திருச்செந்தூர்:
முருகப்பெருமானின் அறுபடை வீடுகளில் இரண்டாவது படைவீடாக விளங்கும் திருச்செந்தூர் சுப்பிரமணியசுவாமி திருக்கோவிலில் மாசித் திருவிழா கொடியேற்ற விழாவுடன் சிறப்பாக தொடங்கியது.
விழாவை முன்னிட்டு கோவில் நடை அதிகாலை 1 மணிக்கு திறக்கப்பட்டது. தொடர்ந்து 1.30 மணிக்கு விஸ்வரூப தரிசனம் நடைபெற்றது. காலை 2 மணிக்கு உதய மார்த்தாண்ட அபிஷேகம் சிறப்பாக நடைபெற்று, பக்தர்கள் பக்திபூர்வமாக கலந்து கொண்டனர். பின்னர் காலை 5.09 மணிக்கு கோவில் த்வஜஸ்தம்பத்தில் கொடியேற்றம் நடைபெற்றது.
இந்த நிகழ்வில் திருவாவடுதுறை ஆதீன தம்பிரான் சுவாமிகள், கோவில் இணை ஆணையர் ராமு, உதவி ஆணையர் மெய்வேல், ஏரல் சேர்மன் அருணாசல சுவாமி, கோவில் தக்கார் கருத்தபாண்டி நாடார், இந்து முன்னணி மாநில துணைத் தலைவர் வி.பி. ஜெயக்குமார், தூத்துக்குடி தெற்கு மாவட்ட தலைவர் அருணாசலம், திருச்செந்தூர் நகராட்சி துணை சேர்மன் செங்குழி ரமேஷ், சைவ வேளாளர் ஐக்கிய சங்க முன்னாள் தலைவர் ஜெயந்திநாதன், முன்னாள் செயலாளர் சந்தணராஜ், கவுன்சிலர் ரேவதி கோமதி நாயகம் உள்ளிட்ட பலர் கலந்து கொண்டு சுவாமி தரிசனம் செய்தனர்.
கொடியேற்றத்தை தொடர்ந்து கொடி மரத்துக்கு பல்வேறு அபிஷேகப் பொருட்களால் அபிஷேகம் மற்றும் அலங்காரம் நடைபெற்றது. பின்னர் தீபாராதனை நடைபெற்றது. காலை 10 மணிக்கு உச்சிகால அபிஷேகம் நடைபெற்றது. மாலை 4 மணிக்கு சாயரட்சை தீபாராதனை, இரவு 7 மணிக்கு இராக்கால அபிஷேகம் நடைபெறுகிறது.
மாசித் திருவிழா பத்துநாட்கள் நடைபெற உள்ளது. இதில் 5-ம் திருவிழாவான 25-ந்தேதி இரவு 7.30 மணிக்கு மேல் குடைவரை வாயில் தீபாராதனை நடைபெறும். 7-ம் திருவிழா நாளான 27-ந்தேதி அதிகாலை 1 மணிக்கு கோவில் நடை திறக்கப்பட்டு, காலை 5 மணிக்கு உருகு சட்ட சேவை நடைபெறும். அதன் பின்னர் காலை 9 மணிக்கு சுவாமி சண்முகர் வெற்றிவேர் சப்பரத்தில் எழுந்தருளி பக்தர்களுக்கு அருள்பாலிப்பார்.
அன்று மாலை 4.30 மணிக்கு சிவன் அம்சமாக சிவப்பு சாத்தி கோலத்தில் வீதியுலா நடைபெறும். 8-ம் திருவிழாவான 28-ந்தேதி காலை 6 மணிக்கு சுவாமி சண்முகர் பிரம்மன் அம்சமாக வெள்ளை சாத்தி கோலத்தில் 8 வீதிகளிலும் உலா வந்து கோவிலில் சேர்வார்.
அதனைத் தொடர்ந்து காலை 10.30 மணிக்கு விஷ்ணு அம்சமாக பச்சை சாத்தி கோலத்தில் சுவாமி எழுந்தருளி 8 வீதிகளிலும் உலா வந்து மேலக்கோவில் சேர்தல் நிகழும்.
விழாவின் முக்கிய நிகழ்வான 10-ம் திருவிழா தேரோட்டம் வரும் (மார்ச்) 2-ந்தேதி காலை 7 மணிக்கு நடைபெறும். இதனை தொடர்ந்து 11-ம் திருவிழா நாளான 3-ந்தேதி இரவு 10.30 மணிக்கு தெப்பத்திலே சுவாமி சண்முகர் 11 சுற்றுகள் சுற்றி வந்து மேலக்கோவில் சேர்வார்.
முழு விழாவிற்கான ஏற்பாடுகளை கோவில் தக்கார் அருள் முருகன், இணை ஆணையர் ராமு மற்றும் கோவில் பணியாளர்கள் இணைந்து சிறப்பாக செய்து வருகின்றனர். இந்த மாசித் திருவிழாவில் தினந்தோறும் ஆயிரக்கணக்கான பக்தர்கள் பங்கேற்று, திருச்செந்தூர் கடற்கரையில் அமைந்துள்ள சுப்பிரமணியசுவாமியை தரிசித்து ஆன்மீக மகிழ்ச்சி அடைந்து வருகின்றனர்.
