துருக்கி நாட்டின் இஸ்தான்புல் நகரில், பெண் ஒருவர் பல்வேறு கடைகளுக்குச் சென்று ஆண் பணியாளர்களைத் தகாத முறையில் சீண்டி பாலியல் துன்புறுத்தலில் ஈடுபட்ட சம்பவம் சமூக வலைதளங்களில் பெரும் அதிர்ச்சியை ஏற்படுத்தியுள்ளது.
சம்பவம் என்ன? இஸ்தான்புல்லின் உம்ரானியே உள்ளிட்ட பல்வேறு பகுதிகளில், சுமார் 30 வயது மதிக்கத்தக்க அந்தப் பெண் கடை கடையாகச் சென்றுள்ளார். அங்குள்ள ஆண் பணியாளர்களை நெருங்கி, அவர்களிடம் தகாத முறையில் நடந்துகொள்வது, கண்ட இடங்களில் தொடுவது மற்றும் முத்தமிட முயற்சிப்பது போன்ற செயல்களில் அவர் ஈடுபட்டுள்ளார். தான் ஒரு மாணவி என்றும், வாசனை திரவியங்களை விற்பனை செய்வதாகவும் கூறிக்கொண்டு, அந்தப் பணியாளர்களை அவர் நெருங்கியது வீடியோ ஆதாரங்களுடன் வெளியானது.
கைது மற்றும் விசாரணை தொடர்ச்சியான புகார்களைத் தொடர்ந்து, போலீசார் அந்தப் பெண்ணைக் கைது செய்து நீதிமன்றத்தில் ஆஜர்படுத்தினர். விசாரணையில், அவருக்கு மனநலப் பாதிப்பு இருப்பது தெரியவந்துள்ளதாகத் தகவல்கள் தெரிவிக்கின்றன.
சமூக வலைதளங்களில் விவாதம் இந்தச் சம்பவம் குறித்த வீடியோக்கள் இணையத்தில் பரவியதும், நெட்டிசன்கள் மத்தியில் கடும் விவாதங்களை உருவாக்கியுள்ளது. இதில் சிலர், “ஒரு பெண் இத்தகைய செயலில் ஈடுபட்டால் மட்டும் அதை மனநலப் பாதிப்பு என்று எளிதாகக் கடந்து செல்ல முடியுமா? ஆண்கள் இதுபோன்ற செயல்களில் ஈடுபட்டால் இதே போன்ற சலுகை கிடைக்குமா?” என்று கேள்வி எழுப்பியுள்ளனர். மேலும், ஆடை மற்றும் பெண்களின் நடத்தை குறித்த வழக்கமான விமர்சனங்கள் இந்தச் சம்பவத்தின் பின்னணியிலும் சமூக வலைதளங்களில் பகிரப்பட்டு வருகின்றன. இந்தச் சம்பவம் துருக்கியில் பெரும் பரபரப்பை ஏற்படுத்தியுள்ளது.
