சென்னை பெரம்பூர் சட்டமன்றத் தொகுதிக்குட்பட்ட பல்வேறு பொதுநல மற்றும் உள்கட்டமைப்பு மேம்பாட்டுத் திட்டங்களை சென்னை மாநகராட்சி ஆணையாளர் ஜி.எஸ். சமீரன் நேரில் பார்வையிட்டு ஆய்வு மேற்கொண்டார். நகர்ப்புற ஆரம்ப சுகாதார நிலையம், விளையாட்டு வளாகம், சிறுவர் சறுக்கு விளையாட்டு மைதானம், சட்டமன்ற உறுப்பினர் அலுவலக புனரமைப்பு பணி மற்றும் மாநகர மின் பேருந்து பணிமனை உள்ளிட்ட முக்கிய இடங்களில் ஆய்வு நடத்தப்பட்டு, பணிகளை விரைந்து முடிக்க அதிகாரிகளுக்கு அறிவுறுத்தல்கள் வழங்கப்பட்டன.

தண்டையார்பேட்டை மண்டலத்திற்குட்பட்ட பெரம்பூர் சத்தியமூர்த்தி நகரில் உள்ள நகர்ப்புற ஆரம்ப சுகாதார மையத்தில் ஆய்வை தொடங்கிய ஆணையாளர், அங்குள்ள மருந்தகம், ஆய்வகம் மற்றும் பொதுமக்களுக்கு வழங்கப்படும் மருத்துவ சேவைகள் குறித்து விரிவாக ஆய்வு செய்தார். மேலும், மருத்துவர்களின் வருகை, நோயாளிகளுக்கு வழங்கப்படும் சிகிச்சை தரம் உள்ளிட்ட அம்சங்களை பொதுமக்களிடம் கேட்டறிந்தார்.

இதனைத் தொடர்ந்து, நமக்கு நாமே திட்டத்தின் கீழ் ரூ.86.70 லட்சம் மதிப்பீட்டில் கட்டப்பட்டு வரும் கூடுதல் மருத்துவமனை கட்டடப் பணிகளையும் ஆய்வு செய்தார். கட்டுமானப் பணிகளை விரைந்து முடித்து பொதுமக்கள் பயன்பாட்டிற்கு கொண்டுவர நடவடிக்கை எடுக்க அதிகாரிகளுக்கு உத்தரவிட்டார்.

பின்னர், வார்டு 37-ல் அமைந்துள்ள சத்தியமூர்த்தி பிரதான சாலையில் உள்ள செயற்கை புல்தரை கால்பந்து மைதானத்தை பார்வையிட்டார். இளைஞர்கள் மற்றும் விளையாட்டு ஆர்வலர்கள் மத்தியில் இந்த மைதானத்தின் பயன்பாடு குறித்து அதிகாரிகளிடம் கேட்டறிந்தார். அதனை ஒட்டிய பகுதியில் நமக்கு நாமே திட்டத்தின் கீழ் ரூ.1.48 கோடி மதிப்பீட்டில் கட்டப்பட்டு வரும் விளையாட்டு வளாகத்தின் பணிகளையும் ஆய்வு செய்தார்.

தரைத் தளம் மற்றும் இரண்டு மாடிகளுடன் உருவாகி வரும் இந்த விளையாட்டு வளாகம், அப்பகுதி இளைஞர்களுக்கு நவீன வசதிகளுடன் கூடிய விளையாட்டு சூழலை உருவாக்கும் என எதிர்பார்க்கப்படுகிறது. கட்டுமானப் பணிகளை திட்டமிட்ட காலத்திற்குள் நிறைவு செய்ய அதிகாரிகளுக்கு ஆணையாளர் அறிவுறுத்தினார்.

அதனைத் தொடர்ந்து, மத்திய நிழற்சாலையில் அமைந்துள்ள சிறுவர் விளையாட்டுத் திடலில், மாமன்ற உறுப்பினர் மேம்பாட்டு நிதியின் கீழ் ரூ.30 லட்சம் செலவில் உருவாக்கப்பட்டு வரும் சறுக்கு விளையாட்டு மைதானப் பணிகளை ஆய்வு செய்தார். 1,120 சதுர மீட்டர் பரப்பளவில் அமைக்கப்படும் இந்த விளையாட்டு மையம், குழந்தைகளுக்கான பாதுகாப்பான பொழுதுபோக்கு மற்றும் உடற்பயிற்சி வசதிகளை வழங்கும் வகையில் வடிவமைக்கப்பட்டுள்ளது.

இந்த திட்டம் மூலம் எம்.கே.பி. நகர், சர்மா நகர், உதயசூரியன் நகர், சாமியார் தோட்டம், ஆர்.ஆர். நகர், எம்.ஜி.ஆர். நகர் மற்றும் தாமோதரன் நகர் உள்ளிட்ட பகுதிகளில் வசிக்கும் ஆயிரக்கணக்கான மக்கள் பயன்பெறுவார்கள் என்று தெரிவிக்கப்பட்டுள்ளது.

பின்னர், சர்மா நகரில் அமைந்துள்ள பெரம்பூர் சட்டமன்ற உறுப்பினர் அலுவலக கட்டடத்தின் புனரமைப்பு பணிகளையும் ஆணையாளர் ஆய்வு செய்தார். அலுவலகத்தை நவீன வசதிகளுடன் விரைவில் பொதுமக்கள் பயன்பாட்டிற்கு கொண்டு வர தேவையான நடவடிக்கைகளை மேற்கொள்ள அதிகாரிகளுக்கு அறிவுறுத்தினார்.

இறுதியாக, மேற்கு அவென்யூ சாலையில் செயல்பட்டு வரும் மாநகர மின் பேருந்து பணிமனையை பார்வையிட்டார். சென்னை மாநகர போக்குவரத்தில் மின்சார பேருந்துகளின் பங்கு அதிகரித்து வரும் நிலையில், அவற்றின் பராமரிப்பு மற்றும் இயக்க வசதிகள் குறித்து அதிகாரிகளிடம் கேட்டறிந்தார்.

இந்த ஆய்வின்போது தண்டையார்பேட்டை மண்டல அலுவலர் ஏ. ராஜ்குமார் மற்றும் பல்வேறு துறை அதிகாரிகள் உடனிருந்தனர். பெரம்பூர் பகுதியில் நடைபெற்று வரும் சுகாதாரம், விளையாட்டு மற்றும் போக்குவரத்து மேம்பாட்டு திட்டங்கள் விரைவில் நிறைவு பெற்றால், அப்பகுதி மக்களின் வாழ்க்கைத் தரம் மேலும் உயர்வடையும் என எதிர்பார்க்கப்படுகிறது.