ஆந்திர மாநில அரசால் பறிமுதல் செய்யப்பட்டுள்ள தமிழக மீனவர்களின் மீன்பிடி விசைப்படகுகளை உடனடியாக விடுவிக்க ஆந்திர அரசுடன் தமிழக அரசு பேச்சுவார்த்தை நடத்தி சுமூகத் தீர்வு காண வேண்டும் என்று தமிழ் மாநில காங்கிரஸ் (தமாகா) தலைவர் ஜி.கே.வாசன் வலியுறுத்தியுள்ளார். இது தொடர்பாக அவர் வெளியிட்டுள்ள அறிக்கையின் விவரம் பின்வருமாறு:
இலங்கை கடற்படையினர் தமிழக மீனவர்களை அடிக்கடி கைது செய்வதும், அவர்களின் மீன்பிடி படகுகளைப் பறிமுதல் செய்வதும் தொடர்ந்து பல்வேறு இன்னல்களை ஏற்படுத்தி வருவதுடன், மீனவர்களின் வாழ்வாதாரத்தைக் கடுமையாகப் பாதித்து வருகிறது. இந்நிலையில், அண்டை மாநிலமான ஆந்திர அரசும் எல்லைக்கு அருகில் மீன்பிடிக்கச் செல்லும் தமிழக மீனவர்களைக் கைது செய்வதும், அவர்களின் விசைப்படகுகளைக் கைப்பற்றுவதும் மிகுந்த வருத்தத்தை அளிப்பதாக ஜி.கே.வாசன் தனது அறிக்கையில் குறிப்பிட்டுள்ளார்.
குறிப்பாக, கடந்த ஜூன் 16ஆம் தேதியன்று சென்னையைச் சேர்ந்த மீனவர்கள் கடலில் மீன்பிடித்துக் கொண்டிருந்த போது, எல்லை தாண்டி மீன்பிடித்ததாகக் கூறி ஆந்திரக் கடலோரக் காவல் படையினரால் கைது செய்யப்பட்டனர். மேலும், அவர்களது 7 மீன்பிடி விசைப்படகுகளும் பறிமுதல் செய்யப்பட்டன. அந்தப் படகுகள் இதுவரை விடுவிக்கப்படாமல் உள்ளதால், தங்களது வாழ்வாதாரத்தை முழுமையாக இழந்து மீனவர்கள் மிகுந்த மனவேதனைக்கு ஆளாகியுள்ளனர் என்று அவர் சுட்டிக்காட்டியுள்ளார்.
எனவே, தமிழக மீனவர்களின் வாழ்வாதாரம் எந்தவிதத்திலும் பாதிக்கப்படாமல் காக்கும் வகையில், தமிழக அரசு உடனடியாக ஆந்திர அரசுடன் உயர் மட்டத்தில் சுமூகமாகப் பேசி இதற்கு ஒரு நிரந்தரத் தீர்வை எட்ட வேண்டும். வருங்காலங்களில் இது போன்ற சம்பவங்கள் மீண்டும் நிகழாமல் இருக்க உரிய பாதுகாப்பு நடவடிக்கைகளை மேற்கொள்ள வேண்டும். மேலும், ஆந்திராவில் தற்போது முடக்கப்பட்டுள்ள 7 மீன்பிடி விசைப்படகுகளையும் உடனடியாக விடுவிக்க ஆந்திர அரசை வலியுறுத்த வேண்டும் என்று தமிழ் மாநில காங்கிரஸ் சார்பில் அவர் கேட்டுக்கொண்டுள்ளார்.
