சென்னை,
தமிழக சட்டமன்றத் தேர்தல் சூழல் சூடுபிடித்துள்ள நிலையில், தமிழக வெற்றிக் கழகத்தின் தேர்தல் மேலாண்மை பொதுச்செயலாளர் ஆதவ் அர்ஜூனா தெரிவித்த கருத்து அரசியல் வட்டாரங்களில் பரபரப்பை ஏற்படுத்தியுள்ளது.
சென்னையில் செய்தியாளர்களிடம் பேசிய அவர், “ஒட்டுமொத்த வடசென்னையும் திமுகவுக்கு எதிராக மாறியுள்ளது. ஆனால், சென்னை 16 தொகுதிகளில் 13 தொகுதிகளில் திமுக மிகப்பெரிய அளவில் வெற்றி பெறும்” என்று கூறியுள்ளார். இந்த முரண்பட்ட கருத்து உடனடியாக கவனத்தை ஈர்த்ததுடன், சமூக வலைதளங்களில் பரவலாக பேசப்பட்டது.
இந்த கருத்து வெளிவந்தது, ஏற்கனவே விஜய் பிரச்சாரங்களில் ஏற்பட்ட சில தவறுகளின் பின்னணியில் என்பதால், இது மேலும் விவாதத்தை கிளப்பியுள்ளது. குறிப்பாக, புதுச்சேரியில் நடைபெற்ற பிரச்சாரத்தில் விஜய் தனது கட்சியின் வேட்பாளருக்கு பதிலாக தவறுதலாக மற்றொரு கட்சியின் வேட்பாளர் பெயரை கூறிய சம்பவம் பேசுபொருளாகியுள்ளது.
மணவெளி தொகுதியில் தவெக வேட்பாளர் ராமுவுடன் பிரச்சாரம் மேற்கொண்ட விஜய், “செல்வத்திற்கு வாக்களியுங்கள்” என்று கூறியிருந்தார். பின்னர் வேட்பாளர் நினைவூட்டியதால், தனது தவறை திருத்திக் கொண்டு “ராமுவுக்கு வாக்களியுங்கள்” என்று மாற்றினார். இந்த வீடியோ சமூக வலைதளங்களில் வேகமாக பரவியது.
இந்த சூழலில், ஆதவ் அர்ஜூனா கூறிய “13 தொகுதிகளில் திமுக வெற்றி” என்ற கருத்தும் விமர்சனத்திற்கு உள்ளாகியுள்ளது. ஒருபுறம் திமுகக்கு எதிராக நிலைமையை கூறி, மறுபுறம் அவர்களே வெற்றி பெறுவார்கள் எனக் கூறியிருப்பது குழப்பத்தை ஏற்படுத்தியுள்ளது.
இதனால், “தலைவன் எவ்வழியோ, தொண்டனும் அவ்வழி” என்ற விமர்சனங்களும் எழுந்துள்ளன. தேர்தல் நேரத்தில் இத்தகைய கருத்துக்கள் கட்சியின் படிமத்தையும், வாக்காளர்களின் நம்பிக்கையையும் பாதிக்கக்கூடும் என அரசியல் ஆய்வாளர்கள் கருத்து தெரிவிக்கின்றனர்.
மொத்தத்தில், ஆதவ் அர்ஜூனா தெரிவித்த இந்த கருத்து மற்றும் அதனைச் சுற்றியுள்ள சம்பவங்கள், தேர்தல் களத்தில் புதிய விவாதத்தை ஏற்படுத்தியுள்ளதுடன், சமூக வலைதளங்களில் பரபரப்பை அதிகரித்துள்ளது.
