டெல்லி: நாட்டின் தலைநகரான டெல்லியில் காவல்துறையினர் மேற்கொண்ட அதிரடி சோதனையில், சுமார் 1,000 கோடி ரூபாய் மதிப்புள்ள மாபெரும் போதைப்பொருள் மற்றும் போதை மாத்திரைகள் பறிமுதல் செய்யப்பட்டுள்ளது பெரும் அதிர்ச்சியை ஏற்படுத்தியுள்ளது. இந்தச் சம்பவம் தொடர்பாக மூன்று பேர் கைது செய்யப்பட்டுள்ளனர்.
சர்வதேச அளவில் இயங்கும் போதைப்பொருள் கடத்தல் கும்பலிடமிருந்து, இந்தியாவுக்குள் தொடர்ச்சியாகப் போதைப்பொருட்கள் சட்டவிரோதமாகக் கடத்தி வரப்படுவதாக டெல்லி காவல்துறைக்குப் பலகட்ட ரகசியத் தகவல்கள் கிடைத்தன. குறிப்பாக, வெளிநாடுகளில் இருந்தும் இந்தியாவின் பிற பகுதிகளிலிருந்தும் கொண்டுவரப்படும் இந்தப் போதைப்பொருட்கள், டெல்லியை மையமாக வைத்து நாட்டின் பல்வேறு மாநிலங்களுக்கும் பிற பகுதிகளுக்கும் கடத்திச் சென்று ரகசியமாக விற்பனை செய்யப்படுவதாகவும் போலீசாருக்குத் திட்டவட்டமான தகவல்கள் எட்டின.
இதன் அடிப்படையில் உஷாரடைந்த டெல்லி போலீசார், இந்தக் கடத்தல் வலையை முற்றிலும் வேரடித் தோண்டி அழிக்கத் திட்டமிட்டனர். இதன் ஒரு பகுதியாக ‘ஆபரேஷன் வஜ்ரா’ (Operation Vajra) என்ற சிறப்புக் பெயரில் அதிரடி நடவடிக்கையைத் தொடங்கினர். கடந்த ஞாயிற்றுக்கிழமை அன்று டெல்லியில் உள்ள பல்வேறு சந்தேகத்திற்கிடமான பகுதிகளில் காவல்துறையினர் தீவிரத் தேடுதல் வேட்டையிலும் சோதனையிலும் ஈடுபட்டனர்.
இந்த அதிரடி சோதனையின் போது, டெல்லியில் உள்ள ஒரு ரகசிய குடோனில் பெருமளவில் போதைப்பொருட்கள் பதுக்கி வைக்கப்பட்டுள்ளது கண்டுபிடிக்கப்பட்டது. அந்த குடோனைச் சுற்றி வளைத்து போலீசார் நடத்திய சோதனையில், சர்வதேச சந்தையில் கிட்டதட்ட ரூ. 1,000 கோடி மதிப்புக் கொண்ட சுமார் 30 ஆயிரம் கிலோ போதைப்பொருட்கள் மற்றும் போதை மாத்திரைகள் பதுக்கி வைக்கப்பட்டிருந்தது கண்டுபிடிக்கப்பட்டு அதிரடியாகக் கைப்பற்றப்பட்டன. இதுவரை டெல்லியில் கைப்பற்றப்பட்ட மிகப்பெரிய போதைப்பொருள் வேட்டைகளில் இதுவும் ஒன்றாகும் என்று காவல்துறையினர் தரப்பில் தெரிவிக்கப்பட்டுள்ளது.
இந்த மாபெரும் போதைப்பொருள் கடத்தல் மற்றும் விற்பனை நெட்வொர்க்கில் நேரடியாகத் தொடர்புடைய நபர்களைக் கண்டறியும் பணியில் போலீசார் தீவிரமாக இறங்கினர். முதற்கட்ட விசாரணையின் அடிப்படையில், இத்தகைய சட்டவிரோதச் செயல்களில் ஈடுபட்ட கேரளாவைச் சேர்ந்த உமேஷ்குமார், பிரதவுஸ் உள்ளிட்ட 3 முக்கியக் குற்றவாளிகளைப் போலீசார் அதிரடியாகக் கைது செய்துள்ளனர்.
கைது செய்யப்பட்டவர்களிடம் நடத்தப்படும் தொடர் விசாரணையின் மூலம், இந்தக் கடத்தலின் பின்னணியில் உள்ள சர்வதேச கும்பல் குறித்தும், நாட்டின் பிற பகுதிகளில் இவர்களுக்குத் தொடர்புள்ள பிற நபர்கள் குறித்தும் அதிர்ச்சியூட்டும் பல உண்மைகள் வெளிவரும் என்று எதிர்பார்க்கப்படுகிறது. தலைநகரில் காவல்துறையினர் நடத்தியுள்ள இந்த அதிரடி நடவடிக்கை போதைப்பொருள் கடத்தல்காரர்கள் மத்தியில் பெரும் கலக்கத்தை ஏற்படுத்தியுள்ளது.
