சிவகார்த்திகேயன் நடித்துள்ள ‘பராசக்தி’ திரைப்படம் அடுத்தாண்டு பொங்கல் பண்டிகையை முன்னிட்டு ஜனவரி 14ஆம் தேதி திரையரங்குகளில் வெளியாக உள்ளது. சுதா கொங்கரா இயக்கத்தில் உருவாகியுள்ள இந்த படம், வெளியீட்டுக்கு முன்பே ரசிகர்களிடையே பெரும் எதிர்பார்ப்பை உருவாக்கியுள்ளது. சமூக மற்றும் அரசியல் பின்னணியைக் கொண்ட கதையம்சத்துடன் இப்படம் உருவாகி வருவதாக கூறப்படுவதால், இது சிவகார்த்திகேயனின் கரியரில் ஒரு புதிய மாற்றத்தை ஏற்படுத்தும் படமாக ரசிகர்கள் கருதுகின்றனர்.
படத்தில் சிவகார்த்திகேயனுடன் அதர்வா, ஸ்ரீலீலா, ரவி மோகன் உள்ளிட்ட பலர் முக்கிய கதாபாத்திரங்களில் நடித்துள்ளனர். ஜி.வி. பிரகாஷ் குமார் இசையமைத்துள்ளதால், படத்தின் பாடல்கள் மற்றும் பின்னணி இசை குறித்து ரசிகர்களிடையே தனி ஆர்வம் நிலவுகிறது. படத்தின் இசை வெளியீட்டு விழா விரைவில் நடைபெறவுள்ளதாக தயாரிப்புக் குழு அறிவித்துள்ளது.
இந்நிலையில், ‘பராசக்தி’ படத்தின் கதை என்ன என்பதற்கான ஒரு விவரம் சமூக வலைதளங்களில் வேகமாக பரவி வருகிறது. அந்த தகவலின்படி, பல ஆண்டுகளுக்கு முன்பு மெட்ராசில் நடைபெற்ற ஒரு உரிமை மறுப்பு போராட்டத்தை மையமாகக் கொண்ட கதை இது. போராட்டத்தை அடக்க அரசு அனுப்பும் ஒரு அதிகாரி, அந்த போராட்டத்தின் பின்னால் தனது சொந்த சகோதரரே இருப்பதை அறிந்து அதிர்ச்சி அடைகிறார். கடமை மற்றும் குடும்ப பாசம் ஆகிய இரண்டிற்கும் இடையில் சிக்கித் தவிக்கும் நாயகன், இறுதியில் எடுக்கும் முடிவே படத்தின் முக்கிய மையக்கரு என கூறப்படுகிறது.
இந்த கதை உண்மையா என்பது குறித்து தயாரிப்புக் குழுவின் அதிகாரப்பூர்வ தகவல் எதுவும் வெளியாகவில்லை. இருப்பினும், சமூக வலைதளங்களில் இந்த விவரம் காட்டுத்தீயாக பரவி வருவதால், ரசிகர்களிடையே படத்தின் மீது உள்ள ஆர்வம் மேலும் அதிகரித்துள்ளது. குறிப்பாக, சுதா கொங்கரா இயக்கத்தில் வரும் படங்கள் பொதுவாக வலுவான கதைக்களத்தையும் சமூக கருத்துக்களையும் கொண்டிருப்பதால், ‘பராசக்தி’ படத்திலும் அதே தன்மை இருக்கும் என எதிர்பார்க்கப்படுகிறது.
பொங்கல் வெளியீடாக வரவிருக்கும் இந்த படம், பாக்ஸ் ஆபிஸில் பெரிய போட்டியை சந்திக்கக்கூடும். இருப்பினும், சிவகார்த்திகேயன் – சுதா கொங்கரா கூட்டணி, அதர்வாவின் இணை நடிப்பு, ஜி.வி.பிரகாஷின் இசை ஆகியவை படத்திற்கு கூடுதல் பலமாக இருக்கும் என திரையுலக வட்டாரங்கள் கருதுகின்றன.
