கத்தார் நாட்டில் உள்ள முக்கிய எரிவாயு ஆலையில் ஏற்பட்ட பயங்கர வெடிவிபத்தில் 12 இந்தியர்கள் உயிரிழந்த சம்பவம் பெரும் சோகத்தை ஏற்படுத்தியுள்ளது. இந்த துயர சம்பவத்துக்கு மத்திய வெளிவிவகாரத்துறை அமைச்சர் எஸ்.ஜெய்சங்கர் ஆழ்ந்த இரங்கல் தெரிவித்துள்ளார்.
அமெரிக்கா மற்றும் ஈரான் இடையிலான மோதல் கடந்த சில மாதங்களாக மேற்காசிய நாடுகளில் பெரும் பதற்றத்தை ஏற்படுத்தி வந்தது. அணுசக்தி ஒப்பந்த விவகாரத்தை தொடர்ந்து அமெரிக்கா மற்றும் இஸ்ரேல் இணைந்து ஈரானில் தாக்குதல் நடத்தியதாக கூறப்படுகிறது. இதனைத் தொடர்ந்து வளைகுடா பிராந்தியத்தில் பாதுகாப்பு சூழல் மோசமடைந்தது.
இந்த சூழலில் அமெரிக்காவுக்கு ஆதரவாக செயல்பட்டதாக கருதப்பட்ட சில வளைகுடா நாடுகளையும் ஈரான் குறிவைத்து தாக்குதல் நடத்தியதாக தகவல்கள் வெளியாகின. அந்த தாக்குதல்களில் கத்தார் நாட்டின் ராஸ் லப்பான் தொழில் நகரில் அமைந்துள்ள முக்கிய இயற்கை எரிவாயு ஏற்றுமதி முனையம் சேதமடைந்தது. இதனால் அங்கிருந்து பல நாடுகளுக்கு மேற்கொள்ளப்பட்ட எரிவாயு ஏற்றுமதி தற்காலிகமாக நிறுத்தப்பட்டது.
இதையடுத்து கத்தார் அரசு சேதமடைந்த எரிவாயு உற்பத்தி மற்றும் விநியோக அமைப்புகளை மீண்டும் சீரமைக்கும் பணிகளை தொடங்கியது. குறிப்பாக பர்சான் எரிவாயு வினியோக ஆலையில் பல்வேறு மறுசீரமைப்பு மற்றும் பராமரிப்பு பணிகள் தீவிரமாக நடைபெற்று வந்தன.
இந்த பணிகளில் ஏராளமான வெளிநாட்டு தொழிலாளர்கள் மற்றும் பொறியாளர்கள் ஈடுபட்டிருந்தனர். அப்போது எதிர்பாராத விதமாக ஆலையில் திடீரென பயங்கர வெடிவிபத்து ஏற்பட்டது. வெடிவிபத்தைத் தொடர்ந்து ஆலை முழுவதும் தீப்பற்றி எரிந்ததாக கூறப்படுகிறது.
இந்த கோர விபத்தில் 12 இந்தியர்கள் உட்பட மொத்தம் 13 பேர் உயிரிழந்துள்ளனர். மேலும் 66 தொழிலாளர்கள் பலத்த காயங்களுடன் மருத்துவமனைகளில் அனுமதிக்கப்பட்டுள்ளனர். இதற்கு மேலாக 18 தொழிலாளர்கள் காணாமல் போயுள்ளதாக தகவல்கள் தெரிவிக்கின்றன. அவர்களை தேடும் மீட்பு பணிகள் தொடர்ந்து நடைபெற்று வருகின்றன.
உயிரிழந்தவர்களின் உடல்களை அடையாளம் காணும் பணிகளும் நடைபெற்று வருகின்றன. பலர் தீக்காயங்களால் அடையாளம் தெரியாத அளவுக்கு பாதிக்கப்பட்டுள்ளதாக தகவல்கள் வெளியாகியுள்ளன. இதனால் அவர்களின் குடும்பத்தினரிடையே பெரும் சோகம் நிலவுகிறது.
இந்த சம்பவம் குறித்து தனது எக்ஸ் தளத்தில் பதிவு செய்துள்ள மத்திய வெளிவிவகாரத்துறை அமைச்சர் ஜெய்சங்கர், “கத்தார் நாட்டின் ராஸ் லப்பான் தொழில் நகரில் ஏற்பட்ட வெடிவிபத்தில் இந்தியர்கள் உட்பட பலர் உயிரிழந்ததும், பலர் காயமடைந்ததும் குறித்து அறிந்து மிகுந்த வேதனை அடைந்தேன். பாதிக்கப்பட்ட இந்திய குடிமக்கள் மற்றும் அவர்களின் குடும்பத்தினருக்கு ஆழ்ந்த இரங்கலை தெரிவித்துக் கொள்கிறேன்” என கூறியுள்ளார்.
மேலும், கத்தாரில் உள்ள இந்திய தூதரகம் அந்நாட்டு அதிகாரிகளுடன் தொடர்ந்து தொடர்பில் இருப்பதாகவும், உயிரிழந்த மற்றும் காயமடைந்த இந்தியர்களின் குடும்பங்களுக்கு தேவையான அனைத்து உதவிகளும் வழங்கப்படும் என்றும் அவர் தெரிவித்துள்ளார்.
இந்திய தூதரக அதிகாரிகள் சம்பவ இடத்தை தொடர்ந்து கண்காணித்து வருவதோடு, மருத்துவமனைகளில் சிகிச்சை பெற்று வரும் இந்தியர்களின் நிலை குறித்தும் தகவல்களை சேகரித்து வருகின்றனர். காயமடைந்தவர்கள் விரைவில் குணமடைய வேண்டும் என பல்வேறு தரப்பினரும் பிரார்த்தனை செய்து வருகின்றனர்.
கத்தார் எரிவாயு துறையில் ஆயிரக்கணக்கான இந்தியர்கள் பணியாற்றி வரும் நிலையில், இந்த விபத்து இந்திய சமூகத்திலும் பெரும் அதிர்ச்சியை ஏற்படுத்தியுள்ளது.
