தமிழகத்தில் இன்று நீலகிரி, கோயம்புத்தூர், திருவண்ணாமலை, வேலூர், திருப்பத்தூர் மற்றும் ராணிப்பேட்டை ஆகிய 6 மாவட்டங்களில் ஓரிரு இடங்களில் கனமழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. இந்தப் பகுதிகளில் இடி, மின்னலுடன் மணிக்கு 40 முதல் 50 கி.மீ. வேகத்தில் பலத்த காற்றும் வீசக்கூடும். 6 மாவட்டங்களுக்கும் கனமழைக்கான மஞ்சள் எச்சரிக்கை குறிப்பிடப்பட்டுள்ளது.
தெற்கு உள் கர்நாடகாவில் இருந்து மன்னார் வளைகுடா வரை தமிழகப் பகுதிகள் வழியாக சுமார் 1.5 கி.மீ. உயரம் வரை நிலவும் காற்றழுத்த தாழ்வு பாதையே தற்போதைய மழை சூழலுக்குக் காரணம் என வானிலை மையம் தெரிவித்துள்ளது.
இதர மேற்கு தொடர்ச்சி மலை மாவட்டங்களுடன் கிருஷ்ணகிரி, தர்மபுரி, சேலம், நாமக்கல், கரூர், ஈரோடு, திருப்பூர், திருச்சி, அரியலூர், பெரம்பலூர், விருதுநகர், மதுரை, சிவகங்கை, புதுக்கோட்டை, ராமநாதபுரம் மற்றும் தூத்துக்குடி உள்ளிட்ட மாவட்டங்களில் ஒருசில இடங்களில் இடி, மின்னல் மற்றும் பலத்த காற்றுடன் மிதமான மழை பெய்யலாம். தமிழகத்தின் மற்ற பகுதிகள், புதுச்சேரி மற்றும் காரைக்காலிலும் ஓரிரு இடங்களில் லேசான மழைக்கு வாய்ப்புள்ளது.
சென்னை மற்றும் புறநகர் பகுதிகளில் இன்று வானம் ஓரளவு மேகமூட்டத்துடன் காணப்படும். மாலை அல்லது இரவு நேரங்களில் நகரின் சில பகுதிகளில் இடி, மின்னலுடன் லேசானது முதல் மிதமான மழை பெய்யக்கூடும். அதிகபட்ச வெப்பநிலை 35–36°C மற்றும் குறைந்தபட்ச வெப்பநிலை 26–27°C அளவில் இருக்கலாம்.
செப்டம்பர் 17 அன்று நீலகிரி, கோயம்புத்தூர், கரூர், திருச்சி, பெரம்பலூர், அரியலூர் மற்றும் தஞ்சாவூர் மாவட்டங்களில் கனமழை வாய்ப்பு உள்ளது. செப்டம்பர் 18 அன்று நீலகிரி மற்றும் கோயம்புத்தூரில் கனமழை தொடரக்கூடும். செப்டம்பர் 19-ல் நீலகிரி, கோவை, கிருஷ்ணகிரி, வேலூர், திருவண்ணாமலை, திருப்பத்தூர், ராணிப்பேட்டை மற்றும் திருவள்ளூரில் கனமழை வாய்ப்பு உள்ளதாக தற்போதைய முன்னறிவிப்பு கூறுகிறது.
மேலும் செப்டம்பர் 16 மற்றும் 17 தேதிகளில் தென்கிழக்கு வங்கக்கடல், தென்மேற்கு வங்கக்கடலின் சில பகுதிகள் மற்றும் அந்தமான் கடல் பகுதிகளில் மணிக்கு 45–55 கி.மீ., இடையிடையே 65 கி.மீ. வரை சூறாவளிக் காற்று வீசக்கூடும் என்பதால், குறிப்பிட்ட கடல் பகுதிகளுக்கு மீனவர்கள் செல்ல வேண்டாம் என அறிவுறுத்தப்பட்டுள்ளது.
