சென்னை:
தமிழக அரசுக்கும் மத்திய அரசுக்கும் இடையிலான அரசியல், நிதி மற்றும் திட்ட ஒத்துழைப்பு விவகாரங்களில் நேற்று ஒரே நாளில் இரட்டை அதிரடி சம்பவங்கள் நிகழ்ந்தன. முதல்வர் மு.க. ஸ்டாலின் மற்றும் திமுக எம்பி வில்சன் முன்வைத்த குற்றச்சாட்டுகளுக்கு மத்திய அமைச்சர்கள் அஸ்வினி வைஷ்ணவ் மற்றும் நிர்மலா சீதாராமன் ஆகியோர் பதிலடி அளித்தனர்.
முதலில், முதல்வர் ஸ்டாலின், “தமிழகத்தில் நடைபெறும் ரயில்வே திட்டங்களுக்கு போதிய நிதி வழங்கப்படவில்லை. நிலுவையில் உள்ள திட்டங்களை விரைந்து முடிக்க மத்திய அரசு நடவடிக்கை எடுக்க வேண்டும்” என கோரிக்கை விடுத்திருந்தார். இதற்கு பதிலளித்த மத்திய ரயில்வே அமைச்சர் அஸ்வினி வைஷ்ணவ், மாநில அரசு நிலம் கையகப்படுத்துவதில் தாமதம் செய்வதே திட்டங்கள் மெதுவாக நடைபெற காரணம் எனக் கூறினார்.
அவர் வெளியிட்ட அறிக்கையில், “2026–27 நிதியாண்டுக்கான பட்ஜெட்டில் தமிழகத்திற்காக ரூ. 7,611 கோடி ஒதுக்கப்பட்டுள்ளது. இது 2014-க்கு முன் அளிக்கப்பட்ட சராசரி நிதியை விட 8.5 மடங்கு அதிகம். ஆனால், தமிழகத்தில் மொத்தம் 4,326 ஹெக்டேர் நிலம் தேவைப்படுகின்ற நிலையில், இதுவரை 1,052 ஹெக்டேர் நிலம் மட்டுமே கையகப்படுத்தப்பட்டுள்ளது,” என்றார்.
மேலும், மதுரை–தூத்துக்குடி (அருப்புக்கோட்டை வழியாக) ரயில் பாதை, திண்டிவனம்–திருவண்ணாமலை பாதை போன்ற திட்டங்களில் 86–91 சதவீதம் நிலம் இன்னும் கையகப்படுத்தப்படவில்லை என்றும், ராமேஸ்வரம்–தனுஷ்கோடி பாதை 2019-இல் அடிக்கல் நாட்டப்பட்டிருந்தாலும் மாநிலத்தின் ஒத்துழைப்பு இல்லாததால் தொடங்கப்படவில்லை என்றும் தெரிவித்தார்.
அஸ்வினி வைஷ்ணவ் மேலும் கூறியதாவது: “தமிழகத்தில் ‘அம்ரித் பாரத்’ திட்டத்தின் கீழ் 77 ரயில் நிலையங்கள் தேர்வு செய்யப்பட்டுள்ளன. அதில் 18 ரயில் நிலையங்கள் பணிகள் முடிந்துள்ளன. 9 வந்தே பாரத் ரயில்கள் தற்போது இயக்கப்பட்டு வருகின்றன,” என்றார்.
இதே நேரத்தில், திமுக மாநிலங்களவை உறுப்பினர் வில்சன், மத்திய பட்ஜெட்டை கடுமையாக விமர்சித்தார். “மத்திய அரசு கூறும் ‘வளர்ந்த இந்தியா’ என்ற கூற்று உண்மைக்கு புறம்பானது. நிதிப் பற்றாக்குறை மிக குறைந்த அளவிலேயே குறைகிறது. மொத்த உள்நாட்டு உற்பத்தியில் கடன் விகிதம் இன்னும் 56 சதவீதத்துக்கு மேல் உள்ளது. தமிழகம் உள்ளிட்ட வளர்ந்த மாநிலங்கள் திட்டமிட்ட விதத்தில் புறக்கணிக்கப்படுகின்றன,” என்று அவர் கூறினார்.
அத்துடன், “கோயம்புத்தூர் மற்றும் மதுரை மெட்ரோ திட்டங்களுக்கு அனுமதி அளிக்கவில்லை. ஜல் ஜீவன் திட்டத்தில் தமிழகம் கோரிய ரூ. 3,112 கோடி இன்னும் விடுவிக்கப்படவில்லை,” என்றும் குற்றம்சாட்டினார்.
இதற்கு பதிலளித்த மத்திய நிதியமைச்சர் நிர்மலா சீதாராமன், வில்சனின் குற்றச்சாட்டுகளை “ஆதாரமற்றவை” என மறுத்தார்.
அவர் குறிப்பிட்டதாவது, “பட்ஜெட்டில் தமிழகத்திற்கு பல திட்டங்கள் உள்ளன — அரிய கனிம பொருளாதார வழித்தடம், ஆழ்கடல் மீன்பிடிப்பு, பெண்கள் விடுதி, தேங்காய் மேம்பாட்டுத் திட்டம், மற்றும் சென்னை–பெங்களூரு அதிவேக ரயில் பாதை போன்றவை. மேலும், ஆதிச்சநல்லூர் மற்றும் பழவேற்காடு சுற்றுலா மேம்பாட்டு திட்டங்களும் தமிழ்நாட்டுக்கான முக்கிய முயற்சிகளாக உள்ளன,” என்றார்.
இதன் மூலம், ஒரே நாளில் திமுகவின் குற்றச்சாட்டுகளுக்கு மத்திய அமைச்சர்கள் இருவரும் நேரடியாக பதிலடி கொடுத்ததால், மாநில–மத்திய அரசுகளுக்கு இடையிலான அரசியல் சூடேற்றம் மீண்டும் அதிகரித்துள்ளது.
