம் பறிக்கப்பட்டுள்ளது.

ஒரே நாளில் 5 பேரிடம் ரூ.1.48 லட்சத்திற்கும் மேல் மோசடி செய்யப்பட்டுள்ளதாக சைபர் கிரைம் போலீசார் தெரிவித்துள்ளனர். பொதுமக்கள் சமூக வலைதளங்கள் மற்றும் மெசேஜ்கள் மூலம் வரும் முதலீட்டு சலுகைகளை நம்பி பணம் செலுத்த வேண்டாம் என்றும், சந்தேகமான இணைப்புகளை திறக்காமல் எச்சரிக்கையுடன் இருக்க வேண்டும் என்றும் போலீசார் அறிவுறுத்தியுள்ளனர்.