சென்னை: திருச்செந்தூர் சுப்பிரமணிய சுவாமி கோவிலில் தரிசனம் மற்றும் சேவைக் கட்டணங்களை உயர்த்தும் திட்டத்தை தமிழக அரசு கைவிட வேண்டும் என்று பாஜக தேசிய மகளிரணி தலைவர் வானதி சீனிவாசன் வலியுறுத்தியுள்ளார்.
திருச்செந்தூர் முருகன் கோவிலில் தங்க ரத உலா, சண்முகார்ச்சனை மற்றும் அபிஷேக தரிசனம் உள்ளிட்ட பல்வேறு சேவைகளுக்கான கட்டணங்களை உயர்த்த கோவில் நிர்வாகம் பரிசீலித்து வருவதாக தகவல்கள் வெளியாகியுள்ளன. இதற்கு பல்வேறு தரப்பினரிடமிருந்து எதிர்ப்பும் கருத்துகளும் எழுந்துள்ளன.
இதுகுறித்து வானதி சீனிவாசன் வெளியிட்டுள்ள அறிக்கையில், அறுபடை வீடுகளில் ஒன்றான திருச்செந்தூர் முருகன் கோவிலில் கட்டண உயர்வு பக்தர்களின் பொருளாதார சுமையை அதிகரிக்கும் நடவடிக்கையாகும் என்று தெரிவித்துள்ளார்.
ஏற்கனவே கோவிலில் தரிசன வசதிகளை பெறுவதற்காக இடைத்தரகர்கள் மூலம் வசூல் நடைபெறுவதாக குற்றச்சாட்டுகள் எழுந்துள்ள நிலையில், தற்போது சேவைக் கட்டணங்களை உயர்த்தும் முடிவு ஏற்புடையதல்ல என்றும் அவர் கூறியுள்ளார்.
இந்துசமய அறநிலையத்துறை அமைச்சர் ரமேஷ் இதுகுறித்து சட்டப்பேரவையில் தெளிவான விளக்கம் அளிக்க வேண்டும் என்றும், கட்டண உயர்வு தொடர்பாக ஏதேனும் முடிவு எடுக்கப்பட்டிருந்தால் அதனை உடனடியாக திரும்பப் பெற வேண்டும் என்றும் வலியுறுத்தியுள்ளார்.
மேலும், கோவில் வருவாயை அதிகரிக்க மாற்று வழிகளை அரசு கண்டறிய வேண்டும் என்றும், பக்தர்கள் மீது கூடுதல் நிதிச் சுமையை ஏற்றும் நடவடிக்கைகளை தவிர்க்க வேண்டும் என்றும் தெரிவித்துள்ளார்.
“பக்தர்கள் மனநிம்மதியுடன் முருகப்பெருமானை தரிசிக்கக்கூடிய சூழலை உருவாக்க வேண்டும். கோவில் வருவாயை பெருக்கும் பெயரில் பக்தர்களுக்கு சுமை ஏற்படுத்தும் தவெக அரசின் இந்து விரோத போக்கை கைவிட வேண்டும்” என்று வானதி சீனிவாசன் தனது அறிக்கையில் தெரிவித்துள்ளார்.
