சென்னை: தமிழக சட்டப்பேரவையில் இன்று (செப்டம்பர் 1) கேள்வி நேரத்தைத் தொடர்ந்து முக்கிய துறைகளின் மானியக் கோரிக்கைகள் மீதான விவாதம் நடைபெறுகிறது.
அதன்படி, கைத்தறி மற்றும் துணிநூல் துறை, கதர், கிராமத் தொழில்கள் மற்றும் கைவினைப் பொருட்கள் துறை, தொழிலாளர் நலன் மற்றும் திறன் மேம்பாட்டுத் துறை, குறு, சிறு மற்றும் நடுத்தரத் தொழில் நிறுவனங்கள் துறை ஆகியவற்றின் மானியக் கோரிக்கைகள் இன்று விவாதத்திற்கு எடுத்துக்கொள்ளப்படுகின்றன.
தமிழக சட்டப்பேரவையில் 2026–27ஆம் ஆண்டுக்கான பட்ஜெட் தொடர்பான விவாதங்கள் தொடர்ந்து நடைபெற்று வருகின்றன. பல்வேறு துறைகளுக்கான நிதி ஒதுக்கீடுகள், புதிய திட்டங்கள், செயல்பாட்டில் உள்ள திட்டங்களின் முன்னேற்றம் உள்ளிட்ட விவகாரங்கள் குறித்து உறுப்பினர்கள் கேள்விகளை எழுப்பி வருகின்றனர்.
நேற்று மாற்றுத் திறனாளிகள் நலன், மதுவிலக்கு மற்றும் ஆயத்தீர்வை, சமூக நலன் மற்றும் மகளிர் உரிமை, வேளாண்மை மற்றும் உழவர் நலன் உள்ளிட்ட துறைகளின் மானியக் கோரிக்கைகள் விவாதிக்கப்பட்டன.
இன்றைய அமர்வில் மானியக் கோரிக்கை விவாதங்களுடன், தமிழ்நாடு நகர் மற்றும் ஊரமைப்பு (திருத்த) சட்ட முன்வடிவு அறிமுகப்படுத்தப்பட உள்ளது. மேலும், பொதுமக்கள் சார்ந்த முக்கிய பிரச்னைகள் தொடர்பான கவன ஈர்ப்புத் தீர்மானங்களும் எடுத்துக்கொள்ளப்படவுள்ளன.
இதனால் இன்றைய சட்டப்பேரவை அமர்வு அரசியல் மற்றும் நிர்வாக ரீதியாக முக்கியத்துவம் வாய்ந்ததாக பார்க்கப்படுகிறது.
