கர்நாடக முதல்வர் டி.கே.சிவக்குமார், இனி தன்னை சந்திக்க விரும்புபவர்கள் சதாசிவநகரில் உள்ள தனது தனியார் இல்லத்திற்கு வர வேண்டாம் என்று அறிவித்துள்ளார். அதற்கு பதிலாக, முதல்வரின் அதிகாரப்பூர்வ இல்லமான “கிருஷ்ணா”விற்கு வருமாறு கட்சி நிர்வாகிகள், எம்.எல்.ஏ.க்கள், அதிகாரிகள் மற்றும் பொதுமக்களிடம் அவர் வேண்டுகோள் விடுத்துள்ளார்.
கர்நாடகாவின் புதிய முதல்வராக கடந்த ஜூன் 3ஆம் தேதி பொறுப்பேற்ற டி.கே.சிவக்குமார், பதவியேற்ற நாள் முதல் தனது பெங்களூரு சதாசிவநகர் இல்லத்திலேயே முக்கிய சந்திப்புகளை நடத்தி வந்தார். அமைச்சர்கள், அதிகாரிகள், கட்சி நிர்வாகிகள், தொண்டர்கள் மற்றும் பொதுமக்கள் உள்ளிட்ட ஏராளமானோர் தினமும் அவரது இல்லத்திற்கு வந்து சந்தித்து வந்தனர்.
இந்த நிலையில், திடீரென வெளியிட்டுள்ள அறிவிப்பில், “சில தவிர்க்க முடியாத காரணங்களால் இந்த முடிவை எடுத்துள்ளேன். இனிமேல் யாரும் சதாசிவநகரில் உள்ள என் வீட்டிற்கு வர வேண்டாம். அதிகாரப்பூர்வ பணிகள் மற்றும் சந்திப்புகளுக்காக முதல்வரின் கிருஷ்ணா இல்லத்திற்கு வரலாம்” என்று தெரிவித்துள்ளார்.
முதல்வரின் இந்த அறிவிப்பு அரசியல் வட்டாரங்களில் கவனத்தை ஈர்த்துள்ளது. ஏனெனில், அதிகாரப்பூர்வ முதல்வர் இல்லமான “கிருஷ்ணா”வை பயன்படுத்தாமல் இருந்த டி.கே.சிவக்குமார், மாற்று ஏற்பாடுகளை செய்ய முயன்றிருந்தார்.
முதல்வராக பதவியேற்ற பிறகு, பெங்களூருவில் உள்ள குமாரகிருபா விருந்தினர் மாளிகை வளாகத்தில் உள்ள பழமையான பங்களாவை தனது அலுவலக இல்லமாக மாற்ற திட்டமிட்டிருந்தார். அதற்காக புதுப்பிப்பு பணிகளும் பரிசீலிக்கப்பட்டதாக கூறப்பட்டது. ஆனால், அந்த கட்டிடம் பாரம்பரிய முக்கியத்துவம் வாய்ந்தது என்பதால் பல்வேறு தரப்பிலிருந்து எதிர்ப்பு எழுந்தது.
இதையடுத்து, கர்நாடக அரசின் அதிகாரப்பூர்வ முதல்வர் இல்லமான “கிருஷ்ணா”வையே பயன்படுத்த முடிவு செய்துள்ளதாக டி.கே.சிவக்குமார் தற்போது அறிவித்துள்ளார்.
கிருஷ்ணா இல்லம் வழக்கமாக உயர்மட்ட அதிகாரிகள் கூட்டங்கள், அமைச்சரவை ஆலோசனைகள், முக்கிய அரசியல் சந்திப்புகள் மற்றும் வெளிநாட்டு பிரதிநிதிகள் சந்திப்பு போன்ற நிகழ்வுகளுக்குப் பயன்படுத்தப்படும் இடமாகும். இனி முதல்வரின் அனைத்து அதிகாரப்பூர்வ நடவடிக்கைகளும் அங்கிருந்தே நடைபெறும் என எதிர்பார்க்கப்படுகிறது.
டி.கே.சிவக்குமாரின் இந்த முடிவு, நிர்வாக நடவடிக்கைகளை மேலும் ஒழுங்குபடுத்தும் நோக்கத்துடன் எடுக்கப்பட்டதாக கருதப்படுகிறது. தனியார் இல்லத்தில் நடைபெற்று வந்த சந்திப்புகள் அதிகாரப்பூர்வ வளாகத்திற்கு மாற்றப்படுவதால், பாதுகாப்பு மற்றும் நிர்வாக ஒருங்கிணைப்பு மேலும் வலுப்பெறும் என அதிகாரிகள் தெரிவிக்கின்றனர்.
