சென்னை: மேகதாது அணை விவகாரத்தில் புதிய நடுவர் மன்றம் அமைப்பதே தமிழ்நாட்டின் உரிமைகள் மற்றும் டெல்டா விவசாயிகளின் நலனை பாதுகாக்கும் சிறந்த வழி என திமுக முன்னாள் அமைச்சரும் எம்.எல்.ஏவுமான தங்கம் தென்னரசு தெரிவித்துள்ளார்.
சட்டப்பேரவை வளாகத்தில் செய்தியாளர்களை சந்தித்த அவர், மேகதாது அணை தொடர்பான பிரச்சினை காவிரி நடுவர் மன்றம் அல்லது உச்சநீதிமன்ற தீர்ப்புகளில் நேரடியாக தீர்க்கப்படாத புதிய பிரச்சினை என்பதால், அதற்காக தனி நடுவர் மன்றம் அமைக்க வேண்டும் என்ற கோரிக்கை நியாயமானது என்றார்.
மூத்த உச்சநீதிமன்ற வழக்கறிஞர்கள் மற்றும் நீர்வள வல்லுநர்களின் ஆலோசனையின் அடிப்படையில், மாநிலங்களுக்கு இடையேயான நதிநீர் தாவா சட்டத்தின் கீழ் புதிய நடுவர் மன்றம் அமைப்பதே சரியான தீர்வாக இருக்கும் என்று அவர் விளக்கினார்.
மேலும், புதிய நடுவர் மன்றம் அமைக்கப்பட்டாலும், 2018-ஆம் ஆண்டு உச்சநீதிமன்றம் வழங்கிய காவிரி நீர்ப் பகிர்வு இறுதி தீர்ப்புக்கு எந்த பாதிப்பும் ஏற்படாது என்றும், அந்த தீர்ப்பை மறுபரிசீலனை செய்ய முடியாது என்றும் அவர் உறுதியளித்தார்.
தமிழ்நாடு அரசின் இந்த முடிவு டெல்டா விவசாயிகள் மற்றும் காவிரி உரிமையை பாதுகாக்கும் ஆக்கப்பூர்வமான நடவடிக்கை என்றும், இதனை அரசியல் விவாதமாக மாற்றாமல் அனைத்து கட்சிகளும் ஒருமித்த கருத்துடன் ஆதரிக்க வேண்டும் என்றும் தங்கம் தென்னரசு கேட்டுக் கொண்டார்.
கர்நாடகத்திற்கு சாதகமான சூழலை உருவாக்கும் வகையில் தமிழ்நாட்டில் கருத்து வேறுபாடுகள் தோன்றக்கூடாது என்றும், காவிரி உரிமை விவகாரத்தில் அனைத்து அரசியல் கட்சிகளும் ஓரணியில் நிற்க வேண்டும் என்றும் அவர் வலியுறுத்தினார்.
