பழனி:
திண்டுக்கல் மாவட்டம் பழனியில் அமைந்துள்ள புகழ்பெற்ற தண்டபாணி சுவாமி மடம் அறக்கட்டளைக்குச் சொந்தமான கோடிக்கணக்கான ரூபாய் மதிப்புள்ள நிலத்தை முறைகேடாகப் பத்திரப்பதிவு செய்த விவகாரம் தமிழகத்தில் பெரும் அதிர்ச்சியை ஏற்படுத்தியுள்ளது. இச்சம்பவம் தொடர்பாகச் சஸ்பெண்ட் செய்யப்பட்டுள்ள சார்பதிவாளரிடம் சிபிசிஐடி போலீசார் தீவிர விசாரணையைத் தொடங்கியுள்ளனர்.
ரூ. 100 கோடி நிலம் ரூ. 2 கோடிக்கு கிரையம்:
பழனி அடிவாரம் பூங்கா சாலையில் தண்டபாணி சுவாமி மடம் அறக்கட்டளைக்குச் சொந்தமான 1 ஏக்கர் 40 சென்ட் நிலம் அமைந்துள்ளது. சென்னை உயர் நீதிமன்றத்தின் உத்தரவுப்படி, இந்த நிலத்துக்கான தக்காராகப் பழனி முருகன் கோவில் இணை ஆணையர் நியமிக்கப்பட்டு, கோவில் நிர்வாகத்தின் மூலமாகவே இந்த நிலம் முழுமையாக நிர்வகிக்கப்பட்டு வருகிறது.
கடந்த ஆண்டு இப்பகுதியில் பழனி முருகன் கோவில் பக்தர்களின் வாகன நிறுத்துமிடமாக இந்த இடம் மாற்றப்பட்டிருந்தது. இந்நிலையில், சுமார் ரூ. 100 கோடி மதிப்பிலான இந்தச் சொத்து, கடந்த 6-ஆம் தேதி பழனி சார்பதிவாளர் அலுவலகத்தில் தனியார் இரு நபர்களுக்கு வெறும் ரூ. 2 கோடிக்குக் கிரையமாகப் பத்திரப்பதிவு செய்யப்பட்டுள்ளது. கோவில் கட்டுப்பாட்டில் இருக்கும் ஒரு முக்கியச் சொத்து இதுபோன்று சட்டவிரோதமாகப் பதிவு செய்யப்பட்ட நிகழ்வு பெரும் பரபரப்பை ஏற்படுத்தியது.
போலீசார் வழக்குப் பதிவும் சஸ்பெண்ட் நடவடிக்கையும்:
இந்த மாபெரும் நில முறைகேடு பதிவு குறித்துப் பழனி கோவில் நிர்வாகம் சார்பில் பழனி அடிவாரம் காவல் நிலையத்தில் உடனடியாகப் புகார் அளிக்கப்பட்டது. புகாரின் அடிப்படையில், பழனி சார்பதிவாளராகப் பணியாற்றிய ஜஸ்டின் மணிகண்டன், நிலத்தை விற்ற விழுப்புரத்தைச் சேர்ந்த முருகதாஸ், அதனை வாங்கிய திருப்பூர் மாவட்டம் உடுமலை பகுதியைச் சேர்ந்த வெள்ளத்துரை மற்றும் பழனியைச் சேர்ந்த சேதுபதி ஆகிய 4 பேர் மீதும் ஐந்து பிரிவுகளின் கீழ் வழக்குப்பதிவு செய்யப்பட்டது.
இந்த முறைகேடு வழக்கு பின்னர் சிபிசிஐடி (CBCID) பிரிவுக்கு மாற்றப்பட்டு விசாரணை நடைபெற்று வருகிறது. இதற்கிடையே, நிலப் பதிவில் முறைகேடாக உடந்தையாக இருந்ததற்காகச் சார்பதிவாளர் ஜஸ்டின் மணிகண்டன் உடனடியாகப் பணியிடை நீக்கம் (Suspend) செய்யப்பட்டுள்ளார். அவர் தற்போது நீதிமன்றத்தால் ஜாமினில் வெளிவந்துள்ளது குறிப்பிடத்தக்கது.
சிபிசிஐடி தீவிர விசாரணை:
பழனி முருகன் கோவில் நிலமோசடி வழக்கில் சஸ்பெண்ட் செய்யப்பட்டுள்ள சார்பதிவாளர் ஜஸ்டின் மணிகண்டனிடம் சிபிசிஐடி போலீசார் இன்று அதிரடியாக விசாரணை நடத்தி வருகின்றனர். திண்டுக்கல்லில் உள்ள சிபிசிஐடி அலுவலகத்தில் விசாரணைக்காக அவர் நேரில் ஆஜரானார்.
அவரிடம், இந்த ரூ. 100 கோடி மதிப்பிலான கோவில் நிலம் யாருடைய தூண்டுதலின் பேரில் குறைந்த விலைக்குப் பதிவு செய்யப்பட்டது? இதற்குப் பின்னணியில் யார்யார் ஈடுபட்டுள்ளனர்? மற்றும் கோடிக்கணக்கில் கைமாறிய பணம் குறித்து சிபிசிஐடி போலீசார் துருவித் துருவி விசாரணை நடத்தி வருகின்றனர். இந்த விசாரணையின் முடிவில் மேலும் பல திடுக்கிடும் உண்மைகள் வெளிவரும் என்று எதிர்பார்க்கப்படுகிறது.
